Qolaasiyaasi 3 - Kafa Linguistics Project

¹ Illa Kiristoosina tookkii qitoochee ittoshi tiyitoyee, Yeerichi qanne badd Kiristoosi koteꞌi beetooch damba shimaajj beeti mooyon gabibote.

^2-3 Ittoshi, qitito ittoshine; ittoshi kasho Kiristoosina tookkii Yeer waan aashetone. Ebich damba shimaajj beeti mooyon gabibotalli, showooch beeton toonoone.

⁴ Ittoshi kasho tuneti Kiristoosi bekkemmi aabooba, arooba ittoshi wotta biinna tookki oogee yiiroona bekkemmo ittoshine.

Wonnee Kashoonaa Andire Kashoona

⁵ Illa ittoshi meechi qaatoon wuxibote. Eboshiyoo: yahoo, eeꞌe shuunoo, bushittinee cakkoo, gonde qaatoonaa hiriggoonane. (Hiriggoo, bi hiriggiti mooyon nuggishoommon tuniiꞌi goyinnoone.)

⁶ Eboshi naboochee tiyitona Yeerichi kaaree shiixxoo biich deꞌa getaaneenaꞌo toommooch kindemmone.

⁷ Ittoshiyoo wotta ebiyee aafi ittoshi beemona, ebi mooyinaꞌoyich hajjeeꞌi beehote.

⁸ Tunebaani and wotta kaaroonaa ippoonon, gonde mooyon, naagoonoo, yeelliibeeti yibbaatoonoo, eboshi bullin wokkiibote.

⁹ Wonnee geene ashoon bi shuunoona tookkii shoottiꞌi, andire ashoon ittoshi tahetoyich ittoshinaa ittoshina kootoon yibbaateyaahote.

¹⁰ Ebi andire asho Yeeri bi hajjee shaahoon bi tunemmoyich, biinoo ariyooch bi beddemmoyich bi andiriibeeti ashoone.

¹¹ Ebich and Giriikee ashoonaa Ayihudee ashoona geto, dokireetonaa dokireyaanoona geto, shiqqoonaa woheexi yaroona geto, guuchi yaroonaa doonji yaroona geti barittino aalloone; Kiristoosi bulli mooyone; bullinoo tookkiiniye.

¹² Illa Yeeri ittoshin shunniꞌi biich bi kaaccitonaa biich bi yaafiti ashoona ittoshine; ebich ariqqittinoon, deꞌittinoon, qellee giishiyoon, shiimoon, haaꞌiyoon, ebi bullin tahebote.

¹³ Ittoshinaa ittoshina ikkoochi mooyon baroo haaꞌiibe; koniyoona bi manoo toommooch bi qoonniti mooyo beegaata, maaribote. Doono ittoshin bi maaritoommon ittoshiyoo wotta ebiyoommon maaribote.

¹⁴ Eboshi bulli toommooch ceeni ikkittinoona bullin cuchiibeeti shunoon daakkiree tahebote.

¹⁵ Kiristoosichi diggoo ittoshi mullooch taatebe; ikke ashittinoochoommon ittoshi ceekketo ebi diggoyichiye; Yeerinoo galleteebeeto tunebote.

¹⁶ Kiristoosichi qaaro ceenoona ittoshi mullooch beebe; ariyoo bullina ikkoo ikkoon dojjibee, ittoshinaa ittoshina ciiceebote. Shoddoonaa naadoona, Ayaanee shoddoona galletoonoo ittoshi mulloona Yeerich shoddebote.

¹⁷ Nihoo Yeerin Kiristoosina galletebee, ittoshi yibbaateebeeti yibbaatoon woyee ittoshi shuuneebeeti shuunoo bullin Doono Yesuusicha getiree tuniibote.

Kittinnee Kechi Asheenaꞌoyich Phawuloosi Ciicciti Ciico

¹⁸ Mecheenaꞌote, Doono waanaa tun bede mooyo bi tunetoyich ittoshi keneenaꞌoyich hajjeebote.

¹⁹ Keneenaꞌote, ittoshi mecheenaꞌon shunote; sheeniibeeto tuneyaahote.

²⁰ Bushiisheenaꞌote, ebi Doono Yeerin emirikkiibeeto bi tunetoyich, bulli mooyona ittoshi nihoonaa ittoshi indeenoyich deꞌa getote.

²¹ Niheenaꞌote, boonoshi sheweyaachemmoyich ittoshi bushiisheenaꞌon ippiyaahote.

²² Guuninaꞌote, ittoshi dooninaꞌoyich bulli mooyona deꞌa getote. Ashoon emirikkoonaa ashi beꞌenoonoyich tuneyaanoon, kaame mulloona Doono Yeerin shatibee boonoshich hajjeebote.

²³ Ittoshi tuniibeeti mooyo bullin, ashich tuneyaanoon Doonoyich ittoshi tunii beetoommon, mulloochee tiijjiree shuunebote.

²⁴ Doono Yeeri ittoshich bi qanniiti shuunee gaacee iristoon danemmo ittoshi tunoon ariibeeto ittoshine; ittoshi maddeebeeto Doono Kiristoosichiye.

²⁵ Yeeri ashoon ciinniꞌi heppaache; ebich xuqqiibeeto bullich bi xuꞌee gaacoon qoccemmone.