Shaahiyoo 1 - Kafa Linguistics Project

Shaahiyeenaꞌochi Gaaco

¹ Israꞌeelee taatoo, Daawitichi bushoo Solomoonichi shaahiyeenaꞌo:

² Shaahiyeenaꞌo shalligoonaa gaawe ciicoonon danoyich, aacheeti mooyon yechiti yibbaatoon shalligoyich,

³ cadiqoona, dayinnetoonaa kaamittinoona beemona ciicoon deqqiibeeti mulloon danoyichoo gaaccii beetinaꞌone.

⁴ Ariyaaneenaꞌon accechinaꞌo, gurimaasheenaꞌon ariyechinaꞌonaa mullechinaꞌonon tuniiheete.

⁵ Mullechi asheenaꞌo waayeree beshoon mullechinaꞌo boonoshi tunemmoyich, mooyon goommii deqqechinaꞌoo ariyoon aroochee boonoshi danemmoyich tuniiheete.

⁶ Ebin tuniyoona, aacheeti shaahiyee mooyon, mullechi asheenaꞌochi yibbaatoonaa turitoonon asho ariyemmoyich tuniiheete.

Gurimaasheenaꞌoyich Icheti Ciico

⁷ Doono Yeerin shato ariyee shiichoone; tunebaani tuusheenaꞌo shalligoonaa sheeroonon hoxeheete.

⁸ Ta bushoocho, ne nihoochi ciicoon waayebe; ne indee dojjaa beetonoo qajjaahine.

⁹ Ebiyoo ne qellooch oogoon immiibeeti gubbichoommon, ne qettoon malletiibeeti aachee zaaboommonoo tunemmone.

¹⁰ Ta bushoocho, axaaxechinaꞌo neen dawushigaata, deꞌa gettaahine.

¹¹ “Ne waataa oti quyeree damoon ukkibone; naboo aalloon xalle ashoon gaappebone;

¹² maasho ashoon qooxoommon, kashoona boonoshi beetaa, boonoshin qooxone; oppooch boonoshi giyemmoyich tuniibone.

¹³ Aaxxe baribare wodde qiicoon danemmo noone; no boggeti qiicoona no kexon ceechemmo noone;

¹⁴ waaree ne ixoon noonna tookki tuniibe; boggaa no danemmi mooyon tookki qoodeyemmo noone” boonoshi getigaata,

¹⁵ ta bushoocho, boonoshina tookki gommona hammaahine; boonoshi gommoochee wohe.

¹⁶ Boonoshi baatoo axaaxooch woccii beetone; damee ukkoyichoo afaafinee beetinaꞌone.

¹⁷ Kafoo ciinnii beetaa, shaachee shaachoo gaacaalloone.

¹⁸ Ebi asheenaꞌo boonoshi ottiibeeto, boonoshi damee toommoochiye; boonoshi olleebeetoo boonoshi kashee toommoochiye.

¹⁹ Bogona gaanneya qiicceebeeti asho bullichi ciiro ebine; ebiyoo bi doonochi kashoon aalliyoone.

Shalligee Ceeggaabeeti Tuno

²⁰ Shalligee, gommoochaa cookaa beetine; addibaaboochaa qaaroon oogichaꞌa bunnaa beetine.

²¹ Asho dulliibeeti xaaꞌoochaa ceeggaa beetine; katemee gimi kelloochaanoo ishichaa yibbaatee beetine:

²² “Mullaalleenaꞌote, mullee muccoon ittoshi shuni beeyemmo aati wottooniye? Cooqqirechinaꞌoo boonoshi cooqqiroona boonoshi emiri beeyemmo aati wottooniye? Tuusheenaꞌo ariyoon boonoshi shixi beeyemmo aati wottoniye?

²³ Ta ciicoon waayebe; ta ayaanoon ittoshich ukkemmi taane; ta qaaroonoo ittoshi ariyemmoyich tuniyemmi taane.

²⁴ Ta ceegiyooba waayemmon ittoshi qajjitoyich, ta kishoon ta yaggiyooba koniyoona aaxxiyoo bi qajjitoyich,

²⁵ ta ciico bullin ittoshi qallayitoyich, ta sheeroon deꞌo ittoshi qajjitoyich,

²⁶ tawoo ittoshi xuuxoona miiccemmi taane; keqqoo ittoshin yexiyooboo cooqqiremmi taane.

²⁷ Keqqoo ambamboochoommon ittoshin yexiyooba, xuuxo yubee yongoochoommon bi waahooba, xuuxoonaa iritoona ittoshi toommooch bi kindiyooba, ittoshin cooqqiremmi taane.

²⁸ “Ebiyooba taan ceeggemminaꞌone; tunebaani ta, wochaachemmi taane; kupphiiree taan qaawemminaꞌone; tunebaani taan daneyaachemminaꞌone.

²⁹ Ariyoon boonoshi shixxitoyich, Doono Yeerin shaton boonoshi qajjitoyich,

³⁰ ta ciicoon deꞌo boonoshi qajjitoyich, ta sheeroon boonoshi hoxetoyich,

³¹ boonoshi shuunetoommo boonoshi toommooch shuuneyemmone; ashi toommooch boonoshi koceeto boonoshin yechemmone.

³² Ariyoochee woho tuusheenaꞌon wuxemmone; beenecho tuno mullaalleenaꞌon aalliyemmone;

³³ tunebaani ta waanee ellemmo tooꞌiree kotemmone; amee keqqolla aalloon beeyemmone” iyane.