Nehimi 5 - Kafa Linguistics Project

Girechinaꞌon Nehimi Gaacho

¹ Meeti asheenaꞌonaa boonoshi mecheenaꞌona Ayihudo tuneti, boonoshi maneenaꞌo toommooch oogichii cookiyeete.

² Boonoshi daggoochee ikkikkeenaꞌo “Anaami bushiishoonaa maache bushiishoona nooch meetone. Maaree kashoona no beeyemmoyich, maayoon dano nooch qaawiihe” ii beeheete.

³ Bareenaꞌo “Shaacooba, maayoon danoyich, no showoon, no woyinee goyoonaa no kexonon yechiito noone” ii beeheete.

⁴ Andoo bareenaꞌo wotta “Taatoyich gibiroon qocoyich, no showoonaa no woyinee goyoonon yechiyaꞌa gijjoon eretteto noone.

⁵ Andoo no maneenaꞌonaa noonna ikke meenonaa damoonon no tunetaa, no bushiisheenaꞌo boonoshi bushiishoomminaꞌo boonoshi tunetaanoona, ebiyoche no bushiisheenaꞌon guunonaa gonneena boonoshi tunemmoyich immaabeeto noone; no maache bushiisheenaꞌoocheenoo gonnee tunetinaꞌo beetinaꞌone. Bare asheenaꞌo no showoonaa no woyinee goyoonon boonoshi yechitoyich, hakka guutoon tuneto noone” ii beeheete.

⁶ Tawoo ebi mooyonaa boonoshi cookee qaaroonon ta waayehooba, oogichaa kaareho.

⁷ Ta mulloona kichaa ta kindiitoyee gubb, ogoogeenaꞌonaa ukkireenaꞌonon “Ittoshi ikkikkoona aabichiꞌi ittoshi xibeenaꞌo waanee erettoochee shimon deqqiyote?” iyaꞌa ittibateho; ebi mooyoyich dofee asheenaꞌon ceeggaꞌa iitoon kiciyo.

⁸ Boonoshich ishichiyo: “Aageteenaꞌoyich kecheti, Ayihudo tuneti no maneenaꞌon, nooch bi hakkeetoommon, biishehone; ittoshiyochi ittoshi maneenaꞌon ittoshi kemmiibeeto, wochinnoon no biishemmoyichiye?” iyaꞌa boonoshich getteho. Boonoshiyoo boonoshi gettemmon mucceꞌi cikkii qajjiyeete.

⁹ Daakkaꞌa ishichiyo: “Ittoshi tuniibeeti mooyo gaaweyaanoone; no etteenaꞌo tuneti aageteenaꞌo noon naagaachemmoyich, no Nuggishoon shatona beemo ittoshich qaawiyaache?

¹⁰ Taannaa ta maneenaꞌona, ta shuunechinaꞌonoo boonoshich maayoonaa gijjoonon erettiito noone; ebi hiishoyich shimon deꞌo qayone.

¹¹ Ittoshi deqqiti boonoshi showoon, woyinee goyoon, zayitee mixonaa kexonon wochibote; wotta gijjoochee, maayoochee, woyinee uyoonaa zayitoonoochee ittoshi qochiibee echeti shimon and wochibote” iyo.

¹² Boonoshiyoo, “Wochemmo noone; boonoshi waanee amoonolla echeyaachemmo noone; ne gettetoommon tuniyemmo noone” iyeete. Qeesheenaꞌon ceeggaꞌa, boonoshi aafoochaa ebi boonoshi gettiton boonoshi tuniyemmoyich, wogiiho.

¹³ Wotta ta tahee qodoon tebbaꞌa, “Ebi mooyon tuniyaani ashoon Yeeri bi kexonaa bi hajjitonoochee ebiyoommon biin tebbebe; ebiyoommon ooye; shokkoon echebe” iyo. Iitoo bulli, “Ameena” iye; Doono Yeerinoo galletehe. Asheenaꞌoo boonoshi giyiti wogoon ceechiyeete.

¹⁴ Ebiyee wotta Yihudee showooch showee iraashoo ta tunemmoyich taatoo taan iraashiiti aaboochee tiijjiꞌi, Arta Yekisesichi hiyinnee natoochee shaashaa guttinnee natooch beddaahaa aaraa gutte nati wottoon, taannaa ta maneenaꞌona showee iraashoo deqq bede mooyon deꞌaano noone.

¹⁵ Tunebaani tayee aaf beeti showee iraasheenaꞌo asheenaꞌo toommooch mooyon maggiitinaꞌone; maayoonaa woyinee uyoonoyee daakkiꞌi aabbe sheqeelee birewoon deqqii beeheete; boonoshi naayinaꞌoo asheenaꞌo toommooch doonjee beeheete. Tunebaani ta, Yeerin ta shattetoyich, ebiyoommon tuniyaano taane.

¹⁶ Wotta ta gaboon uxeroo waan wochaa, kupphiyaꞌa shuuneho. Ta asheenaꞌo bulli arooch kiceeꞌi shuunoon shuunee beeheete; goyee budon kemeyaano noone.

¹⁷ Wotta no guudoona beeti aageteenaꞌoochee no waan waatinaꞌo giyaanoon, Ayihudeenaꞌonaa ukkireenaꞌonoochee balli aache asheenaꞌo ta madoochee maa beeheete.

¹⁸ Qemi qemona ikkikke gattoonaa shiritti shiritte awuyi bagoona, aashiri aashire qemonoo baribare wodde woyinee uyo qannii beehe; wotta taach baakkoo qannii beehe. Tunebaani mooyo bulli asheenaꞌon bi maggetoyich, showee iraashoo deqq bede mooyon ciroona boonoshin echaa ariyaano taane.

¹⁹ Ta Nuggishoocho, hini asheenaꞌoyich ta tuniito bullich deꞌoon taach gabibe.