Roomi 9 - Kafa Linguistics Project

Yeeri Kaacciti Asheenaꞌo

¹ Kiristoosina tunaꞌa iberoon gettoye; kootoon yibbaateyaache; ta mullo Yaafe Ayaanoona yaabeeꞌi miixee beetone.

² Oogeti ayinoo, kuxeyaani xuuxoo ta mullooch beetone.

³ Ta xibeenaꞌo tuneti ta maneenaꞌoyicha getiree Kiristoosiyee bariree ta qelloona uppeto ta tunemmoyich qaataa beehoye.

⁴ Boonoshiyoo Israꞌeelee macceenaꞌone; Yeeriyoo boonoshin bi hajjee bushiisheenaꞌo tuniihe; bi oogee yiiroochee boonoshich qoodiye; wogoonoo boonoshina tookkii giyiye; sheeroonoo boonoshich immiye; yaafee kechi maddee doyoon, meeti baribare gibenee qaaroonoo boonoshich immiye.

⁵ Qaabbechinaꞌochi yareenaꞌone; eboshichi daggoochee Kiristoosi meenona shiijjeꞌi waahe; biyoo bulliyee beshoone; bulli yemeenoonoo diireeti Nuggishoone. Ameena.

⁶ Tunebaani Yeerichi gibenee qaaro shaddeetone geto toonoone. Ebi Israꞌeelee yareenaꞌo bulli ibere Israꞌeeleenaꞌo tooneenaꞌone.

⁷ Wottoo Abrahamichi yareenaꞌo boonoshi tunetoyich, boonoshi bulli ibere bi bushiisheenaꞌo tooneenaꞌone; tunebaani Yeeri Abrahamich “Yisaaqichi yaroone ne yaroo getaa ceekkemmo” itone.

⁸ Ebi geto Yeeri gibenikkiti gibenee qaaroona shiijjeti bushiisheenaꞌo ibere bi yaroo tuneꞌi haddeeteetalli, ebi meenona shiijjeti bushiisheenaꞌo Yeerichi bushiisheenaꞌo tooneenaꞌone getone.

⁹ Ebiyoo “Ta getteti aabooba woyemmo taane; Saariyoo bushoon shiyemmine” iꞌi Yeeri gibenee qaaroon bi gettitoyichiye.

¹⁰ Ebi ikkeeto baach toonoone; Ribiqi ikke nihoo waanee, biyoo no qaabbechi Yisaaq waanee qaappoon bi yeqqefehooba,

^11-12 Yeeri biich “Qaabboo guuchoyich hajjeyemmone” iye. Ebin bi ito bushiisheenaꞌo batt shiijjeyaani boonoshi beetaa, gaaweto tuneba gondo, ikkeenolla boonoshi tuniyaan beehoobane. Ebich Yeeri kaaccitoommon bi gaboo manjito bi tunemmoyich, ikkoon bariiꞌi bi kaaccito boonoshi shuuneti shuunoona tuneyaanoon, bi ceeggiti ceegoonane.

¹³ Ebiyoo “Yaaqobin shunnoye; tunebaani Esayin shixxoye” getaa bi kooreetoommoniye.

¹⁴ Illa ama gettehone? Yeeri gondoon shuunee beetone? Shuuneyaache!

¹⁵ Yeeri Muusich “Ikke uroon maariya ta qaawigaata, maaremmo taane; ikke uroyichoo ariqqeya ta qaawigaata, ariqqemmo taane” bi itoommoniye.

¹⁶ Ebich maaroo danemmo maariibeeti Yeer waaneenalli, ashi daaggoona woyee ashi qiiccoona toonoone.

¹⁷ Yaafe Macaafoochaa Yeeri Faroonin “Ne toommoochaa ta tuniyaabeeti shuunoona ta giidoon ta bekkiyemmoyich, ta shigoo showee toommo bulliich bi arichemmoyich, ebichi naboyichiye neen ta taatiito” iye.

¹⁸ Illa Yeeri ikke uroon maariya bi qaawigaata, maariye; ikke uroonoo mulli manjoo tuniiya bi qaawigaata, mulli manjoo tuniihe.

Yeerichi Kaaree Shiixxoonaa Bi Maaroona

¹⁹ Illa Yeeri eechiibeeto tuneechii, “And beddaahaa amoyich ashoon gondiihe? Yeerichi daaggoon ‘Tato toonoone’ geton hakkemmo, konine?” getiree diqqich echemmo neene.

²⁰ Tunebaani haano ashoocho, ishichiree Yeerich wochemmo ne koni neene? Nuuqqoochee shuuneebeeti qiico shuuneton “Amoyich ebin tuniiꞌa taan shuunenne?” gettehe?

²¹ Woyee nuuqqee hachecho ikke nuuphoochee ikke qiicoon oogee qiico, wotta ikke qiicoon qalle qiicoon tuniiꞌi shuunoyich nuuqqee toommooch hakkoo biich aalle?

²² Tunebaani Yeeri bi kaaree shiixxoon bekkiiya, bi hakkoonoo arichiiya shunniye; ebich aalloyich qanniti bi kaaree shiixxee qiiceenaꞌon woddoon haaꞌiihe.

²³ Bi oogee yiiroochee boonoshi qoodeyemmoyich shiichiꞌi bi qanniiti, bi ariqqeti qiiceenaꞌo toommooch worganikkiti bi oogee yiiroon bekkiiya shunniye.

²⁴ Eboshiyoo noone getone; noonoo Ayihudeenaꞌo daggoochee baach tuneyaanoon, Aageteenaꞌo daggoochee wotta ceeggitone.

²⁵ Ebiyoommon wotta keemechi Hoseeꞌichi Macaafoochaa Yeeri, “Ta macceenaꞌo tuneyaaneenaꞌon ‘Ta macceenaꞌo’ getiree ceeggemmo taane; ta shunaani asheenaꞌon ‘Ta shunnetinaꞌo’ getiree ceeggemmo taane.

²⁶ ‘Ittoshi ta macceenaꞌo toono ittoshine’ boonoshi getteeti xaaꞌooch aroochaa ‘Beeyechi Yeerichi bushiisheenaꞌo’ getaa ceekkemminaꞌone” itone.

²⁷ Keemechi Isiyaasi bi macaafoochaa “Israꞌeeleenaꞌo baharee gasheexi qacoommon boonoshi woddeteenona, giishecheenaꞌo baach wodemminaꞌone.

²⁸ Doono showee toommooch beeti asheenaꞌo bulli toommooch bi nalloon kaate maaciree ikke wottoon ceechemmone” iꞌi Israꞌeeleenaꞌochon cookii gettitone.

²⁹ Wotta Isiyaasi shiichiꞌi ishichitoommon, “Beshe Mawe Doono Yeeri nooch yaroon bi echiyaan gaata, Sodoomin tunesho, Gomoorinoo shaahesho noone.”

Israꞌeeleenaꞌoyich Mishiraachee Qaaro Getteyoo

³⁰ Illa ama gettehone? Cadiqoon dabbaani Aageteenaꞌo cadiqiyeete; boonoshi cadiqitoo Yeeri toommooch mulloon tooꞌiyoonane.

³¹ Tunebaani Israꞌeeleenaꞌo cadiqoo daneebeeti sheeroon dabbiibee ebi are sheerooch shagaaneenaꞌone.

^32-33 Amoyichiye shago boonoshi qajjito? Shuunoonalli, Yeeri toommooch mullee tooꞌiyoona cadiqoon boonoshi qaawoo qajjitoyichiye. Yeeri ishichitone: “Ebiyoche, asheenaꞌon tephemmi xaqqoon, yexi dichemmi xaqqee guudon Tsiyoon kotiyemmo taane; bi toommooch mulloon tooꞌiibeeto yeelleyaachemmone” getaa bi kooreetoommon, ebi are tephemmi xaqqoona tepheeꞌi dihiyeete.