Qolaasiyaasi 4 - Kafa Linguistics Project

¹ Dooninaꞌote, ittoshi wotta shimaayooch Doono ittoshich beemon ariiree, ittoshi guuninaꞌoyich kaamoonaa tate mooyonon tuniibote.

Daakkiꞌi Phawuloosi Ciicciti Ciico

² Yeerin galletebee qaalliree corootoona kupphebote.

³ Yeerichi qaaroon ta getti naboonane and cuyee kexooch cuchaꞌa ta beeto; ebich ittoshi corootii beegaata, Kiristoosichi qaaree maacee mooyon gaxxi no gettemmi bi qaaree kelloon Yeeri qechemmoyich, noochoo corootibote.

⁴ Wotta ta getti bedoommon xallayiree geton ta hakkemmoyich taachoo corootibote.

⁵ Yeeri ittoshich immiibeeti gommo bullina Kiristoosichon miixebee Kiristoosi toommooch mulloon tooꞌiyaani asheenaꞌo daggooch ariyoona shaꞌebote.

⁶ Boonoshi ikkikkoyich aabichiree tatoona ittoshi wochemmo gaata ittoshi ariyemmoyich, ittoshi yibbaatoo bulli aaboon kiihochoommon nooccii beetonaa emirikkii beetona tunebe.

Ciireexi Diggiyoo

⁷ Shucheti no manoo, gibeneeti maddecho, taanna tookkiinoo Doonochi guuno tuneꞌi shuuneebeeti Tikiqoosi ta beemichon ittoshich gettemmone.

⁸ Biin ittoshi waan ta wochaa daachiibeeto, no mooyon ittoshich bi getteemmonaa ittoshi mulloon bi goggiyemmonoyichiye.

⁹ Ittoshi waanee tuneti, gibeneetonaa shucheti manoona Anaasimoosi, biinna tookkii hammii beetone. Boonoshiyoo hiniich tuneti mooyo bullin ittoshich gettemminaꞌone.

^10-11 Barnabaasichi niheeshoo bushoo Maariqoosi, Yusxoosi getteeti Yaasi, taanna tookkii cucheti Arsixirokoosi, eboshi bulli ittoshin diggiitinaꞌone. “Maariqoosi ittoshi waan bi waagaata, iibbiibote” ii beeti wocho ittoshich shaggitone. Ayihudeenaꞌo daggoochee Yeerichi taatittino gaminnemmoyich taanna tookkii shuunee beetinaꞌo eboshi baachiye; taanoo goggiitinaꞌone.

¹² Ittoshi waanee tuneto, Kiristoos Yesuusichi guuno Epphaafiri ittoshin diggiitone. Biyoo ittoshi manjemmonaa shuuraanoon ittoshi neexemmonoyich, Yeerichi daaggoonoo ceechoona ittoshi kupphemmoyichoo, bulli aaboon ittoshich corootoona qiiccee beetone.

¹³ Ittoshichoo, Lodooqi katemoonaa Hirapooli katemoonooch beetinaꞌoyichoo oogichii bi yulloon miixaabeeto taane.

¹⁴ Shucheti manoo, aakumo Luqaasi, wotta Deemaasiyoo ittoshin diggiitinaꞌone.

¹⁵ Lodooqi katemooch beeti maneenaꞌonaa manee Nifooninoyich, bi kexoochoo kiceebeeti kittinnee guuphoyich ta diggiyoon bechibote.

¹⁶ Hini ta kooriti wocho ittoshi daggooch bi shemmeetoyee gubb, Lodooqi kittinnee guuphi daggooch bi shemmeyemmoyich tuniibote. Lodooqee ittoshich ichemmi, ta kooriti wochoon wotta shemmebote.

¹⁷ Arikiphaasichoo “ ‘Ne shuunemmoyich Doono neech bi immiti maddoon ceechoyich ne qelloon ariibe’ itone” getote.

¹⁸ Ta, Phawuloosi ta hajjee kishoona ta kooriti diggiyo hinine; cuyee kexooch cuchaꞌa ta beemon batteyaahote. Yeerichi wojjoo ittoshina tookki tunebe.