Roomi 7 - Kafa Linguistics Project

Shaagee Samaanee Shaahiyoo

¹ Ta maneenaꞌote! Sheeroon ariibeeti ittoshich gettoye: Asho kashoona bi beemmi yemeenee wottoyich baach sheeroo biin hajjoon ariyaachote?

² Kenoon shaaggeti ure bi keno kashoona beemmi wottoon, biinna tookkaa shaagee samaanoona cuchetine; tunebaani bi keno qitigaata, bi kenoona tookkii biin cuchiti shaagee samaanee sheeroochee biichetine.

³ Ebich bi keno kashoona bi beetaa, bare kenoon bi shaagigaata, shunoon maatine; tunebaani bi keno qitigaata, ebiyee aafi shaagee samaanee sheeroochee kechetine; bare kenoon bi shaagigaata, shunimaayeene getteyaachene.

⁴ Ta maneenaꞌote! Ebiyoommon ittoshi wotta Kiristoosi masqalooch yoodaa bi qitiyooba, Muusichi Sheeroyich qitito ittoshine. Andoo aafoon Yeerich no aafemmoyich, qitoochee tiyiti Yesuusichi hajjoo tuneto ittoshine.

⁵ Meechi gaboyich hajjeeꞌa no beetaa, sheeroo shuurikkiibeeti axaaxee qaatoo, qitooch bechiibeeti aafoon no aafemmoyich tuniyoyich, no ashittinee daggoochaa shuunee beehe.

⁶ Tunebaani wonna no cucheti sheeroyich qitito noone; ebich Yeeri ebi sheeroochee and noon biichitone; ebichoo Yeerich no hajjeebeeto, Yaafe Ayaano noon yaabiibeeti andire gommonalli, kooreeti Muusichi Sheeroo gettiibeeti wonnee gommona toonoone.

Sheeroo Asho Axaaxoon Bi Shuunemmoyich Shuurikkiibeeto Bi Tuno

⁷ Illa ama gettehone? Sheeroo axaaxoone? Ciroona toonoone! Tunebaani sheeroo getaanegaata, axaaxoo amo gaata ariyaachesho taane; wotta sheeroo qaatiyaahine bi getaanegaata, qaatoo amo gaata ariyaachesho taane.

⁸ Tunebaani axaaxoo sheeroo gettiibeeti mooyona gommon daneꞌi bacheti meeti mooyinaꞌon ta qaatemmoyich taan shuurikkiye; sheeroo icheyaan beehooba, axaaxoo qititi ashoommi giidaalloone.

⁹ Tawoo wonna sheeroo icheyaan beehooba, kashecho taane; tunebaani sheeroo gettiibeeti mooyo shagaa, arooba axaaxoo giidoon danehe; tawoo qitiyo.

¹⁰ Kashoon imma gabeeti sheeroo gettiibeeti mooyo qitooch shakkii beeton tuneꞌi daneho.

¹¹ Axaaxoo gommon daneꞌi sheeroo gettiibeeti gommona taan dachitone; are sheeroo gettiibeeti mooyona taan wuxitone.

¹² Ebich Yeerichi sheeroo yaafoone; sheeroo gettiibeeti mooyoo yaafoone; kaamoonaa gaawetonane.

¹³ Illa gaaweto tuneti mooyo qitoon ta toommooch shakkiihe? Ciroona shakkiyaanoone! Tunebaani ebin shakkiito axaaxoone; axaaxoo amo gaata bi galleyemmoyich ebi gaawe moochi gommona giyiꞌi qitoon ta toommooch shakkiihe. Ebich sheeroo gettiibeeti moochi gommona axaaxoo oogeti magge gondo bi tuno bekketone.

Ashi Mullee Daggeexi Koyo

¹⁴ Sheeroo Yeerichi Ayaanoochee bi tunoon ariibeeto noone; tunebaani axaaxoyich hajjeya kechaꞌa meenon taheti asho taane.

¹⁵ Amoon ta tuniyaabeeto gaata taach giyaanoone; ta shixxaabeeti mooyoniye ta tuniyaabeeto; tunebaani ta shunnaabeeti mooyon tuniyaano taane.

¹⁶ Ta shunaani mooyon tuniyaabeeto ta tunegaata, sheeroo gaaweto bi tunoon miixaabeeto taane.

¹⁷ Ebi tunegaata, and aroon tuniibeeto ta mullooch beeti axaaxoani, ta toono taane.

¹⁸ Ta waan, ebi getoo ta meechi shuriyooch, gaawe mooyo aallo bi tunoon ariibeeto taane; gaawe mooyon tuniyoyich ta qaawitaanona, tuniyoon hakkaache.

¹⁹ Ta shunaani gonde mooyonalli ta tuniyaabeeto, ta shunnaabeeti gaawe mooyon toonoone.

²⁰ Ta shunaani mooyon tuniibeeto ta tunegaata, aroon and tuniibeeto ta mullooch beeti axaaxoani, ta toono taane.

²¹ Illa eechii shuuneebeeti sheeroon beeggaabeeto taane: Gaaweton tuniiya qaawaabee gondoon shuunoochee wohaache.

²² Maaci ta mulloona Yeerichi sheeroona emiraabeeto taane.

²³ Tunebaani ta ashittinee quumoochaa shuuneebeeti bare sheeroon beeggaabeeto taane; ebiyoo ta mulloona ta emiraabeeti sheeroona tookkii koyeebeeti sheeroone; aroo ta quumeenaꞌo daggooch beeti axaaxee sheeroona taan keccii beetone.

²⁴ Ta am shaahoon maaceraabeeti asho taane! Hini qitooch bechiibeeti meenoochee konine taan wodiyemmo?

²⁵ No Doono Yesuus Kiristoosi waanaa Yeerich galleto bede. Illa ta mulloona Yeerichi sheeroyich hajjeebeeto, tunebaani ta meenona axaaxee sheeroyich hajjeebeeto tuneto taane.