Roomi 14 - Kafa Linguistics Project

Bi Manoo Toommooch Nallee Qayo

¹ Illa ittoshi daggoochee Kiristoosi toommooch mulloon tooꞌiyoona batt kuppheyaani asho bi beegaata, shiqqiyaahote; bi gabiibeeti gaboyich gajjiteyaahote.

² Ikke asho amee mooyonona bi maayemmoyich daaggeeto bi tunoon iberiibeeto beetone; tunebaani mullee tooꞌiyoona kuppheyaano amee meenonolla maataache.

³ Ebich maabeeto maataache iꞌi qajjiton qallayaaye; maataache iꞌi qajjito maabeeto toommooch nallaaye. Ebiyoo Yeeri biin shiqqiiꞌi qayaano bi tunetoyichiye.

⁴ Haano, bare ashi aafee bushoo toommooch nallaa beetocho, ne koni neene? Aroo bi neexegaata woyee bi dihigaata bi hajjee doonochiye. Tunebaani Yeeri biin neechoon hakkemmo bi tunetoyich neexemmone.

⁵ Ikke areddoo bare areddoyee beshoon tuniiꞌi gabiibeeti asho beetone; areddoo bulli barbaraano, ikkoo baach bi tunoon gabiibeeti asho beetone. Ebiyoommi mooyinaꞌon bi ikkikkoo bi qelli qellee gaboona manjiiree ariibe.

⁶ “Ikke areddoo bare areddoyee beshoone” iꞌi oogiibeeti asho Doonoyicha iꞌi oogiihe. “Amee mooyonona ta maagaata taach daaggeetone” iꞌi maabeeto Yeerin bi galletee beetoyich, Doonoyicha iꞌi maahe. Maataache iꞌi qajjiibeeto Doonoyicha iꞌi qajjiye; Yeerinoo galletehe.

^7-8 Kashoona no beetaa, Doonoyicha iyaꞌa beehone; no qititeenoo Doonoyicha iyaꞌa qitiyone. Ebich no daggoochee ikkolla bi qellich baach beetaache; bi qellich baach qitaache. Illa kashoona no beetaa woyee no qititaa, Doonocho noone.

⁹ Ebiyoo qititinaꞌonoo kashechinaꞌonoo biicho tuniiree hajjoyich Kiristoosi qititoyichiye; wotta qitoochee bi tiyitoyichiye.

¹⁰ No bulli Yerichi nallee gabberee aafooch neexemmo noone. Ebich ne manoo toommooch amoyichiye ne nallaabeeto? Newochi wotta ne manoon amoyichiye ne qallayaabeeto?

¹¹ “Doono Yeeri ishichiye: ‘Beeyecho taane; ashi gutenoo bulli taach goyinnemmone; ashi heciyoo bulli Yeeri ta tunoon miixemmone’ itone” getaa Yaafe Macaafooch kooreetone.

¹² Illa no ikkikkoo no qelli qelli shuuneechon Yeeri aafoochaa echeeree wochemmo noone.

Bi Manoon Xugo Tuneꞌi Yexxii Dichee Qayo

¹³ Illa hanaachina ikka getiree noonnaa noonna ikkoo baroo toommooch nalloon qaye. Ebiyeenoo wotta kittinnoo tuneti ikke bi manoon axaaxooch yexi dichemmi mooyon gedoochee no qelloon quyebone.

¹⁴ Bi qelloona eeꞌo tuneti mooyo amolla aallo bi tunoon Doono Yesuusina tunaꞌa xiishaa ariito taane; tunebaani eeꞌoone iꞌi gabiibeeti are ashoyich eeꞌoone.

¹⁵ Kittinnee ne manoon ne maabeeti maayi naboona ayinikkaabeeto ne tunegaata, illa biin shunaano ne tunoon ne shuunaabeeti mooyona bekkiibeeto neene. Biicha iꞌi Kiristoosi qititi asho ne maabeeti maayi naboona bi aalleyaachemmoyich ne qelloon ariibe!

¹⁶ Illa gaawetone iꞌi ittoshi shuuneebeeti mooyo naakkeyaachemmoyich ittoshi qelloon ariibote!

¹⁷ Ebiyoo Yeerichi taatittino cadiqoonaa diggoona, Yaafe Ayaanoochee tuneti emiroonalli, maayoonaa uyoonochi mooyo tuno bi qajjitoyichiye.

¹⁸ Ebiyoommon tuniyoona Kiristoosich hajjeebeeti asho Yeerin emirikkii beetone; ashoonoo naadee beetone.

¹⁹ Illa ebi tunegaata, diggoo halleyemmi mooyon, noonnaa noonnonoo eenniyemmi mooyon dabbibone.

²⁰ Maayi naboona Yeerichi shuunoon happiyaahine. Maayo bulli xalloone; tunebaani maayoon ne mami naboona bare asho dihemmoyich ne tuniigaata, ebi tato toonoone.

²¹ Meenon mami qayo, woyinee uyoon uyi qayo, bare ashoon xugo tuneree yexi dichemmi mooyon tuniyee qayoo gaawetone.

²² Ebi mooyoyich ne gabaabeeti gaboo neennaa Yeerina daggooch baach tunebe. Gaawetone iꞌi bi tuniibeeti mooyoyich bi mullo biin ittibateyaani asho diireetone.

²³ Tunebaani bi mulloona axiraacheebee bi maagaata, gaawetone iꞌi iberiyoo bi qajjitoyich, Yeeri bi toommooch nallitone. Gaawetone iyaꞌa no iberiyaani mooyon no shuunegaata, axaaxoone.