Shaahiyoo 11 - Kafa Linguistics Project

¹ Doono Yeeri machee qiicoona yubiyoon ciigehe; tunebaani machee qiicoona tachii qocona emiriye.

² Geecoo waagaata, cooneyoo woyemmone; tunebaani boonoshi qelloon giishii beetinaꞌo waan shalligoo beetone.

³ Kaameenaꞌon boonoshi kaamittino yaabiye; tunebaani gibeneyaaneenaꞌon boonoshi xummittino aalliihe.

⁴ Yeeri kaarehooba gaanno gaacaalloone; tunebaani cadiqo qitoochee wodiihe.

⁵ Qoonaalli ashich bi cadiqittino bi gommon kaachiye; tunebaani gonde asho bi gondoona dihemmone.

⁶ Kaameenaꞌon boonoshi cadiqittino wodiyemmone; tunebaani xummeenaꞌo boonoshi gonde qaatoona yechemminaꞌone.

⁷ Gonde asho qitiyooba bi gibeno qitemmone; bi hakkoon gibeneꞌi bi yebeneti yebenoo aallemmone.

⁸ Cadiqo bi xuuxoochee wodemmone; ebi xuuxo gonde ashi toommooch shaggemmone.

⁹ Yeerich qeyaani asho bi noonoona bi giyoon aalliihe; tunebaani cadiqeenaꞌo boonoshi ariyoona wodiyeete.

¹⁰ Cadiqeenaꞌoyich mooyo kaamegaata, katemoo emiriye; gondeenaꞌo aallegaata, wotta emiroona ililiye.

¹¹ Kaameenaꞌo diireyoona katemoo dicciye; tunebaani gondeenaꞌochi noonoona tiishehe.

¹² Bi giyoon hoxeebeeto, mullaalli ashoone; tunebaani gabechi asho minnakanna getaache.

¹³ Oonnechi asho maaci mooyon kichiye; tunebaani gibeneeti asho maacee mooyon quyehe.

¹⁴ Gaawichii mikkireyoo aallegaata, maccoo dihiye; tunebaani mikkirechinaꞌo meetigaata, wudoo danehe.

¹⁵ Bi ariyaanoyich buushaaroo tunemmo iritooch dihemmone; tunebaani buushaaroo tunoon qajjimmo diggoona beeyemmone.

¹⁶ Ariqqechi ure oogoon danahan; xuꞌechi asheenaꞌo gaannoon daneheete.

¹⁷ Ariqqechi asho biich gaawichiye; tunebaani maaci manjoo biich gondiihe.

¹⁸ Gonde asho daneebeeti mooyo gaacaalloone; tunebaani deꞌe mooyon tuniibeeto, gaawe gatiyoon danehe.

¹⁹ Cadiqittinoona manjimmo kashoona beeyemmone; tunebaani gondoon dabbimmo qitemmone.

²⁰ Xumme mullechinaꞌo Doono Yeer waanaa ciigeetinaꞌone; tunebaani tate mooyon tunii beetinaꞌona emiriye.

²¹ Gonde asheenaꞌo sheereyoo echeyaani mooyone; tunebaani cadiqeenaꞌo wodemminaꞌone.

²² Gaawe gabaalli maachechi malleto, gudichi muddooch xogeeti aachoommone.

²³ Cadiqeenaꞌochi qaatoo, gaawe mooyon daniihe; tunebaani gondeenaꞌochi qaatoo naxoon deebiye.

²⁴ Kisheyaanoon immiibeeti asho beete; tunebaani beshoon danehe; wotta gonde woone asho beete; tunebaani girehe.

²⁵ Wojjiibeeto gaannemmone; bareenaꞌon digaayiibeeto digaayemmone.

²⁶ Aaxxii kemoyich maayoon kotiibeeto asheenaꞌona uppeyemmone; tunebaani kichii kemmiibeeto diireyemmone.

²⁷ Gaawe mooyon kupphii qaawiibeeto, gaawe mooyon danehe; gonde mooyon qaawiibeeto gonde mooyon danehe.

²⁸ Bi gaannoon gibeneebeeto oojjemmone; tunebaani cadiqo mocee waamochoommon waarwaariyemmone.

²⁹ Bi kechi ashoon iritiibeeto, amoonolla woraashaachemmone; tuushe asho mullechoyich maddecho tunemmone.

³⁰ Cadiqe ashi shuunee aafo kashoon daniihe; asheenaꞌon kiciibeeto ariyechone.

³¹ Cadiqe asho showee toommoochaa bi shuunee gatiyoon danemmo bi tunegaata, axaaxechonaa xuꞌechona amooniye bi tunemmo!