Qolaasiyaasi 1 - Kafa Linguistics Project

Diggiyoo

¹ Yeerichi daaggoona Kiristoos Yesuusichi mishiraachechi Phawuloosinaa no manoo Ximootiyoosina waanee,

² Qolaasiyaas beeti, Kiristoosina yaafeetinaꞌonaa gibeneetinaꞌona tuneti maneenaꞌoyich: No Nihoo Yeeri waanee wojjoonaa diggoona ittoshich tunebe.

Galletoonaa Corootoona

^3-5 Shiichiꞌi ebi mishiraachee iberee wochoon ittoshi waayehooba, shimaajji kexooch ittoshich qanniti gibeneechi naboyich Kiristoos Yesuusi toommooch mulloon ittoshi tooꞌiyoonaa yaafeenaꞌo bullin ittoshi shunonon waayeto noone; ebich ittoshich Yeerin no qollaa beegaata, no Doono Yesuus Kiristoosichi Nihoo Yeerin bulli aaboon galletaabeeto noone.

⁶ Ebi mishiraachoo ittoshi waan shagaa, Yeerichi wojjee iberoon waayeꞌi gaawichii ittoshi ariiti aaboochee tiijjiꞌi ittoshi daggooch bi tuniitoommon, wotta ebiyoommon alemo bulliich aafoon aafee beetone; gaminniinoo beetone.

⁷ Ebinoo noonna tookkii Kiristoosichi gibeneeti maddechon tuneꞌi no keroyich shuuneebeeti, noonna tookkiinoo maddeebeeti, shucheti manoo Epphaafir ittoshich dojjitone.

⁸ Wotta Yaafe Ayaanoochee daneti ittoshi shunoon nooch gettitone.

⁹ Ebich no wotta ishin no waayeti aaboochee tiijjaꞌa, Yeeri bi Ayaanoochee daneebeeti ariyoonaa shalligoo bullinon ittoshich ceenoona imiree bi daaggoon ittoshich bi arichiyemmoyich, qollaabee ittoshich corootoon kuxaano noone.

^10-12 Gaawe shuunoo bullina aafoon aafebee, Yeerin ariyoona dicibee, bulli mooyona kupphoonaa haaꞌiyoona worganikkiibeeti bi giidoommon oogichi kupphebee, Yeeri bi yaafeenaꞌoyich bi qanniiti iristoon bi taatittinee bekkoochee no qoodeyemmoyich noon bechiti Nihoo Yeerin emiroona galletebee, mooyo bullina biin emirikkiya Doonoyich bedditon tuneree ittoshi beeyemmoyich corootaabeeto noone.

¹³ Biyoo manderee taatoo kishoochee noon kichiye; bi shuni Bushoochi taatittineech noon giijjiye.

¹⁴ Nowoo ebi bi Bushoona biisheeto noone; ebi getoo no axaaxoyich maaroon daneto noone.

Kiristoosinaa Bi Shuunoona

¹⁵ Kiristoosi bekkeyaani Nuggishoochi shaahiyoone; halleetinaꞌo bulliyee shiichiꞌi beeti qaabboone;

¹⁶ bekkee beetinaꞌonaa bekkeyaaneenaꞌona, taatittino tuneba woyee doonjittino tuneba woyee iraashittino tuneba woyee ukkirittino tuneba showoonaa shimaayoonooch beetinaꞌo bulli biinna halleetinaꞌone. Bulli mooyo biinna halleetone; biichoo halleetone.

¹⁷ Biyoo bulliyee shiichiꞌi beetone; bulli mooyoo gaweto biinnane.

¹⁸ Biyoo bi ashittino tuneti kittinnee guuphinaꞌochi shimboone; mooyo bulli toommooch besho bi tunemmoyich, bulliyee shiichoone; qitoochee timonoo qaabboone.

¹⁹ Yeeri ceeni bi Nuggishittino biinna bi beeyemmoyich emiroona daaggitone;

²⁰ masqalooch ufeti ebi bi Bushoochi damoona diggoon tuniiꞌi, showooch tuneba shimaayooch beeti mooyo bulli biinna tookki shunemmoyich tuniihe.

^21-22 Ebiyee aaf wokkiꞌi beeti ittoshin, gonde mooyon shuunoonaa gonde mooyon gaboona biinna shixecho tuneti ittoshin, qoonneyaani oonaalli yaafeeton tuniiꞌi Yeeri aafooch ittoshin giddiyoyich, Kiristoosi meenon taheꞌi bi qitoona and ittoshin shuniitone.

²³ Ebi bi tunemmo, Kiristoosi toommooch mullee tooꞌiyoona manjiꞌi ittoshi waayeti mishiraachee qaaree gibenoochee shokaanoon ittoshi beegaatane. Are mishiraachoo shimaayoyee desh beeti halleetinaꞌo bullich getteetone; ta Phawuloosiyoo ebi mishiraachee qaaree maddechon tunehoye.

Kittinnee Guuphoyich Phawuloosi Maddoo

²⁴ Andoo ittoshi naboyich ta toommooch shaggiti iritoyich emiriyoye; ebiyoo Kiristoosichi ashittino tuneti kittinnee guuphochi naboyichiye; Kiristoosi xuuxetoommon bi shuunee naboona ta toommooch shaggiibeeti xuuxoon haaꞌiibee bi xuuxoon ceechiibeeto taane.

²⁵ Yeeri taan bi ceeggitoommon ittoshicha getaa taach icheti shuunoommon, ceeni bi qaaroon ta gettemmoyich kittinnee guuphi maddechon tunehoye.

²⁶ Hini qaaro wonnee yemeenoochee tiijjiꞌi shiijjereenaꞌo bullich aacheeti maacee mooyone; tunebaani and ebi are maacee mooyo yaafeenaꞌoyich gaxxeetone.

²⁷ Boonoshichoo Yeeri ebi maacee mooyo Aageteenaꞌo daggooch am shaahoon worganikkiibeeto gaata bi tunoon arichiyoyich shunniye; ebi maacee mooyo Yeerichi oogee yiiroon danee gibeno tuneti Kiristoosi ittoshi mullee daggooch beemone.

²⁸ Bullich no gettaabeeto Kiristoosichoniye. Asho bulli bi ikkikkoo Kiristoosina, bedditi ashoon bi tunetaa Yeer waan giddiyoyich ariyoo bullina asho bullin kaaraa ciiccaabee arichiibeeto noone.

²⁹ Kiristoosi taach bi immii beetonaa taanna shuunee bi beeti ooge bi giidoommona ebin ceechoyich oogichaa qiiccaabeeto taane.