Shaahiyoo 10 - Kafa Linguistics Project

Solomoonichi Baribare Shaahiyeenaꞌo

¹ Solomoonichi shaahiyeenaꞌo: Mullechi bushoo bi nihoon emirikkiye; tunebaani mullaalli bushoo bi indeen ayinikkiye.

² Axaaxoona daneti gaanno gaacaalloone; tunebaani cadiqoo qitoochee wodiihe.

³ Doono Yeeri cadiqo shaacemmoyich tuniyaachemmone; tunebaani gonde ashi qaatoon naayiyemmone.

⁴ Yeexerittino giriihe; tunebaani kupphee shuuno gaanniihe.

⁵ Maayo kashiyooba, qecciibeeti bushoo ariyechone; tunebaani qeci goorooch tokketeebeeto yeelliiti bushoone.

⁶ Diiroo cadiqeenaꞌochi shimboochiye; tunebaani gondeenaꞌochi noonoo boonoshi xuꞌoon aachiye.

⁷ Cadiqeenaꞌochi shalligichoo diiroyich tunemmone; tunebaani gondeenaꞌochi shigo aalle batteyemmone.

⁸ Mullechi asho getoon waayehe; tunebaani heefinniibeeti tuushoo aallemmone.

⁹ Deꞌe asho keqqaalloon shaꞌehe; tunebaani bi gommon xummiibeeto yecheyemmone.

¹⁰ Aafoona xayishiibeeto, iritoon deebiye; tunebaani xalla kaareebeeto, diggoon daniihe.

¹¹ Cadiqe ashi yibbaatoo kashee tunoone; tunebaani gonde ashi yibbaatoo boonoshi xuꞌoon aachiye.

¹² Shixo kaaroon tiijjiye; tunebaani shunoo xuꞌo bullin qeriye.

¹³ Shalligoo gabechi ashi noonoochee danehe; tunebaani mullaalli asho gumboona xooppemmone.

¹⁴ Mullechinaꞌo ariyoon kiciyeete; tunebaani tuusheenaꞌochi yibbaatoo aalloon katichiye.

¹⁵ Gaannechoyich bi gaanno mishigechi katemoommone; girechon bi giroo aalliyemmone.

¹⁶ Cadiqoochi shuunee aafo kasho waan biin yaabiye; tunebaani gonde asho daneebeeti gijjoo axaaxooch biin yaabiye.

¹⁷ Kaaree ciicaa deqqimmo kashee gommona hammemmone; tunebaani sheeraa deꞌa getaache immo muriccemmone.

¹⁸ Bi shixon aachiibeeto koote yibbaatechone; oonoon kichiibeeto mullaalloone.

¹⁹ Meeti yibbaatooch axaaxoo aalleyaache; tunebaani bi heciyoon quyeebeeto, aroo ariyechone.

²⁰ Cadiqe ashi heciyoo xure birewoommone; tunebaani gonde ashi mullo gaacaalloone.

²¹ Cadiqe ashi noonoo meeti ashich gaacciye; tunebaani tuusheenaꞌo gabee muccoona qitemminaꞌone.

²² Doono Yeerichi diiroo gaannechon tuniihe; ayinoonoo arooch daakkaache.

²³ Gonde mooyon tuniyoo mullaalloyich kaayoommone; tunebaani gabechi asho shalligoon danoona emiriye.

²⁴ Gonde ashi toommooch bi shattito shaggemmone; tunebaani cadiqo bi qaatiton danemmone.

²⁵ Yuboo tiyiyooba gonde asho hidee aallemmone; tunebaani cadiqo bulli yemeenoon manjiree beeyemmone.

²⁶ Kiikkero gashoon, cufoo aafoon bi biiyiyoommon, yeexere asho biin wochetoyich biiyoone.

²⁷ Doono Yeerin shato eenon genjiihe; tunebaani gonde ashi eeno qaminnemmone.

²⁸ Cadiqe ashi gibenee taco emiroone; tunebaani gonde ashi gibeno duube echemmone.

²⁹ Doono Yeeri kaameenaꞌoyich deeboone; tunebaani gondeenaꞌon aalliyemmone.

³⁰ Cadiqeenaꞌo ciroona geewaachemminaꞌone; tunebaani gondeenaꞌo showee toommooch beetaachemminaꞌone.

³¹ Cadiqeenaꞌochi heciyoochee shalligoo kechiye; tunebaani xumme moochechi heciyoo kuchemmone.

³² Cadiqe ashi noonoo emirikkiibeeti mooyon ariihe; tunebaani gondeenaꞌochi noonoo xummoone.