Roomi 13 - Kafa Linguistics Project

Iraasheenaꞌoyich Deꞌa Geto

¹ Asho bulli biyee damba tuneti iraasheenaꞌoyich deꞌa gete. Ebiyoo Yeeri daaggaanoon iraashittino aallo bi tunetoyich, qeejjiibeeti iraasheenaꞌonoo iraashiito Yeeri bi tunetoyichiye.

² Ebich iraashoyich deꞌa getaache ii beeto Yeeri neechiti doyooniye deꞌa getaache bi ii beeto; ebi are deꞌa getaache ii beetinaꞌo boonoshi toommooch nalloon deebemminaꞌone.

³ Ukkireenaꞌo gondoon shuunee beetinaꞌonalli, deꞌoon shuunee beetinaꞌon shattii beetinaꞌo tooneenaꞌone. “Iraashoon shataache” geton ne qaawigaata, illa gaaweton shuunebe. Bi waanee galletoon danemmo neene.

⁴ Neech gaaweti mooyon bi tuniyemmoyich Yeerichi maddechone. Goraadoon bi cuyeto baad toonoone; ebich gondoon ne shuunegaata, shate. Gondoon shuunee beetinaꞌo toommooch naxoon kindiibeeti Yeerichi maddechone.

⁵ Ebich naxoon ne shattetoyich baach tuneyaanoon, wotta ne mullo neen bi ittibateyaachemmoyich iraasheenaꞌoyich deꞌa gete.

⁶ Wotta ebi shuunoona kuppheebeeti, Yeerichi maddechinaꞌone; ebich boonoshi echeebeeti gibiroon qocciibeeto ittoshine.

⁷ Bullich tun bedoon tuniibote; gibiro echemmoyich gibiroon, qaraxo echemmoyich qaraxoon qocote; shatteya bedoon shatote; oog bedoon oogiibote.

Biinnaa Biinna Shuno

⁸ Biinoommi bi manoon shunniibeeto sheeroon ceechitone; ebich ittoshinaa ittoshina shunoyee beshetaa konichi hiisholla ittoshi toommooch beeyaaye.

⁹ “Shunoon maayaahine; ashoon wuxiyaahine; gaajjaahine; ashicho tuneton qaatiyaahine” ii beeti sheeroonaa bare sheeroo bullina “Neenoommi ne manoon neenna tachiree shune” ii beeti qaaroona taccetone.

¹⁰ Ashoon shunniibeeto bi manoon xuꞌaache. Ebich ashoon shuno sheeroo bullin ceechoone.

¹¹ No wodee aabo, mulloon Kiristoosi toommooch no tooꞌiiti aaboyee beshoon and no waan katinnitone. Ebich tokketoochee no tiyemmi saato and shaggito bi tunoon, yemeenoon ariibote.

¹² Xumo beshetaa areddoo harii bekketoommone. Illa manderee shuunoon shooti dufiichi, bekkee ginee qiicoon cuyebone.

¹³ Areddee bekkoona shaꞌeebeeti asheenaꞌochoommon gaawe qocoona beebone; qelloon battiibeeti duubonaa mashoona tunaaye; shunee mamonaa yeelliibeeti kaayona tunaaye; kaaroonaa qanaatoona tunaaye.

¹⁴ Tunebaani Doono Yesuus Kiristoosin qoreddoochoommon tahebote; meeno qaatiibeeti mooyon ceechiya meenoyich gaboon qayote.