Nehimi 6 - Kafa Linguistics Project

Uxeroo Uxereyaachemmoyich Qiicceeti Bare Qiicco

¹ Aroobee aabooch beddaahaa, kellooch shaaqqoon xogaano ta tunetaanoona, uxeree ta uxeroonaa doogaani xaaꞌoo aallo bi tunoonon Sanbalaxi, Xobbiyinaa Arabee asho Gesheemina, wotta echeti no etteenaꞌoo boonoshi waayehooba,

² “Ooni gaddooch beeti gafeenaꞌoochee ikkooch ne waataa, danebone” iꞌi Sanbalaxinaa Gesheemina wochoon taach deejjiyeete. Ebiyoo ta toommooch gondoon shuunoyich boonoshi gabitoyichiye.

³ Tawoo boonoshich wocheyechinaꞌon daachiyaꞌa, “Ooge shuunee toommooch ta beetoyich, hamo taach hakkeyaanoone; shuunoon dufiree ittoshi waan ta hamaa, shuunoo neexemmo, amoyichiye?” iyo.

⁴ Boonoshiyoo awudde wottoon are wochoon taach deejjiyeete. Tawoo aafichoommon boonoshich wochiyo.

⁵ Sanbalaxiyoo aafichoommi wochoon uuchinnoochaa bi aafee bushoona wocheꞌi taach deejjiye; biyoo qereyaani koorichoon yechiꞌi ta waan waahe.

^6-7 Ebi koorichooch kooreeto ishichii beetone: “Neennaa Ayihudeenaꞌona hukkee tiijjoyich gabito ittoshine; uxeroon ne uxeraabeeto ebichiye getaa aageteenaꞌo daggooch yibbaatee beetone; Gesheemiyoo ebi iberoo bi tunoon xiishitone. Wotta boonoshi taatoo tunoyich ne qaawoonaa ‘Ayihudeenaꞌo daggooch taatoo beetone’ getibee neechon Yerusaalemaa boonoshi keemmemmoyich, keemechinaꞌon ne kaacona yibbaatee beetone. Ebi mooyo taatoo waan shago qayaachemmone; ebich ne waataa, echeebone” ii beetone.

⁸ Tawoo “Ne, ne mulloochee shiyetoani, ebi ne gettetoommon tuneti mooyo aalloone” iyaꞌa wochoon biich daachiiho.

⁹ Boonoshi bulliyoo noon shatiiya qaawiyeete. Ebiyoo “Boonoshi giidoo niretaa, shuunoo qannaachemmone” iꞌi boonoshi gabitoyichiye. Tunebaani ta, “Ta Nuggishoocho, taan kupphiibe” iyaꞌa corootiyo.

¹⁰ Kexo bi toommooch hicheechaa beeti, Mehixabeeli bushoochi bushoo Delayi bushoo Shemayaahi waan hammeho. Biyoo “Asheenaꞌo neen wuxiya woyemminaꞌone; xumoona neen wuxiya woyemminaꞌone. Ebich yaafee kexooch aashebone; shaaqqoonoo hicone” iye.

¹¹ Tunebaani ta “Taanoommi asho aash beddiye? Taanoommi asho bi kashoon wodiyoyich yaafee kexooch giyi beddiye? Ta giyaache” iyo.

¹² Ta toommooch keemoon bi keemmito, Xobbiyinaa Sanbalaxina gijjoona kemeteenani, Yeer waanee wocheyee bi qayon ariiho.

¹³ Gijjoona bi kemeeto, taan shatiyoyichiye; ebiyoo bi gettiton tuniyoona axaaxoon ta shuunemmonaa ta shigoon boonoshi gondiitaa, asheenaꞌo taan boonoshi gibeneyaachemmonoyich tuniyoyichiye.

¹⁴ Ta Nuggishoocho, ebi boonoshi tuniiti gonde mooyoyich Xobbiyinaa Sanbalaxinon qajjaahine; wotta taan shatiyoyich qaawiti, keemechi ure Noꞌadiyinaa bare keemechinaꞌonon qajjaahine.

Uxeroo Uxeretaa Qannoo

¹⁵ Uxeroo Eluuli agenee hiyaa uuchooch, aachaa gutte qemona qanniye.

¹⁶ No guudoona beeti aageteenaꞌo daggooch beeti no etteenaꞌo bulli ebin boonoshi waayehooba, shattiyeete; boonoshi gaboona oogichii yeelleheete; ebi shuunoo qannito, no Nuggishoochi gaachoona bi tunoon ariiheete.

^17-18 Xobbiyi Araahi bushoo Shekaniyichi bushee kenoone; wotta bi bushoo Yehohanaani Beraakiyi bushoo Meshulaamichi busheen shaaggitone. Ebich Yihudee asheenaꞌoochee meetinaꞌo Xobbiyina tookkii wogoon giyiyeete; ebina Yihudee ogoogeenaꞌo koorichoon biich daachii beeheete; bi waaneenoo koorichoo boonoshi waan waa beehe.

¹⁹ Bi deꞌittinoon ta aafoochaa yibbaatee beeheete; ta gettetonoo biich gettii beeheete; Xobbiyiyoo taan shatiyoyich koorichoon deejjii beehe.