Qolaasiyaasi 2 - Kafa Linguistics Project

¹ Ittoshinaa Lodooqi kittinneenaꞌonoyich, wotta aafoona taan beeggii ariyaaneenaꞌo bullichoo am shaahe ooge qiiccee toommooch ta beeto gaata ittoshi ariyemmoyich shunnoye.

² Ta qiiccaabeeto, boonoshi mullo kupphemmonaa shunoona boonoshi ikkottemmonoyich, ceeni shalligoon daneree Yeerichi maacee mooyo tuneti Kiristoosin boonoshi ariyemmoyichiye.

³ Shalligee gaannoonaa ariyee gaannoona bulli aacheeꞌi bi beeto bi waaniye.

⁴ Ishin ta ii beeto, koniyoona noonee shaawona ittoshin bi dachaachemmoyichiye.

⁵ Meenona ittoshi waanee ta wokketaanona, bulli aaboon ittoshin gabaabeeto taane; gaawe qocoona ittoshi beemonaa Kiristoosi toommooch mullee tooꞌiyoona ittoshi manjoonon ta beeggetoyich emiraabeeto taane.

Kiristoosina Daneebeeti Ceeni Kasho

⁶ Illa “Kiristoos Yesuusi Doonone” iꞌi ittoshi miixetoommon, biinna beebote;

⁷ biinna cammon awure eeniree, ittoshi doyitoommon bi toommooch mullee tooꞌiyoona manjibote; Yeerich galletoon woddiiree imbote.

⁸ Kiristoosi dojjiti doyoommon tuneyaanoon, ashi doyoommonaa hini showeexi ariyoommona, ariyoon shaahiibeeti yibbaatoonaa duube acona koniyoona ittoshin olle yeshiree guunon bi tuniyaachemmoyich ittoshi qelloon ariibote!

⁹ Ceeni Nuggishittino bulla Kiristoosi taheti meechi ashittinooch beetone.

¹⁰ Ittoshiyoo ceeni kashoon ittoshi daneto, taatittino bullinaa iraashittino bullinochi shimbo tuneti Kiristoosinane.

¹¹ Ittoshiyoo biicho ittoshi tunoona, dokireeto ittoshine. Ebi ittoshi dokkireyoo, axaaxoo waan gaꞌeebeeti gonde shuriyoon shootoyich, Kiristoosina tunetoꞌani ashi kishoona tuneto toonoone.

¹² Aacona afaalleyoona Kiristoosina tookkii duukkehote; wotta qitoochee biin tiijjiti Yeerichi shuunee toommooch mulloon ittoshi tooꞌitoyich Kiristoosina tookkii kashechon tunehote.

¹³ Ittoshiyoo wotta ittoshi xuꞌoona, wotta axaaxoo waan geechiibeeti ittoshi meechi shuriyoo dokiriyee qajji naboona, qititoommon tuneꞌi ittoshi beetaa, Yeeri Kiristoosina tookkii ittoshich kashoon immiye; ebi ittoshi xuꞌo bullinoo maariye.

¹⁴ No toommooch beechii, noon taggeebeeti hiishee woraqatoon bi sheeroona tookkii hidii aalliihe. Are hiishee woraqatoon masqalee toommooch xogiꞌi wokkiihe.

¹⁵ Hini are masqalee toommoochaa Kiristoosi gondoochi iraasheenaꞌonaa ukkireenaꞌonon kochii wochiꞌi, boonoshi giidoon shootona bulli aafooch cooqqireetinaꞌon tuniihe.

¹⁶ Illa maayee naboona woyee uyee naboona woyee nati baaroon woyee agenee keyi baaroon woyee shambetoon ittoshi quyee qajji naboona koniyoona ittoshi toommooch nallaaye.

¹⁷ Eboshi bulli woyemmi moochi yiiritteenaꞌone; tunebaani iberoo Kiristoosine.

¹⁸ Beꞌenee qellee giishiyoonaa maraakeenaꞌoyich goyinnoonon shunibee, “Ta besh taane; yaaꞌoon beeggeto taane” getibee Yeeri aalli gaboona duuboon geecibee koniyoona ittoshi toommooch nallaaye.

¹⁹ Ebiyoommi asho shimbo tuneti Kiristoosina tookkii amee yesholla biich aalloone; ashittino bullin maqqoona gawii yeshiibee maanjjiibeeto shimboone.Yeeriyoo ashittino eennemmoyich bi tuniibeeto ebiyoommi gommonane.

Kiristoosina Tookkii Qitoonaa Kashechon Tunoona

^20-21 Illa hini alemeexi ashoon hajjiibeeti ariyoommi gaboochee biicheꞌi Kiristoosina tookkii ittoshi qititoyee, hini alemeexoommon tuneti ashi doyoommon “Hinichi achooch shaggaahine! Hinin napphe beeggaahine! Ebinoo yechaahine” ii beeti getoyich amoyichiye ittoshi hajjeebeeto?

²² Eboshi bulli shuunee toommooch boonoshi heechitoyee gub, aallechinaꞌone; asho halliti sheereenaꞌonaa doyeenaꞌonane.

²³ Ebi mooyinaꞌo bi qelli daaggoommona goyinnoonaa shaahiyee qellee giishiyoona, meenonoo maajjiyoona ariyechon shaahiyeete; tunebaani meechi qaatoon bayoyich amoonolla gaacaaneenaꞌone.