Ruuti 3 - Kafa Linguistics Project

Naꞌoomi Ruutich Kenoon Qaawoo

¹ Ikke areddoon Naꞌoomi Ruutich ishichiyan: “Ne qellee kexona ne beeyemmon shunneti taane. Ebich neech tunemmi kenoon qaawoo taach qaawiihe.

² Bi shuunechi genneenaꞌon dabbaꞌa maayoon ne butteti uro Boꞌaazi nooch xiboo bi tunoon ebiyee aaf neech getteti taane. Andoo gaawichi ellebe; biyoo may xum bi sheqoon buchiibee budooch qeyemmone.

³ Ebich ne qeddoon mache huuteree, gaawe tahoon tahebe; aroochee ebi are sheqoon bi buchiibeeti xaaꞌooch hambe; tunebaani maa uchii bi tiyimmi wottoon, biinna bekkeyaahine.

⁴ Aabiich bi qeyemmo gaata shiichi xiishiichi, tokketoo biin daammitoyee gubb, hami bi baataa qoreddoon gaxxiree, arooch giyi tokketebe; biyoo ne tuniyemmon neech gettemmone” iyan.

⁵ Ruutiyoo Naꞌoomich “Ebi ne getteto bullin tuniyemmi taane” iyan.

⁶ Ebina Ruuti sheqoo bucheebeeti xaaꞌooch hammaꞌa, bi amaatee biich getteto bullin tuniihan.

⁷ Boꞌaaziyoo maa uchii bi ashittinooch gaawetaa, hammii bushaa kiceeti sheqee gaꞌooch tokketehe. Ruutiyoo nibbaa xepphaabee waa Boꞌaazi qoreddoon baataa gaxxaꞌa giyaa tokketehan.

⁸ Xumee gutte qellimi bedooch Boꞌaazi diqqoona tokketoochee beribenniꞌi bi tiyaahaa, ebiyoche, ikke ure bi baata qeyaꞌa beetine.

⁹ Biyoo “Koni neene?” iꞌi echehe. Areyoo “Ta doonocho, taane Ruuti! Ta kenoyich katini xiboonaa taan deggii gaachoyich bede ashoona ne tunetoyich, taan woraashibe” iyan.

¹⁰ Boꞌaazi wochiꞌi Ruutich “Doono Yeeri neen diiribe; and ebi ne tuniiti mooyona aaf ne amaatech ne tuniitoyee beshoon deꞌe ne tunoon bekkiiti neene. Gaanneba woyee gireba, gurimaashoon qaawaꞌa dabbaanee neene.

¹¹ And illa amoyichona aaxxiyaahine. Gaawe ure ne tunoon katemeexi asho bulli arii beetone. Ebich ne echeti mooyo bullin neech tuniyemmo taane.

¹² Ne kenoyich katini xiboonaa neen deggii gaachoyich bede asheenaꞌoochee ikkoona ta tuno iberoone; tunebaani tayee beshoon katini bare uro beetone.

¹³ And hiniich qebe; yaach ebi are uroyich ta getaa, neen woraashemmo bi tunegaata, woraashibe; bi qayigaata, Doono Yeeri beege, ta neech tunemmo taane. Showoo harimmi wottoon, hiniich tokketebe” iye.

¹⁴ Ruutiyoo harimmi wottoon, Boꞌaazi baata tokketehan. Boꞌaaziyoo maache ure ebi sheqoo bucheebeeti xaaꞌooch waati bi tunoon asho koniyoona ariyemmoyich qaawaanoone. Ebich Ruuti haree gaargaarooch hamma tiyahan.

¹⁵ Boꞌaaziyoo Ruutin “Ne naxaloon yaggibe” iye. Ruutiyoo bi naxaloon yaggiyan. Boꞌaazi shaashe kobbaaya bede sheqoon qeelleꞌi naxaloona Ruuti gogooch shaakkiihe. Biyoo katemooch wottee hammiye.

¹⁶ Ruuti bi amaatee Naꞌoom waan hammaa shaggahan. Naꞌoomiyoo “Ta busheene, neech ta getteti mooyo aabichite?” iyan. Ruutiyoo Boꞌaazi tuniiti mooyo bullin gettahan.

¹⁷ Daakkaꞌaanoo “ ‘Ne amaatee aafooch shokke kishoon hammaahine’ iꞌi, ebi shaahe sheqoon taach immiye” iyan.

¹⁸ Aroochee Naꞌoomi Ruutich “Ta busheene, Boꞌaazi hanaach hini mooyon ikke xaaꞌooch bechaanoon heeyaachemmone. Ebich ikke mooyo tunetaa ne beeggemmi wottoon, haaꞌiyoona quyebe” iyan.