Roomi 12 - Kafa Linguistics Project

Yeerich No Maddemmi Kittinnee Qoco

¹ Illa ta maneenaꞌote! Ittoshi ashittinoon Yeerin emirikkiibeeto, yaafoonaa kashechi deejjoonon tuniiree biich ittoshi giddiyemmoyich Yeerichi ariqqoona ittoshin qollehoye; ebiyoo Yeerich ittoshi goyinnemmi tunibede gommone.

² Gaawetonaa biin emirikkii beetona, shappaalloonoo tuneti Yeerichi daaggoon xiishii ariyoon ittoshi hakkemmoyich, Yeeri andire mulloon bi imaa andirebotalli, hini alemeexi asheenaꞌochi mooyon dabbiyaahote.

³ Yeeri taach immiti wojjoona ebin ittoshi bullich gettaabeeto taane: Yeeri bi ikkikkoyich bi immiti mullee tooꞌiyoommon tachiree gabiballi, “Ta besh taane” geti geecoona gabaaye.

⁴ Ikke ashittinooch meeti quumeenaꞌo beetinaꞌone; tunebaani quumeenaꞌo bullichi shuunoo ikkoo toonoone.

⁵ Ebiyoommon no wotta meeto tunaachaa Kiristoosina ikke ashittino noone; noonnaa noonna no ikkikkoo bareenaꞌochi quumo noone.

⁶ Yeeri nooch immiti wojjoommon baribare wojjoo nooch beetone; keemoon keemmi wojjoo bi tunegaata, no mullee tooꞌiyoommon keemoon keembone.

⁷ Kittinneenaꞌon dego bi tunegaata, kittinneenaꞌon degona kupphebone; dojjoo bi tunegaata, dojjoona kupphebone.

⁸ Ciico bi tunegaata, ciicona kupphebone; imo bi tunegaata, mulloochee tiijjiree imbone. Kittinneenaꞌon yaabiibeeti asho bi tunegaata, kuppheree yaabibe; bareenaꞌoyich ariqqeebeeto bi tunegaata, emiribee deꞌittinoon bekkiibe.

⁹ Ittoshich beeti shuno qettoyee damboo tunaaye. Gonde mooyon tiyaarebote; gaawe mooyona tookki ikkottebote.

¹⁰ Manaamanoochoommon ittoshinaa ittoshina shunebote; ittoshinaa ittoshina ikkoo baroon oogiibe.

¹¹ Ittoshi shuuneebeeti shuunoona kupphebotani beeneyaahote; qeeci mulloona Doonoyich maddebote.

¹² Gibeno ittoshich beetoyich emiribote; iritoon haaꞌiibote; corootoona kupphebote.

¹³ Muccee iriteeti kittinnee maneenaꞌoyich ittoshich beetoochee qoodibote; iibbeenaꞌon iibbiyoyich kupphebote.

¹⁴ Ittoshin duꞌii beetinaꞌon Yeeri diiremmoyich qollebotalli, uppaahote.

¹⁵ Emirii beetinaꞌona tookki emiribote; eeppii beetinaꞌona tookki eefote.

¹⁶ Ittoshinaa ittoshina ikke mulloona ikkottebote; qellee oogiyee mooyon gabiyaahote; tunebaani qallayeetinaꞌona tookki ikkittinoona beebote. “Mullecho taane” getiree naadeyaahote.

¹⁷ Konichona gondoochi keroon gondoon wochiyaahote; asho bulli aafooch gaaweto tuneti mooyon gabibote.

¹⁸ Asho bullina tookkii diggoona beemoyich ittoshich hakkeeto bullin tuniibote.

¹⁹ Ta shunechinaꞌote! Nichoon kichiyaahote. “ ‘Gondoon shuunetinaꞌo toommooch nichoon kichemmo taane; bareenaꞌon boonoshi xuuxiitoommon ta wochiree boonoshin xuuxiyemmo taane’ itone Doono Yeeri” getaa Yaafe Macaafooch kooreetone. Ebich Yeerich bulliibote.

²⁰ Ebiyeenoo, “Ne etto shaacegaata, maanjibe! Bi shachewegaata, uchibe! Ebin tuniyoona bi toommooch qaaqqee bunoon shookkemmo neene.”

²¹ Gondoon deꞌoona wochiballi, gondo neen koyi wochaaye.