Nehimi 8 - Kafa Linguistics Project

¹ Ebiyooba asheenaꞌo bulli ikke kashoon tuneꞌi, Aachi Kellee ciinooch beeti addibaabooch kiceeheete. Aroochee Doono Yeeri Israꞌeeleenaꞌoyich Muusina bi immiti Sheeree Macaafoon sheeree dojjechi Iziri deebemmoyich gettiyeete.

² Ebich qeeshoo Iziri shabaattinnee agenee ikkinnee qemooba anaaminaꞌo, maacheenaꞌonaa boonoshi waayeton shalligoon hakkii beetinaꞌo bullina kiceeꞌi beetooch, Sheeree Macaafoon deebiye.

³ Biyoo Aachi Kellee ciinooch beeti addibaabooch neexeꞌi anaaminaꞌo, maacheenaꞌonaa boonoshi waayeton shalligoon hakkii beetinaꞌona waayee beetaa, haroochee tiijjiꞌi showoo tukkemmi wottoon shemmehe. Asho bulli waamon gaꞌii Sheeree Macaafoon ellee beehe.

⁴ Muusichi Sheeree dojjechi Iziriyoo ebi mooyoyich shuuneeti qeechi toommooch neexee beehe. Bi gaꞌooch qanne baddaa Matitiyi, Shemayi, Anayaahi, Uuriyi, Hiliqiyinaa Maseyaahina, wotta yooche baddaa Fedayi, Mishaꞌeeli, Malikiyi, Hashuumi, Hashibadaani, Zakaariyaasinaa Meshulaamina neexee beeheete.

⁵ Iziriyoo asho bulli ciinnii beetaa, macaafoon gaxxiye; asho bulliyee damba collimii neexeechii, bi gaxximmona asheenaꞌo bulli tiyii neexeheete.

⁶ Iziriyoo ooge Nuggishoo Doono Yeerin galletehe. Asheenaꞌo bulliyoo boonoshi kishoon kaama yaggiꞌi, “Ameena, ameena” iibee ceechiyeete; boonoshi qelloon yittiiheete; baroona guufeꞌi Doono Yeerich goyinneheete.

⁷ Asho bi xaaꞌi xaaꞌooch neexeechaa, Leweenaꞌo, eboshiyoo Yaasi, Baniyi, Sherebiyi, Yamiini, Aquubi, Shabetaayi, Hodiyi, Maseyaahi, Qeliixi, Azariyaasi, Yozabaadi, Hanaaninaa Felayahina sheeroon boonoshich biichii gettii beeheete.

⁸ Yeerichi Sheeree Macaafoon boonoshi shemmetoyee gubb, asheenaꞌo shalligoon hakkemmoyich biichii gettiyeete.

⁹ Showee iraashoo Nehimi, qeeshoo, sheeree dojjechi Izirinaa asheenaꞌon dojjiibeeti Leweenaꞌona asheenaꞌo bullich “Hanaachi aabo no Nuggishoo Doono Yeerich yaafeeti aaboone. Ayini eeppaahote; tuumishoo gettaahote” iyeete. Ebiyoo asheenaꞌo bulli Yeerichi qaaroon boonoshi waayehooba, boonoshi eeppii beetoyichiye.

¹⁰ Nehimiyoo boonoshich, “Hambote; gaawe maayoon mamote; shaawi uyoonoo uyote; qanniti mooyo amolla boonoshich aalli asheenaꞌoyich ittoshich beetoochee daachiibote. Hanaachi aabo no Doonoyich yaafeetone. Doono Yeerichi emiroo ittoshich giidoo bi tunetoyich, ayiniyaahote” iye.

¹¹ Ebich Leweenaꞌo “Cikkibote; hanaachi aabo yaafeeto bi tunetoyich, ayiniyaahote” iꞌi asheenaꞌon tooꞌiiheete.

¹² Aroochee asheenaꞌo bulli, getteeti qaaro boonoshich bi giyitoyich, maa ucha, boonoshich aalleenaꞌoyich boonoshi maayoochee qoodiree daachiya, emirikkiti ooge baaroonoo baariya hammiyeete.

Bashee (Yambaaree) Baaroo

¹³ Guttinnee qemooba asheenaꞌo bullichi yaree ukkireenaꞌo, qeesheenaꞌonaa Leweenaꞌona sheeree qaaroon doyiya sheeree dojjechi Izir waan waaheete.

¹⁴ Shabaattinnee agenee baaroon Israꞌeeleenaꞌo bashoon bashi koteree boonoshi baaremmoyich, Doono Yeeri Muusina gettiti geto sheerooch kooreeton daneheete;

¹⁵ wottoo boonoshi katemi katemoonaa Yerusaaleminooch ebi qaaroon awaajjiree boonoshi bechemmoyich, ishicheeꞌi kooreeton daneheete: “Geppee toommooch keyote; zayitee mixonaa yahee mixonoochee, hadaasee mixoochee, yeebboonaa wodde waajjechi bare mixonoochee kuxi deebote; sheerooch bi kooreetoommon, basheenaꞌon bashibote” ii beetone.

¹⁶ Ebich asheenaꞌo hammii deebiꞌi, boonoshi kechi kechi toommooch, boonoshi uxeri uxeree daggooch, yaafee kechi addibaabooch, Aachi Kellee addibaaboonaa Efreemi Kellee addibaaboonooch bashoon bashiyeete.

¹⁷ Kecoochee wotteti asheenaꞌo bulli bashoon bashii koteheete. Nuuni bushoo Yaasi yemeenoochee tiijjiꞌi, aroobee aabooch beddaahaa, Israꞌeeleenaꞌo baaroon eechiꞌi baarii ariyaaneenaꞌone; oogichii emiriyeete.

¹⁸ Batti batti aaboochee tiijjiꞌi ciirooch beddaahaa, Iziri qemi qemona Yeerichi Sheeree Macaafoon shemmee beehe. Boonoshiyoo baaroon shabaatte qemi wottoon baariyeete; shimittinnee qemooba sheerooch bi getteetoommon, yaafeeti kiceyee aaboon tuniiheete.