Roomi 1 - Kafa Linguistics Project

^1-2 Keemechinaꞌochi noonoona Yaafe Macaafooch shiichiꞌi gibenikkiti Yeerichi mishiraachee qaaroyich baraꞌa kaacheto, mishiraachecho tunoyich ceekketo, Yesuus Kiristoosichi guuno Phawuloosi taane.

^3-4 Ebi mishiraachoo Daawiti yaroochee meenona shiijjeti, yaafittinee Ayaanoona qitoochee bi timona Yeerichi Bushoo bi tuno ooge giidoona bekketi, Yeerichi Bushoo no Doono Yesuus Kiristoosichone.

⁵ Aageteenaꞌo bulli daggoochee boonoshi mulloon Kiristoosi toommooch tooꞌiiree biich deꞌa gettemminaꞌo danemmoyich, Yeeri Kiristoos waanaa mishiraachecho tuneree Kiristoosicha getiree ta shuunemmoyich, wojjoon taach immiye.

⁶ Ebi aageteenaꞌo daggoochee ittoshiyoo wotta Yesuus Kiristoosicho ittoshi tunemmoyich ceekketo ittoshine.

⁷ Yeerina shucheti, yaafoo ittoshi tunemmoyich Yeerina ceekketi, Room beeti ittoshi bullich: No Nihoo Yeerinaa Doono Yesuus Kiristoosinochi wojjoonaa diggoona ittoshich tunebe.

Roomi Kittinneenaꞌon Beegga Phawuloosi Sharaato

⁸ Kiristoosi toommooch mulloon ittoshi tooꞌiyoo alemo bulliich bi woree beetoyich, bulli mooyoyee shiichiree ittoshi bullichi naboyich Yesuus Kiristoosina ta Nuggishoon galletehoye.

⁹ Ta corootaabeeti aabo bullin kuxaanoon ittoshichon Yeerich shalligichaabeeto taane; bi Bushoochi mishiraachee qaaroon getona ceeni mulloona ta maddaabeeti Yeeri ta miixoone.

¹⁰ And ciiroochaa ittoshi waan ta woyemmoyich Yeeri gaawe bi daaggoo tunegaata, ta gommon bi kaachemmoyich qollaabeeto taane.

¹¹ Ittoshi manjemmoyich, Yeerichi Ayaano taach immiti wojjoochee ittoshich ta qoodemmoyich ittoshin beegga sharaataabeeto taane.

¹² Ebiyoo Kiristoosi toommooch mulloon ta tooꞌiyoon beegiree ittoshi kupphemmoyich, wotta tawoo ittoshi mullee tooꞌiyoon beegiree ta kupphemmoyichiye.

¹³ Ta maneenaꞌote! Bare Aageteenaꞌo daggooch tunetoommon, ittoshi daggooch beeti asheenaꞌo wotta ta gommona Kiristoosin boonoshi danemmoyich, wodde wottoon ittoshi waan woya ta gaboon, tunebaani and beddaahaa womoyich hakkee ta qayon ittoshi ariyemmoyich shunnoye.

¹⁴ Woraafa, getteetinaꞌonaa hoxeetinaꞌonoyich, ariyechinaꞌonaa tuusheenaꞌonoyich mishiraachee qaaroon ta gettemmoyich, Kiristoosichi hiishoo ta toommooch beetone.

¹⁵ Ebich Room beeti ittoshich wotta mishiraachee qaaroon getoyich qaataabeeto taane.

Mishiraachee Qaaree Giidoo

¹⁶ Mishiraachee qaaroona yeelleyaache. Yesuus Kiristoosichi mishiraachee qaaro boonoshi mulloon Kiristoosi toommooch tooꞌii beetinaꞌo bullin, shiichiꞌi Ayihudeenaꞌon, aroochee Ayihudo tuneyaaneenaꞌon Yeeri wodiibeeti giidoone.

¹⁷ Ebiyoo mishiraachee qaaroona Yeer waanee daneebeeti cadiqoo bi bekkee beetoyichiye; ebi cadiqoo bi bekkeebeeto, shiichoochee ciirooch beddaahaa Kiristoosi toommooch mulloon tooꞌiyoonane. Ebiyoo “Yeeri toommooch mulloon tooꞌiyoona cadiqito kashecho tuneree beeyemmone” getaa bi kooreetoommoniye.

Asho Koniyoona Xalloo Tunee Qayo

¹⁸ Yeerichi ibere mooyo aricheyaachemmoyich boonoshi gondoona qeriibeeti asheenaꞌochi axaaxoonaa gondo bullinochi toommooch Yeeri bi kaaree shiixxoon shimaayoochee kindiyemmone.

¹⁹ Ebiyoo Yeeri bi qelloona boonoshich bi bekkiitoyich, asheenaꞌo ariyoo boonoshi hakkimmi Yeerichi mooyo xalla boonoshich bi bekkee beetoyichiye.

²⁰ Yeeri alemoon bi hallitoochee tiijjiꞌi bekkeyaani bi mooyinaꞌo, eboshiyoo bulli yemeenee bi giidoonaa bi nuggishittinoona, bi halliti mooyinaꞌoochee aricheꞌi asheenaꞌoyich xalla bekkee beetinaꞌone; ebich boonoshi wochemmi noonoo boonoshich aalloone.

²¹ Ebiyoo Yeeri koni bi gaata ariibee, Yeeri bi tunee oogoonaa galletoonon biich boonoshi bajjitoyichiye. Boonoshiyoo duube gabecho tuneheete; gabaalli boonoshi mullo xummehe.

²² “Ariyecho noone” iibee mullaalleenaꞌo tuneheete.

²³ Oogee yiirechi bulli yemeenee Nuggishoyich goyinnemmon qajjiichii, qitemmi asheenaꞌochi, yoobbereenaꞌochi, gijjeenaꞌonaa kubbi cooxinaꞌonochi, yuummereenaꞌochi shahalloon boonoshi kishoona shuuneꞌi eboshich goyinneheete.

²⁴ Ebich boonoshinaa boonoshina boonoshi hajjee meenon cooniiya, tiyaariibeeti eeꞌe mooyon boonoshi tuniyemmoyich, Yeeri gonde qaatee toommooch boonoshin qajjiye.

²⁵ Ebiyoo Yeerichi iberoon kootoona boonoshi shadditonaa Hallito beetaa halleetoyich boonoshi goyinnee maddetonoyichiye. Halliti Yeeri bulli yemeenoon galleteetone. Ameena.

²⁶ Ebich Yeeri yeelliibeeti qaatee toommooch boonoshi beetaa boonoshin qajjiye. Maacheenaꞌo boonoshi hallooch beeti mooyon hallooch aalli mooyona shaddiyeete.

²⁷ Ebiyoommon anaaminaꞌo boonoshi hallooch beeti mooyon, ebiyoo maacheenaꞌona tookkii qemon qajjiichii, boonoshinaa boonoshina qaatoona qitiyeete. Anaaminaꞌo boonoshiyoommi anaaminaꞌo toommooch yeelliibeeti mooyon halliꞌi boonoshi tuniiti gondoyich bede sheeroon boonoshi hajjee kishoona danetinaꞌone.

²⁸ Yeerin ariyoon gaacaallo shaahiiꞌi boonoshi gabitoyich, tuneyaani mooyon boonoshi hallemmoyich, Yeeri boonoshin qajjiye; ebich xumme gaboon baach gabiyeete.

²⁹ Axaaxoona, xuꞌoona, hiriggoona, gondo bullinoo ceenniyeete; qanaato, ashoon wuxoo, kaaro, dawushoo, baroon gondiyoo boonoshi mullooch ceenniye. Ashi shigoon gondii beetinaꞌo,

³⁰ oonechinaꞌo, Yeerin shixxii beetinaꞌo, naagechinaꞌo, boonoshi qelloon oogii beetinaꞌo, geecechinaꞌo, moochi qaawechinaꞌo, boonoshi niheenaꞌonaa indeenaꞌonoyich deꞌa getaaneenaꞌo,

³¹ shalligaalleenaꞌo, wogibiisheenaꞌo, shunaalleenaꞌonaa maacmanjeenaꞌona tuneheete.

³² “Ebiyoommi shuunoon shuunee beetinaꞌoyich qitoo tunibede mooyone” ii beeti Yeerichi sheeroon ariibee gonde mooyon shuuneheete; shuuno baach tuneyaanoon, ebi gonde mooyon shuunee beetinaꞌon “Ittoshi shuuneebeeto tatoone” iꞌi tookkii emiriyeete.