Roomi 10 - Kafa Linguistics Project

¹ Ta maneenaꞌote! Ta yaroo tuneti Israꞌeelee macceenaꞌo wodoon boonoshi danemmoyich oogeton qaataabeeto taane; corootaanoo beeto taane.

² Shalligiꞌi qanaateyaacheetani, Yeerich boonoshi qanaatoon ta boonoshich miixoo taane.

³ Ashoon Yeeri aabichiree bi cadiqiyemmo gaata tuushiichii, boonoshi qelli shuunoona cadiqoyich qaawiꞌi Yeer waanee daneebeeti cadiqoyich hajjeyaaneenaꞌone.

⁴ Boonoshi mulloon bi toommooch tooꞌii beetinaꞌo bulli cadiqemmoyich Kiristoosi sheeree tacone.

Asho Koniyoona Wodoon Hakkemmo Tuno

⁵ Sheeree gommoona daneebeeti cadiqeechon Muusi ishichiꞌi kooritone: “Sheeroo gettii beeton ceechiibeeti asho ebi sheeroona kashoon danemmone” itone.

⁶ Tunebaani Yeeri toommooch mullee tooꞌiyoona daneebeeti cadiqeechon Yaafe Macaafo ishichiye: “Ne mulloona ‘Koni shimaayooch kechehe?’ gettaahine” iye; ebiyoo Kiristoosin kindiiyane;

⁷ “woyee ne mulloona ‘Ciiraalli hoonooch koni kindehe?’ gettaahine” iye; ebiyoo Kiristoosin qitoochee tiijjiyane.

⁸ Tunebaani Yaafe Macaafo ama ite? “Yeerichi qaaro neyee wokkito toonoone; halla ne noonoonaa ne mulloonoochiye” itone. Ebiyoo no gettaabeeti, Yeeri toommooch mullee tooꞌiyee qaaroone.

^9-10 Asho bi mulloon Yesuus Kiristoosi toommooch tooꞌiiꞌi cadiqiye; bi noonoonoo miixeꞌi wodiye. Ebich “Yesuusi Doonone” iyaꞌa ne noonoona ne miixee gaata, Yeeri qitoochee biin bi tiijjoonoo ne mulloona ne iberiigaata, wodemmo neene.

¹¹ Yaafe Macaafo “Bi toommooch mulloon tooꞌiimmo koniyoona yeelleyaachemmone” itone.

¹² Ayihudoonaa Aagetoonochi daggooch barbarittino aalloone; ikke Doono bullichi Doonone. Corootoonoo biin qollee beetinaꞌo bullich beshaa beshiiꞌi immii beetone.

¹³ Ebiyoo “Doono Yeerichi shigoon ceeggiibeeto bulli wodemmone” bi getteetoyichiye.

¹⁴ Illa bi toommooch mulloon tooꞌiyaaneenaꞌo aabichiree ceeggeheete? Biichon getaa waayeyaanoon aabichiree boonoshi mulloon bi toommooch tooꞌiyeheete? Gettecho aalloon aabichiree waayeheete?

¹⁵ Wocheyaanoon aabichiree getteheete? Ebiyoo “Mishiraachee qaaroon gettiibeeti asheenaꞌochi womo am shaahoon emirikkitone” getaa bi kooreetoommoniye.

¹⁶ Tunebaani bulliyoo mishiraachee qaaroyich deꞌa getaaneenaꞌone. Keemechi Isiyaasi, “Doono Yeero, no miixeton koni iberiite?” itone.

¹⁷ Illa Kiristoosi toommooch mullee tooꞌiyoo daneebeeto, Kiristoosichon getaa waayoonane.

¹⁸ Tunebaani “Wochoon waayeyaaneenaꞌone?” iyo. Waayetinaꞌone. Yaafe Macaafooch bi kooreetoommon, “Wocheyechinaꞌochi qaaro, alemo bullich waayeehe; boonoshi gettiti qaaro, showee tuggooch beddaahaa shaggiye.”

¹⁹ Daakkaꞌa wotta, “Israꞌeeleenaꞌo ariyaaneenaꞌone?” iyo. Muusi shiichiꞌi, “Yeeri ‘Hoxeeti aageteenaꞌona ittoshin qanaatiyemmo taane; shalligaani aageteenaꞌonoo ittoshin ippiyemmo taane’ itone” iye.

²⁰ Keemechi Isiyaasi aafoon kuppheꞌi, “Yeeri ‘Taan qaawaaneenaꞌoyich danehoye; taachon echeyaaneenaꞌoyich bekkehoye’ itone” iye.

²¹ Tunebaani Israꞌeeleenaꞌochon, “Yeeri ‘Maaddoochee xum beddaahaa taach deꞌa getaani hukkechi asheenaꞌoyich ta kishoon yaggiyoye’ itone” iye.