Ruuti 1 - Kafa Linguistics Project

Elimeleekinaa Bi Kechi Asheenaꞌona Moꞌabee Showooch Hamo

^1-2 Wonna, Israꞌeelee showooch taatoo taatoyee shiichiꞌi, woraaferashoo qeejjiibeeti yemeenooba, ebi showooch shaacoo giyiye. Ebich Efiraati yaroo tuneti ikke uro bi mecheenaa bi bushiishoonon yechiꞌi, Yihudee showeexi Beetilehemi katemoochee tiyii, giisheche yemeenoon koteya Moꞌabee showooch hammiye. Uroochi shigo Elimeleeki, bi mechee shigo Naꞌoomi, bi gutte bushiisheenaꞌochi shigo wotta Mahilooninaa Kiliyoonina getteehe. Boonoshiyoo hammiꞌi Moꞌabee showooch koteheete.

³ Arooch boonoshi beetaa, Naꞌoomi keno Elimeleeki qitiye. Naꞌoomi bi gutte bushiishoona tookkaa echahan.

⁴ Boonoshiyoo Moꞌabee showoochee mecheen shaaggiyeete. Ikkeechi shigo Ruuti, wotta bareechi shigo Orifi getteehe. Arooch aashire naton boonoshi kotetoyee gubb,

⁵ gutte maneenaꞌo Mahilooninaa Kiliyoonina qitiyeete. Naꞌoomi bi kenoonaa bi gutte bushiishoonon muccaꞌa bi ikkeeti echahan.

Naꞌoominaa Ruutina Beetilehem Wotto

⁶ Naꞌoomi Moꞌabee showooch beechaa, Doono Yeeri bi asheenaꞌon maayoon immiꞌi diirito bi tunoon waayahan; ebich Israꞌeelee showooch wotteree hamma bi gutte naamecheenaꞌona tookkaa tiyahan.

⁷ Bi beeti xaaꞌoochee tiyaa boonoshina tookkaa Yihudee showooch qaxiriyan.

⁸ Hammii boonoshi beetaa, Naꞌoomi bi naamecheenaꞌoyich ishichiyan: “And illa ittoshi xibeenaꞌo kexooch wottebote. Taannaa qititi ittoshi keneenaꞌonoyich ittoshi tuniiti deꞌe mooyoyich Doono Yeeri ittoshich deebe;

⁹ Doono Yeeri ittoshi shaaggimmi keno kexoochaa ittoshin kashiibe” iyan. Ebina boonoshin diggii shummahan. Boonoshiyoo oogichii eefeheete.

¹⁰ Aroochee ishichiyeete: “Wotteyaachone. Neenna tookki ne asheenaꞌo waan hammemmo noone” iyeete.

¹¹ Naꞌoomi boonoshich ishichiyan: “Ta bushiisheenaꞌote, wottebote; aakkiyane taanna tookki ittoshi hammemmo? Ittoshich keno tunemmi bushiishoo ta maacoochee shiijjemmo ittoshich shaahii beete?

¹² Ta geeneti taane. Ebich kenoon shaagon hakkaache. Wottebote; halla kenoon shaagi gibeno taach bi beemmo gaatoona, hanaachi xum kenoon shaaggaꞌa anaami bushiishoon ta shiyemmo gaata,

¹³ eboshi diccii oogemmi wottoon, shaagaanoon beeyehote? Wotta eboshicha getiree kenoon shaagon qajjehote? Ta bushiisheenaꞌote, ebi tunoon hakkaani mooyone. Doono Yeeri ta waanee wokkitone. Ittoshi toommooch tuneti mooyoyich oogeton ayiniti taane” iyan.

¹⁴ Boonoshiyoo wochinnoon oogichii eefeheete. Ebina Orifi bi amaateen diggiyaa shummaꞌa wottahan. Tunebaani Ruuti bi amaatee waan giddahan.

¹⁵ Naꞌoomi Ruutich ishichiyan: “Ne agaattee bi asheenaꞌonaa bi nuggisheenaꞌona waan wottetine. Newoo wotta biinna tookki wottebe” iyan.

¹⁶ Ruuti wochaꞌa, “Ne hammemmooch hammemmi taane; ne qeyemmooch qeyemmi taane; neyee bariree ta wottemmoyich qiicceyaahine. Ne asho ta asho, ne Nuggishoo ta Nuggishoo tunemmone;

¹⁷ ne qitimmi xaaꞌooch qitemmi taane; ne duukkemmooch duukkeyemmi taane. Qitoyee besh neennaa taannon bariyemmi mooyo amolla aalloone. Neyee ta barigaata, Doono Yeeri taan ebi ebin tuniibe” iyan.

¹⁸ Naꞌoomiyoo Ruuti biinna tookki hamma mulloochee tiijjaa tiyeti bi tunoon ariyaꞌa cikkaa qajjahan.

¹⁹ Ebina gutteꞌi Beetilehemi katemooch beddaahaa hammiyeete. Beetilehem boonoshi shaggimmona, katemeexi asheenaꞌo bulli boonoshin beeggiꞌi worganeheete. Genneenaꞌoo “Hini Naꞌoomine?” iibee bunneeheete.

²⁰ Naꞌoomiyoo, “Aakkiya taan Naꞌoomi iyote? Beshe Hakkechi Yeeri taan oogichii bi caamiitoyich Maare getote.

²¹ Ceenona kecheti taan Doono Yeeri ta kishoon tiqqiiꞌi wochitone. Doono Yeeri taan naxemmona, Beshe Hakkechi Yeeri taan xuuxoona yexximmona, aakkiya taan Naꞌoomi iyote?” iyan.

²² Ebiyoommi gommona Naꞌoominaa bi bushoochi mechee Moꞌabechi Ruutina Moꞌabee showoochee wottee Beetilehem waaheete. Boonoshi shaggito, Israꞌeelee showooch sheqee qeci gooroo giyiyeenane.