Roomi 5 - Kafa Linguistics Project

Yeeri Aafoochaa Cadiqito Tuno

¹ Illa bi toommooch no mulloon tooꞌiyoona no cadiqitoyee, no Doono Yesuus Kiristoosichi gommona Yeerina tookkii diggoo nooch beetone.

² Yesuus Kiristoosiyoo wotta bi toommooch no mulloon tooꞌiyoona no beeti hini wojjooch noon shakkiiꞌi giijjitone. “Yeerichi oogee yiiroochee qoodeyecho tunemmo noone” getona nooch beeti gibenoona geeciyone.

^3-4 Tunebaani ebi ikkeetona baach toonoone; iritoo haaꞌiyoon, haaꞌiyoo qocee gaawoon, qocee gaawoo gibenoon immemmo bi tunoon ariibee, no iritoonoo wotta geeciyone.

⁵ Nooch icheti Yaafe Ayaanoona Yeeri bi shunoon no mullooch bi ceechitoyich hini gibeno noon yeelliyaache.

⁶ Hakkoon guuteeꞌa no beetaa, Yeeri bi taajjeti yemeenooba Kiristoosi gondeenaꞌoyicha iꞌi qititone.

⁷ Cadiqe ashicha getiree beshe qitemmi ashoon dano oogeton iritoone; deꞌe ashicha getiree beshe qitiya aafoon kupphemmi asho diqqich danemmo tunemmone.

⁸ Tunebaani Yeeri am shaahoon noon bi shunnito gaata xalla bekkiitone: Batt axaaxecho tunaꞌa no beetaa, Kiristoosi noocha iꞌi qititone.

⁹ Ebich and bi damoona cadiqito noone; Kiristoosichi gommonoo Yeerichi kaaree shiixxoochee wodemmo no tuno manjoone.

¹⁰ Yeerichi shixecho tunaꞌa no beetaa, bi bushoochi qitoona Yeerina tookkaa shuneto noone; illa and no shunetoyee gubb, Kiristoosi kashecho bi tunetoyich, wodemmo no tuno manjoone.

¹¹ Tunebaani ebi ikkeeto baach toonoone; and no Doono Yesuus Kiristoosichi gommona no shuneti Yeerina wotta geeciyone.

Addaaminaa Kiristoosinochi Daggooch Beeti Barittino

¹² Illa axaaxoo ikke ashi naboona hini alemooch giyiye; axaaxee naboonoo qitoo giyiye; ebiyoommon wotta asho bulli axaaxoon bi shuunetoyich, qitoo asho bulli toommooch shaggiye.

¹³ Yeeri bi sheeroon Muusichi kishoona bi imoyee shiichiꞌi, axaaxoo hini alemooch beehe; tunebaani sheeroo aalli xaaꞌooch asho bi shuuneti axaaxoo bi toommooch haddeyaanoone.

¹⁴ Tunetaa Addaamichoommon Yeeri gettiti qaaroon boonoshi shaaddo qajjitaanona, Addaamiichee tiijjiꞌi Muusichi yemeenooch beddaahaa, asho bulli toommooch qitoo taatehe. Addaamiyoo woyemmone iꞌi asheenaꞌo quyeti Kiristoosichi shaahiyoone.

¹⁵ Tunebaani Yeerichi wojjoo Addaamichi xuꞌoommon toonoone; ebi are ikke uroochi xuꞌee naboona meetinaꞌo qititinaꞌone; Yeeri immiibeeti wojjoo am shaahoon beshaa beshiꞌi woddete! Ebiyoommon ikke uro Yesuus Kiristoosina Yeeri meetinaꞌoyich wojjoon beshaa beshiiꞌi immitone.

¹⁶ Yeeri wojjoon bi imaa shaggiti mooyo ikke asho axaaxoon bi shuunetaa shaggiti mooyona tookkii tato toonoone. Ikke ashi axaaxee naboona nalloo ashi toommooch kindiꞌi naxoon deebitone; tunebaani meeti asheenaꞌochi axaaxee naboona icheti wojjoo cadiqoon deebitone.

¹⁷ Ikke ashi xuꞌoona qitoo are ikkoochi gommona taatetone; ebi tunegaata, Yeerichi wodde wojjoonaa cadiqee wojjoonon danee beetinaꞌo kashecho tuneree ikke asho Yesuus Kiristoosi gommona am shaahoon beshaa beshiree taateheete!

¹⁸ Illa ikke uro shuuneti xuꞌee naboona Yeerichi naxo asheenaꞌo bulli toommooch bi shaggitoommon, ebiyoommon wotta ikke uro shuuneti cadiqee naboona asheenaꞌo bullin kashechon tuniibeeti cadiqoo danemmone.

¹⁹ Ikke uro Yeerichi getoon bi shaaddetoyich meetinaꞌo axaaxechinaꞌo tunetoommon, ebiyoommon wotta ikke uro Yeeri gettiton bi ceechitoyich meetinaꞌo cadiqeenaꞌo tunemminaꞌone.

²⁰ Wotta xuꞌo woddemmoyich Muusichi Sheeroo daakkeeꞌi ichehe; tunebaani axaaxoo woddehooba, Yeerichi wojjoo beshaa beshoon woddehe.

²¹ Illa axaaxoo qitee gommona bi taatetoommon, wotta Yeerichi wojjoo no Doono Yesuus Kiristoosichi naboona Yeeri nooch immiibeeti cadiqee gommona bulli yemeenee kashooch yaabiibee taatee beetone.