Roomi 4 - Kafa Linguistics Project

Abrahamichi Shaahiyoo

¹ Illa meenona no qaabbecho tuneti Abrahami ebi mooyoyich amoon danete getote?

² Abrahami bi shuuneti shuunoona bi cadiqito gaata, bi geecemmi mooyo beeyeshone; tunebaani Yeeri aafooch biin geeciyemmi mooyo biich aalloone.

³ Yaafe Macaafoochaa ama getteete? “Abrahami mulloon Yeeri toommooch tooꞌiihe; ebi bi mullee tooꞌiyoo Yeeri aafoochaa biin cadiqiihe” getteetone.

⁴ Shuuneebeeti ashich qocheebeeti shumaayoo bi hiishoommoani, wojjoommo tuniitaa haddeyaache.

⁵ Tunebaani amoonolla shuuneyaanoon, axaaxechon cadiqiibeeti Yeeri toommooch bi mulloon tooꞌiiti ashich, Yeeri ebi bi mullee tooꞌiyoon cadiqoo tuniiꞌi haddiye.

⁶ Ebiyoommon Daawiti wotta shuunoona tuneyaanoon, Yeeri cadiqo tuniiꞌi bi hadditi asho diireeto tuneechon ishichii gettitone:

⁷ “Boonoshi shuuneti hukkoon Yeeri maaritti asheenaꞌo, boonoshi axaaxoonoo Yeeri oppeti asheenaꞌo, diireetinaꞌone;

⁸ Doono bi axaaxoon cir haddaachemmi asho diireetone” itone.

⁹ Illa ebi Daawiti gettiti diiroo dokireetinaꞌoyich baachiye? Toonoone. Dokireyaaneenaꞌoyichoonane. Ebiyoo Yaafe Macaafoochee ta gettetoommon, “Abrahami Yeeri toommooch mulloon bi tooꞌiyoo Yeeri aafoochaa biin cadiqiihe.”

¹⁰ Am shaahe gommona biin cadiqiihe? Dokiree bi iichaanane woyee dokireyaan bi beeteenane? Dokiree bi iichaa toonoone; dokireyaan bi beetenane.

¹¹ Dokireyaan beebee, mulloon Yeeri toommooch bi tooꞌitoyich cadiqoon danehe. Aroyee gubboo bi dokireyoo bi cadiqoon miixeebeeti malletoo tunehe. Ebich boonoshiyoo wotta cadiqeenaꞌo tuneree boonoshi haddeyemmoyich, dokireyaanoon mulloon Yeeri toommooch tooꞌii beetinaꞌo bullich nihoone.

¹² Dokireetinaꞌoyichoo nihoone. Ebiyoo boonoshi dokireetoyich tuneyaanoon, no nihoo tuneti Abrahami dokireyaan beebee, mulloon Yeeri toommooch bi tooꞌiitoommon, mulloon boonoshi tooꞌitoyichiye.

¹³ Abrahaminaa bi yareenaꞌonoyich “Alemoon woraashemmo ittoshine” iꞌi Yeeri gibenikkitone. Ebi gibenoon Yeeri gibenikkito, Abrahami Yeeri toommooch mulloon bi tooꞌiyoona bi cadiqitoyichalli, Muusichi Sheeroon ceechii bi quyetoyich toonoone.

¹⁴ Sheeroon ceechitinaꞌo Yeeri gibenikkiti gibenoon danemminaꞌo boonoshi tunegaata, Yeeri toommooch mullee tooꞌiyoo duubo tunete getone; Yeeri gibenikkiti gibenoo duubo tunete getone.

¹⁵ Sheeroo Yeerichi kaaree shiixxoon deebiye; tunebaani sheeroo aalloon sheeree shaaddo aalloone.

^16-17 Ebich sheeroyich hajjeeꞌi beetinaꞌo ikkeetinaꞌoyich baach tuneyaanoon, Abrahamichoommon mulloon tooꞌiiti bi yareenaꞌo bullich wotta gibenee qaaro manjemmoyich, are gibenoo Yeerichi wojjoommo bi tunemmoyich, Yeeri toommooch mullee tooꞌiyoonane bi daneebeeto. Ebich biyoo “Meeti aageteenaꞌoyich nihoon neen tuniihoye” getaa bi kooreetoommon, qititinaꞌoyich kashoon immiibeeti, aalloonoo beeto tuniiꞌi neechiibeeti, bi toommooch mulloon bi tooꞌiiti Yeeri aafoochaa no bulli nihoone.

¹⁸ “Ne yaroo ebiyoommon meettemmone” getaa Yaafe Macaafooch bi kooreetoommon, gibeno aalli xaaꞌooch gibeneꞌi iberiihe; ebina meeti aageteenaꞌochi nihoo tunehe.

¹⁹ Balle natt bedd bedditi geeno bi tunetaanoona, qititoommo tuneti bi ashittinoonaa shuuqqiti Saarichi maacoonon gabiꞌi Yeeri toommooch mulloon tooꞌiyoochee gubb wotteyaanoone.

^20-21 Yeerich oogoon immiibee, Yeeri biich gibenikkiti gibenoon ceechemmo bi tunoon xiishiꞌi mullee tooꞌiyoona kupphehalli, ibariyaache getona Yeeri gibenikkiti gibenee qaaroyich axiraacheyaanoone.

²² Ebichiye [wotta] “Yeeri toommooch mulloon bi tooꞌiyoo Yeeri aafoochaa biin cadiqiihe” bi getteeto.

²³ Tunebaani Yaafe Macaafooch “Yeeri aafoochaa biin cadiqiihe” getteeti qaaro bi kooreeto Abrahamich baach toonoone;

^24-25 noochoonane bi kooreeto. No xuꞌee naboyich qitoyich beshiitaa icheti, noon cadiqiyoyich tiyiti no Doono Yesuusin qitoochee tiijjiti Yeeri toommooch no mulloon tooꞌiibeeti noonoo cadiqiiyane.