Roomi 6 - Kafa Linguistics Project

Axaaxoyich Qitiꞌi Kiristoosich Kashecho Tuno

¹ Illa ama getona? Yeerichi wojjoo woddemmoyich axaaxoon shuune beebona?

² Ciroona tuneyaache! Axaaxoyich qititi no, aabichireeshiye ebi axaaxoona no beeyemmo?

³ Woyee Kiristoos Yesuusina ikkoo tunee afaalleeti no bulli, Kiristoosi qitoona ikkoo tunaꞌa afaalleeto no tunoon ariyaachote?

⁴ Illa Nihoo Yeeri bi oogee yiiroona Kiristoosin qitoochee bi tiijjitoommon, ebiyoommon wotta noonoo bi tiijjaa andire kashoona shaꞌebee no beeyemmoyich, Kiristoosi qitoona ikkoo tunaꞌa no afaalleyoona biinna tookkaa duukkehone.

⁵ Kiristoosi qitoon shaahiibeeti qitoona biinna tookkaa no ikkottetoyee, Yeeri Kiristoosin qitoochee bi tiijjitoommon, ebiyoommon noonoo bi tiijjaa, Kiristoosina tookki ikkottemmo noone.

⁶ Axaaxee gommo waan yeepphiibeeti gonde qaatoo ciroona aallemmoyich, Kiristoosi masqalooch bi yooddehooba, wonnee geene no mullo biinna tookkii yooddeꞌi bi qitoon ariibeeto noone; ebi tuneto ebiyee bekk axaaxoyich no hajjeyaachemmoyichiye.

⁷ Ebiyoo axaaxoo qititi ashoon hajjoo hakkaano bi tunetoyichiye.

⁸ Kiristoosina tookkii qitito no tunegaata, biinna tookki wotta kashechon tuneree beeyemmo no tunoon iberiibeeto noone.

⁹ Kiristoosi qitoochee bi tiyitoyee gubb, illa qitaachemmo bi tunoon, qitoo biin hajjaachemmo bi tunoonoo ariibeeto noone.

¹⁰ Bi qitiyooba, axaaxoo hakkoon bi muccemmoyich tuniiꞌi, ikke wottoon qititone; tunebaani and kashechon tuneree Yeerich beeyemmone.

¹¹ Ebiyoommon ittoshi wotta “Axaaxoyich qitito noone; axaaxoo no toommooch giidoon muccetone; and Kiristoos Yesuusina kashechon tunaꞌa no beeto Yeerichiye” getiree gabibote.

¹² Illa meechi qaatoo ittoshin bi hajjaachemmoyich, qitemmi ittoshi meechi toommooch axaaxoo taataaye.

¹³ Qitoochee tiyiꞌi kashechon tuneꞌi beetoommon, ittoshi qelloon Yeerich giddiibote. Ittoshi ashittinee quumo bullin cadiqee ginee qiicoon tuniiree Yeerich giddiibotalli, xumme mooyon ittoshin bi shuuniyemmoyich, ittoshi ashittinee quumoon ginee qiicoon tuniiree axaaxoyich giddiyaahote.

¹⁴ Ebiyoo axaaxoo ittoshin hajjaachemmo bi tunetoyichiye; hajjeeꞌi ittoshi beeto Yeerichi wojjoyichalli, sheeroyich toonoone.

Cadiqoyich Hajjeeꞌi Beemo

¹⁵ Illa amo tuneba? Yeerichi wojjoyich hajjeebeeto noani, sheeroyich hajjeebeeto tuno no qajjetoyich, axaaxoon shuunebona? Ciroona tuneyaache!

¹⁶ Hajjeyoyich guuno tuniiꞌi ittoshi qelloon biich ittoshi guudiiti ashich guuno ittoshi tunoon ariyaachote? Woyee axaaxee guuno tuneree qitemmo ittoshine; woyee Yeerich hajjeebeeti guuno tuneree cadiqo tunemmo ittoshine.

^17-18 Tunebaani shiichiꞌi axaaxoyich hajjeebeeti guuno ittoshi tunetaanoona, ittoshich icheti doyoochee daneti iberoyich mulloochee tiijjiꞌi ittoshi deꞌa itoyich, axaaxee guuchittinoochee kechiꞌi cadiqoyich ittoshi hajjeetoyich, Yeerich galleto bede.

¹⁹ Asho ittoshi tunoonaa ittoshi shalligee shappee naboona ashi doyee yibbaatoommon gettoye. Wonna ittoshi ashittinee quumeenaꞌo hukkoon boonoshi shuunemmoyich eeꞌoonaa hukkoonoyich guunon tuniiꞌi ittoshi giddiitoommon, ebiyoommon and ittoshi ashittinee quumeenaꞌo Yeerich yaafeetinaꞌo boonoshi tunetoyich, cadiqoyich hajjeebeeti guunon tuniiree giddiibote.

²⁰ Axaaxoyich hajjeebeeti guuno tuneꞌi ittoshi beehooba, cadiqoyich hajjeyaano ittoshine.

²¹ Illa hanaach ittoshi yeelleebeeti mooyinaꞌoochee arooba amee gaacoonolla daneyaano ittoshine. Ebi mooyinaꞌo ciiroochaa qitoochiye boonoshi shakkiibeeto.

²² Tunebaani and axaaxee guuchittinoochee kechiꞌi Yeerich hajjeebeeti guuno tuneto ittoshine; Yeerich yaafeeti gaacecho ittoshine; ebiyoo ciiroochaa bulli yemeenee kashoochiye ittoshin bi shakkiyemmo.

²³ Axaaxoon shuuneti ashich qocheyemmi shumaayoo qitoone; tunebaani no Doono Kiristoos Yesuusina Yeeri wojjemmi wojjoo bulli yemeenee kashoone.