Shaahiyoo 12 - Kafa Linguistics Project

¹ Kaaree ciicaa shuno, ariyoon shunone; sheeroon shixo mullaallo tunoone.

² Doono Yeeri, gaawe ashoon gaawe aafoona ciinniye; tunebaani gonde gabecho toommooch nalliye.

³ Gondittino ashoon manjoo tuniyaache; tunebaani cadiqeenaꞌo boonoshi xaaꞌoochee shuuraachemminaꞌone.

⁴ Qoppechi maachee bi kenoyich gubbicheene; tunebaani yeelliyaabeeti maachee, shaawushee daggeexi biiyoommine.

⁵ Cadiqeenaꞌochi gaboo kaamoone; tunebaani gondeenaꞌochi ciico dawushoone.

⁶ Gondeenaꞌochi yibbaatoo ashoon wuxiibeeti olloone; tunebaani kaameenaꞌochi yibbaatoo ashoon wodiihe.

⁷ Gondeenaꞌo dihimmona, boonoshi dookoo dooggiye; tunebaani cadiqeenaꞌochi shiijjeroo manjemmone.

⁸ Asho bi ariyoona galleteehe; tunebaani xumme gabechi asho hoxeehe.

⁹ Koshon shaaceebee kokkinnii beetoyee, bi qelloon giishiiꞌi bi qellich shuuneebeeto gaawiye.

¹⁰ Cadiqo bi gijjee kashoyich ariqqehe; tunebaani gonde ashi ariqqo, mullee manjoone.

¹¹ Bi showoon gochiibeeto koshon michemmone; tunebaani gaacaalli mooyon dabbiibeeto qellaalloone.

¹² Gondeenaꞌochi qaatoo gonde mooyon tuniyoone; tunebaani cadiqeenaꞌo gaawe aafoon aafeheete.

¹³ Gonde asho gonde bi yibbaatoona yechehe; tunebaani cadiqo iritoochee muricciye.

¹⁴ Asho, bi yibbaatoochee tiyitona gaawe mooyon michiye; bi kishee shuunoommonoo bi gatiyoon danehe.

¹⁵ Tuushoyich bi gommo, bi aafoochaa kaamoone; tunebaani mullecho ciicoon waayehe.

¹⁶ Tuushoochi kaaro bekkech arichehe; tunebaani accecho naagoon aaxxiyaache.

¹⁷ Iberoon yibbaateebeeto, tate miixoon miixehe; tunebaani koote miixoo kootoon koottiye.

¹⁸ Diqqoona yibbaateeti yibbaatoo, goraadoochoommon mayiihe; tunebaani mullechi ashi yibbaatoo wodiihe.

¹⁹ Ibere heciyoo bulli yemeenoon manjii beehe; tunebaani koote heciyoo yagaanoone.

²⁰ Gondoon gabii beetinaꞌochi mullooch maroo beetone; tunebaani diggoon gabii beetinaꞌoyich emiroo beetone.

²¹ Cadiqo toommooch gonde mooyo shagaache; tunebaani gondeenaꞌoyich xuuxo woddehe.

²² Doono Yeeri kooteenaꞌon ciigehe; tunebaani ibere asheenaꞌona emiriye.

²³ Accecho bi ariyoon aachiye; tunebaani mullaallo bi tuushoon bekkiihe.

²⁴ Kuppheꞌi shuuno doonjiihe; tunebaani yeexerittino guuno tuniihe.

²⁵ Xuuxeebeeti mullo ayinoon deebiye; tunebaani gaawe qaaro emiroon deebiye.

²⁶ Cadiqo bi nuuchoyich gaawe gommon bekkiihe; tunebaani gondeenaꞌochi gommo, gondooch boonoshin daammiye.

²⁷ Yeexeroo dabbee bi deebitonona kiiyaache; tunebaani kuppheꞌi shuuno ashoon gaanniihe.

²⁸ Cadiqittinee gommooch kasho beetone; are gommooch qitoo aalloone.