Nehimi 9 - Kafa Linguistics Project

Israꞌeeleenaꞌo Boonoshi Axaaxoon Aannoo

¹ Aroobee agenee hiyaa awuddinnee qemooba, Israꞌeeleenaꞌo coomii, dookoon tahee, boonoshi shimbooch buttoon shakkiꞌi ikkooch kiceeheete.

² Israꞌeelee yareenaꞌo dallaawe asheenaꞌo waanee boonoshi qelloon bariiheete; neexeꞌi boonoshinaa boonoshi qaabbechinaꞌonochi axaaxoon aanniyeete.

³ Boonoshi beeti beetooch neexeꞌi boonoshi beetaa, boonoshi Nuggishoo Doono Yeerichi Sheeree Macaafo keejje saati bedoon boonoshich shemmeehe; wotta keejje saati bedoon boonoshi Nuggishoo Doono Yeerich boonoshi axaaxoon aanniꞌi goyinneheete.

⁴ Yaasi, Baniyi, Qadimeeli, Shebaniyi, Buuni, Sherebiyi, Baniyinaa Qenaanina Leweenaꞌochi daqqee toommooch neexeechii, boonoshi Nuggishoo Doono Yeer waan ooge qaaroona corootiyeete.

⁵ Leweenaꞌo, eboshiyoo Yaasi, Qadimeeli, Baniyi, Hashabiniyahi, Sherebiyi, Hodiyi, Shebaniyinaa Fetahiyina, “Tiyi neexeechi, ittoshi Nuggishoo Doono Yeerin bulli yemeenoochee bulli yemeenooch diiribote” iyeete. Aroochee asheenaꞌo ishichiꞌi corootiyeete: “Galletoonaa diiroo bullinoyee beshe oogee yiirechi ne shigo diireebe.

⁶ Ne ikkeeto baach Doono Yeeri neene; shimaayoon, shimaayeexi shimaayoon, boonoshi daggoochoo beeto bullin, showoonaa bi toommooch beeto bullinon, baharoonaa bi daggooch beeto bullinonoo hallito neene; bullichona kashoon immaabeeto neene. Shimaayeexi halleenaꞌo bulliyoo neech goyinnee beetinaꞌone.

⁷ “Nuggishoo Doono Yeero, Abraamin kaaccaꞌa, Kalideenaꞌo showoochee, Uuri katemoochee kichito, neene; bi shigoonoo Abrahami iyaꞌa shigiito, neene.

⁸ Neech gibeneeto bi tunoon beeggehine; Kanaaneenaꞌo showoon, Hiteenaꞌo showoon, Amooreenaꞌo showoon, Ferizeenaꞌo showoon, Yebuseenaꞌo showoonaa Girigaasheenaꞌo showoonon biinnaa bi shiijjereenaꞌonoyich imoyich, biinna tookkaa wogoon giyehine; cadiqo ne tunetoyich, ne qaaroon ceechihine.

⁹ “Gibits boonoshi beehooba no qaabbechinaꞌochi xuuxoon beeggehine; Ceelle baharoochaa boonoshi cookoon waayehine.

¹⁰ Boonoshi toommooch coodditinaꞌo boonoshi tunoon ne ariitoyich, Farooni toommooch, bi naayinaꞌo bullinaa bi showooch beeti bi asheenaꞌo bullinochi toommooch worganikkiti malletoonaa gaakkechi shuunoonon bekkiihine; hanaach beddaahaa ne shigo oogemmoyich tuniihine.

¹¹ Ne asheenaꞌo aafooch baharoon gutta ne qoodaa, shuuꞌi showoona kimmiyeete. Tunebaani boonoshin yookkii dabbii beetinaꞌon, xaqqoon ceeni aacooch dufoommon gejjee dechi duchooch curulliihine.

¹² Boonoshi hammiibeeti gommo bekkemmoyich, ne asheenaꞌon areddoon giimboommi quboona, xumoonoo giimboommi qaaqqoona yaabihine.

¹³ “Siini guudi toommooch kindihine; shimaayoochaanoo boonoshina tookkaa yibbaatehine; gaawe doyoonaa ibere sheeroonon, gaawe qociyoonaa getoonon boonoshich immehine.

¹⁴ Yaafeeti ne shambetoonoo boonoshich arichiihine; getoon, qociyoonaa sheeroonon ne guuno Muusina boonoshich immehine.

¹⁵ Boonoshi shaacoyich shimaayoochee koshon immehine; boonoshi shachewoyich xaqqoochee aacon kichihine; boonoshich imma wogoon ne giyeti showoon giyiree boonoshi woraashemmoyich gettehine.

¹⁶ “Tunebaani no qaabbechinaꞌo geeciyeete; babbereheete; ne getoonoo ceechaaneenaꞌone.

¹⁷ Ne getoyichoo deꞌa getaaneenaꞌone; boonoshi daggooch ne tuniiti gaakkechi shuunoon shalligaaneenaꞌone. Babbereheete; Gibitsee showooch, guuchittinooch wottoyich boonoshin yaabemmi ukkiroon kaacciyeete. Tunebaani ne, gondoon maarecho, shoodecho, ariqqecho, kaaroyich nibbechonaa wodde shunnechona tuneti Nuggishoo neene; ebich boonoshin qayaano neene.

¹⁸ Aachoon ukkii maanji misiloon boonoshi qellich shuuneꞌi, ‘Gibitsee noon kichiti nuggishoo hinine’ boonoshi iyooba, neenoo boonoshi hoxehooboo,

¹⁹ ne ariqqee woddoochee tiyitona, barahooch boonoshin qayaano neene. Areddoon boonoshi hammemmi gommon shiichii yaabiibeeti giimboommi qubo, xumoonoo boonoshi hammemmi gommon bekkiibeeti giimboommi qaaqqoo, boonoshiyee baraanoone.

²⁰ Boonoshin bi dojjemmoyich deꞌe ne Ayaanoon boonoshich immehine. Mannoonoo boonoshi noonoochee kuxaano neene; boonoshi shachewoyichoo aacon immehine.

²¹ Aabbe naton barahoochaa boonoshich qaawiibeeto bullin immehine; amoonolla mucceyaaneenaꞌone; boonoshi taho kuxeyaanoone; boonoshi baatoo nafaanoone.

²² “Taatittineenaꞌonaa aageteenaꞌonon beshii immaꞌa, wohooch beeti showee danoon boonoshicho tuniihine. Heshiboni katemooch koteechii hajjiibeeti, taatoo Sihooni showoon, Bashaanee taatoo Oogi showoonoo woraashiyeete.

²³ Boonoshi shiijjeroon shimaajji xojjenoochoommon meechihine. Giyiree boonoshi woraashemmoyich boonoshi qaabbechinaꞌoyich ne getteti showooch boonoshin giijjihine.

²⁴ Ebich boonoshi shiijjereenaꞌo giyiꞌi woraashiyeete. Are showee asheenaꞌo tuneti Kanaaneenaꞌon koyi boonoshi wochemmoyich tuniihine. Kanaaneenaꞌo toommooch, boonoshi taateenaꞌonaa boonoshi showee asheenaꞌonochi toommooch boonoshi shunnimmon boonoshi shuunemmoyich, boonoshi kishooch beshiyaꞌa immehine.

²⁵ Xaqqee uxerechi katemeenaꞌonaa qeemi showoonon kochii yechiyeete; gaawe qiicoona ceenniti kexinaꞌon, iicheti aachi oppeenaꞌon, woyinee goyoonaa zayitee mixonon, wotta aafeebeeti wodde mixon deqqiyeete; boonoshi michimmi wottoon maaheete; aangiyeete; oogeti ne deꞌittinoona emiriyeete.

²⁶ “Tunebaani neech deꞌa getaaneenaꞌone; ne toommoochoo tiyiyeete; ne sheeroonoo gubb duppiyeete; ne waan boonoshi wottemmoyich boonoshich kupphii gettiti keemechinaꞌon wuxiyeete; oogichiꞌinoo neen hoxeheete.

²⁷ Ebich boonoshi etteenaꞌo kishooch boonoshin beshiyaꞌa immehine; boonoshi etteenaꞌo boonoshin iritiiheete. Boonoshi iritee aabooba, ne waan cookiyeete. Shimaayoochaa boonoshi cookoon waayehine; ne ariqqee woddoommona boonoshi etteenaꞌo kishoochee boonoshin wodiyemmi wodiyechinaꞌon tiijjihine.

²⁸ “Tunebaani boonoshi kashehooba, ne aafooch axaaxoon wochinnoon shuuneheete. Ebich boonoshi etteenaꞌo kishooch boonoshin ne dufaa, boonoshin hajjiyeete. Wochinnoon ne waan boonoshi cookiyooba, shimaayoochaa waayehine; ne ariqqee woddoommona wochaa wochaa boonoshin wodiihine.

²⁹ “Ne sheeroo waan boonoshi wottemmoyich kupphiyaꞌa gettehine; tunebaani boonoshi geeciyeetani, ne geteenaꞌon ceechaaneenaꞌone. Asho bi ceechigaata kashoona bi beeyemmoyich tuniibeeti ne getoon shaaddeheete; boonoshi gubboon ne waan wochiyeete; babbereꞌi, ne getoon qajjiyeete.

³⁰ Wodde yemeenoon boonoshin haaꞌiihine; ne keemechinaꞌona tunaꞌa ne Ayaanoona boonoshin kupphiyaꞌa meeqqeqqiihine; tunebaani ellee waayeyaaneenaꞌone. Ebich boonoshi guudoona beeti aageteenaꞌo kishooch beshiyaꞌa boonoshin immehine.

³¹ Tunebaani ne, shoodechonaa ariqqechona tuneti Nuggishoo ne tunetoyich, ne ariqqee woddoochee tiyitona boonoshin ciroona aalliyaano neene; boonoshin qayaano neene.

³² “Andoo no Nuggishoocho, ne giyeti wogoon quyaabeeti, ne shoodoonoo bekkiyaabeeti, ooge hakkechi, shattiiti Nuggishoocho, Asooree taateenaꞌochi yemeenoochee tiijjiꞌi hanaach beddaahaa, no toommooch, no taateenaꞌo toommooch, no ogoogeenaꞌo toommooch, nooch maddeebeeti ne qeesheenaꞌo toommooch, no keemechinaꞌo toommooch, no qaabbechinaꞌonaa ne asheenaꞌo bullinochi toommooch shaggiti iritoo, ne aafoochaa giishechoon shaahiree bekkaaye.

³³ Gibeneeto tunaꞌa ibere mooyon tuniito neene; tunebaani no, axaaxoon shuuneto noone; ebich no toommooch shaggiti iritoo bullich, ne cadiqo neene.

³⁴ No taateenaꞌo, no ogoogeenaꞌo, nooch maddeebeeti ne qeesheenaꞌonaa no qaabbechinaꞌona ne sheeroon quyeyaaneenaꞌone; ne geteenaꞌonaa ne meeqqeqqeenaꞌonon waayeyaaneenaꞌone.

³⁵ Boonoshi hajjee taatittinoochaa, boonoshich ne deeti deꞌoona boonoshi aafooch ne qanniiti, gamini, qeemi showoochaanolla neech maddeyaaneenaꞌone; gonde boonoshi shuunoochee ne waan wotteyaaneenaꞌone.

³⁶ “Ebiyoche, hanaachoo guuno tuneto noone. Aroochee daneebeeti aafoonaa gaannoonon boonoshi maayemmoyich, no qaabbechinaꞌoyich ne immeti showoochaa guuno tuneto noone.

³⁷ No axaaxee naboona are showoochee daneebeeti gaanno giyiibeeto, no toommooch ne taatiiti taateenaꞌoyichiye; no ashittinoonoo hajjiyeete; no gijjeenaꞌon boonoshi shunnitoommon tuniiheete. Nowoo ooge iritoochiye no beeto.

Asheenaꞌo Wogee Gimo

³⁸ “Ebi mooyo bullich manjiti wogoon giyaꞌa koorichooch kooraabeeto noone. No ogoogeenaꞌo, Leweenaꞌonaa qeesheenaꞌona aree toommooch boonoshi maatemoona dukkee beetinaꞌone” iyeete.