Roomi 16 - Kafa Linguistics Project

Phawuloosichi Diggiyoo

¹ Kenkiriyi kittinnee guuphi daggooch maddechi tuneti no manee Feebenin ittoshich adereto taane.

² Kittinneenaꞌo yaafeenaꞌon iibbii beetoommon, biinoo wotta ittoshi iibbiyemmoyich ittoshich shalligichaabeeto taane. Biyoo meetinaꞌon deggaabeeti, taachoo dege tuneti maneene. Ebich ittoshiyoo wotta biich qaawiibeeti mooyo bullina biin degote.

³ Kiristoos Yesuusichi shuunoon taanna tookkii shuuneebeeti Phirisqilinaa Aqilinoyich ta diggiyoon getote.

⁴ Boonoshiyoo boonoshi kashoonolla aaxxiyaanoon taach qitiya kuxxiti asheenaꞌone; ta ikkeeto baach tuneyaanoon, wodde xaaꞌoona corootoyich kiceebeeti aagetee kittinnee guupho bulli naadiibeeti asheenaꞌone.

⁵ Ebi Phirisqilinaa Aqilinochi kexooch kiceebeeti kittinnee guuphoyich ta diggiyoon getote. Isiyee showoochee Kiristoosi toommooch mulloon tooꞌiyoona qaabboo tuneti, ta shunnaabeeti Aphenexoosich ta diggiyoon getote.

⁶ Ittoshicha iyaꞌa woddoon aajjeti Maariyamich ta diggiyoon getote.

⁷ Mishiraachechinaꞌo daggoochee woraafa getteetinaꞌo, wotta Kiristoosi toommooch mulloon tooꞌiyoona tayee qaabbeenaꞌo, taanna tookkii cucheti ta xibeenaꞌo Andironiqoosinaa Yuniyasinoyich ta diggiyoon getote.

⁸ Doonona ta shunnaabeeti Amiphilaxoosich ta diggiyoon getote.

⁹ Kiristoosina, noonna tookkii shuuneti Uribaanoosich, ta shunnaabeeti Istakoosich ta diggiyoon getote.

¹⁰ Kiristoosich bi gibeneyoo miixeeꞌi naadeeti Apheleesich ta diggiyoon getote. Arixobuloosichi kechi asheenaꞌoyich ta diggiyoon getote.

¹¹ Ta xiboo Herodiyoonich ta diggiyoon getote. Narisusi kechi asheenaꞌo daggoochee boonoshi mulloon Doono Yesuusi toommooch tooꞌiitinaꞌoyich ta diggiyoon getote.

¹² Doono Yesuusich maddoona aajjiibeeti Tirufiininaa Tirufoosinoyich ta diggiyoon getote. Doono Yesuusich shuunoona oogeton aajjeti, shucheti no manee Fersisich ta diggiyoon getote.

¹³ Doono Yesuusina kaacheti Rofoosich, bi hajjee bushoon tuniiꞌa taan deggeti bi indeyichoo ta diggiyoon getote.

¹⁴ Asinkiriteesinaa Filigooninoyich, Herimenichoo, Fatirobaasichoo, Herimaasichoo, boonoshina tookkii beeti kittinnee maneenaꞌo bullichoo ta diggiyoon getote.

¹⁵ Filologoosinaa Yuuliyinoyich, Neeriyinaa bi maneenoyich, Olumifaasich, boonoshina tookkii beeti yaafeenaꞌo bullichoo ta diggiyoon getote.

¹⁶ Yaafeeti gommona shumeyoona ittoshinaa ittoshina ikkoo baroon diggiibe. Kiristoosichi kittinnee guuphi asheenaꞌo bulli ittoshin diggii beetinaꞌone.

Ciiroochaa Phawuloosi Gettiti Mooyinaꞌo

¹⁷ Illa ta maneenaꞌote! Ittoshi doyiti doyoon shixona ashoonaa ashoonochi daggooch barbarittinoon hallii beetinaꞌo waanee, xugo tuneebeeti asheenaꞌo waaneenoo ittoshi qelloon ittoshi quyemmoyich ittoshin qollaabeeto taane; eboshi waanee baribote.

¹⁸ Ebiyoommi asheenaꞌo boonoshi maacoyich baachalli no Doono Yesuus Kiristoosich hajjeyaaneenaꞌone; gaaweto shaahii beetonaa maanjee yibbaatoona diqqe asheenaꞌochi mulloon dachii beetinaꞌone.

¹⁹ Mishiraachee qaaroyich ittoshi deꞌa geto asho bullich waayeetone. Ebich ittoshi mooyo taan emirikkitone; gaawe mooyon shuunoyich ariyechon, gonde mooyon shuunoyich tuushoon ittoshi tunemmoyich shunnoye.

²⁰ Diggee Nuggishoo Sheexaanoon kaate yexi dichiree ittoshi baatee dechiich yiikkemmone. No Doono Yesuus Kiristoosichi wojjoo ittoshina tookki tunebe.

²¹ Taanna tookkii shuuneebeeti Ximootiyoosi, ta xibeenaꞌo Luqiyoosinaa Yaasoonina, Sosiphaxiroosiyoo ittoshin diggii beetinaꞌone.

²² Hini wochoon Phawuloosi getaa kooriti Xerixiyoosi tawoo Doono Yesuusina ittoshin diggiibeeto taane.

²³ Taannaa kittinnee guupho bullinon iibbiibeeti Gaayoosi ittoshin diggii beetone. Hini katemee araaqee iraashoo Erasxoosi, no manoo Qarixoosiyoo ittoshin diggii beetinaꞌone.

²⁴ [No Doono Yesuus Kiristoosichi wojjoo ittoshi bullina tookki tunebe. Ameena.]

Yeerin Phawuloosi Galleto

^25-26 Bulli yemeenee Nuggishoo wonnee yemeenoochee tiijjiꞌi aachaa yagiti mooyon “and galleebe” itone. Ebich keemechinaꞌo boonoshi kooriti macaafoochaa xallayii gettitinaꞌone; aageteenaꞌoo boonoshi mulloon Yesuus Kiristoosi toommooch tooꞌiiree biich deꞌa boonoshi gettemmoyich waayeꞌi ariitinaꞌone. Illa ta gettaabeeti mishiraachoommona Yesuus Kiristoosicho getteebeeti wochoommon ittoshin kupphiyoon hakkemmi,

²⁷ bi ikkeeto baach ariyecho tuneti Yeerich Yesuus Kiristoosina bulli yemeenoon oogee yiiroo tunebe. Ameena.