Roomi 3 - Kafa Linguistics Project

¹ Illa Ayihudee asho tunee gaaco amoone? Woyee dokireyee gaaco amoone?

² Bulli gommona oogeti gaacechone. Shiichiꞌi Yeeri boonoshin gibeneꞌi bi qaaroon immitone.

³ Illa boonoshi daggoochee ikkikkeenaꞌo Yeeri toommooch mulloon tooꞌiyaaneenaꞌo boonoshi beegaatochi, boonoshi mullee tooꞌiyee qayo Yeerichi gibeneyoon echiyehe?

⁴ Ciroona echiyaache. “Ne noonoochee kechiibeeti qaaroona cadiqo ne tuno asho bullich bekkemmone; neenna taggee beetinaꞌon xoobiyemmo neene” getaa bi kooreetoommon, asho bulli kooto bi tunetaanoona, Yeeri iberoone.

⁵ Tunebaani no gondittino Yeerichi cadiqittinoon beshii bekkiibeeto bi tunegaata, ama gettehone? Yeeri kaaree shiixxoon no toommooch bi deebigaata, tato toonoone getone? Ashi doyee yibbaatoommon ishichiyoye.

⁶ Ciroona toonoone! Ebi bi tunemmo gaata, Yeeri alemeexi ashi toommooch bi nallemmo aabichireeshiye?

⁷ Ta kootteti kootoona Yeerichi iberittino bi oogoyich beshi bekkemmo bi tunegaata, axaaxechon tuniiree ta toommooch bi nallemmo amoyichiye?

⁸ Wotta ikkikkeenaꞌo “Gaawe mooyo woyemmoyich gondoon shuunebone” ii beeton shaahiiꞌi no shigoon gondii beetinaꞌone. Eboshi toommooch kindemmi nalloo tatoone.

Asho Koniyoona Cadiqo Tunee Bi Qayo

⁹ Illa amo tuneba? Ayihudo no, Ayihudo tuneyaaneenaꞌoyee besho noone? Ciroona toonoone. Ayihudeenaꞌoo, Ayihudo tuneyaaneenaꞌoo bulliyona axaaxoyich hajjeeꞌi beetinaꞌo boonoshi tunoon shiichaꞌa bekkiito noone.

¹⁰ Ishichaa bi kooreetoommon, “Cadiqo aalloone; ikkolla aalloone;

¹¹ shalligiibeeto aalloone; Yeerinoo qaawiibeeto aalloone.

¹² Yeerichi gommoochee badd wottetinaꞌone; ikkittinoona duubetinaꞌone; gaaweton shuuneebeeto aalloone; ikkolla aalloone.

¹³ Boonoshi noonoochee kechiibeeto ashi kashoon kichiibeeti qaaroone; boonoshi heciyoona dawushiyeete; xekeree qoppaa wuxoommon, boonoshi heciyoona qoppiyeete.

¹⁴ Boonoshi noonooch ufonaa caamoona ceennitone.

¹⁵ Boonoshi baatoo ashi damoon ukkoyich afaafinee beetone;

¹⁶ boonoshi hammiibeeti gommo bulli aalliyoonaa iritiyoonane.

¹⁷ Diggee gommonoo ariyaaneenaꞌone.

¹⁸ Yeerin shato boonoshi aafooch aalloone.”

¹⁹ Asho bulli noonoo bi wochaachemmoyich, alemo bulli toommooch Yeeri nallemmoyich, Muusichi Sheerooch kooreeto bulli ebi are sheeroyich hajjee beetinaꞌoyich gettiibeeto bi tunoon ariyaabeeto noone.

²⁰ Ebich asho koniyoona sheeroon quyoona Yeeri aafooch cadiqaache; ebiyoo ebi sheeroo asho bulli axaaxecho bi tunoon bi arichii beetoyichiye.

Ashoon Yeeri Cadiqiibeeti Gommo

²¹ Tunebaani and Muusichi Sheeroonaa keemechinaꞌona miixeeti, Yeer waanee daneebeeti cadiqoo bekketone; ebi cadiqoo Muusichi Sheeroon ceechii quyoona danemmo toonoone.

²² Aroo Yesuus Kiristoosi toommooch mullee tooꞌiyoona Yeer waanee danemmi cadiqoone. Boonoshi mulloon Yesuus Kiristoosi toommooch tooꞌii beetinaꞌo bullin Yeeri cadiqiyemmone. Barittino aalloone;

²³ asho bulli axaaxoon shuunetone; bi toommoochoo beeti Yeerichi oogee yiiroon aalliitone.

²⁴ Yeeriyoo axaaxoochee biisheebeeti Kiristoos Yesuusina, baad cikki bi wojjoona boonoshin cadiqiyemmone.

²⁵ Ufeti Yesuus Kiristoosichi damoona asho bi axaaxoyich maaroon bi danemmoyich deejjoon tuniiꞌi Yeeri neechiye; ebi maaroon dano asho hakkemmo, Yesuus Kiristoosi toommooch mullee tooꞌiyoonane. Yeeri ebin bi tuniito bi cadiqittinoon bekkiyoyichiye. Yeeri ebiyee aaf asho shuuneti axaaxoon haaꞌiyoona beshiitone;

²⁶ tunebaani and hini yemeenooch bi cadiqittino bekkemmoyich, Yeeri bi qelloona cadiqo bi tunoon, bi mulloon Yesuus Kiristoosi toommooch tooꞌiibeeto bullinoo cadiqiibeeto bi tunoon bekkii beetone.

²⁷ Illa asho geecemmi mooyo aaye? Echetone. Amee naboona? Muusichi Sheeroon ceechoonane? Toonoone. Yesuus Kiristoosi toommooch mullee tooꞌiyoonane.

²⁸ Ebich asho Muusichi Sheeroon ceechoona tuneyaanoon, Kiristoosi toommooch mulloon tooꞌiyoona cadiqemmo bi tunoon beeggaabeeto noone.

²⁹ Halla Yeeri Ayihudeenaꞌo ikkeetochi Nuggishoo baachiye? Aageteenaꞌoyichoo wotta Nuggishoo toone? Eeha, boonoshich wotta Nuggishoone.

³⁰ Ebiyoo dokireeti Ayihudeenaꞌon Kiristoosi toommooch mulloon tooꞌiyoona, dokireyaani Aageteenaꞌonoo Kiristoosi toommooch mulloon tooꞌiyoona cadiqiibeeti ikke Nuggishoo baach beetoyichiye.

³¹ Illa Yesuus Kiristoosi toommooch no mulloon tooꞌiyoona Yeerichi sheeroon echiyaabeeto noone? Toonoone. Sheeroon manjiihonalli echiyaachone.