Nehimi 4 - Kafa Linguistics Project

Xaqqee Uxeroo Shuuneyaachemmoyich Qiicceeti Qiicco

¹ Sanbalaxi, uxeroon no uxeroon bi waayehooba, oogichii kaarehe; ippeenoo iye; Ayihudeenaꞌonoo coonehe.

² Bi maneenaꞌonaa Shamaaree ginee naayinaꞌonochi aafoochaa, “Hini yiingaalli Ayihudeenaꞌo, amooniye boonoshi shuuneebeeto? Uxeroon wochi uxereyane boonoshi ii beeto? Deejjoon giddiyane boonoshi ii beeto? Ikke qemona shuune ciicheheete? Ebi dolleeti guudoo miccitoochee xaqqeenaꞌon kichiꞌi, shuunoyich gaaccemmon tuniyoon hakkeheete?” iye.

³ Amoonee asho Xobbiyi bi gaꞌooch neexeechii, “Xaqqoona boonoshi uxereebeeti uxerooch boqqello keyigaata, shekiremmone” iye.

⁴ Tawoo ishichaꞌa corootiyo: “No Nuggishoocho, hoxeeto noone. No qolloon waayebe; boonoshi naagoon boonoshi toommooch wochi ukiibe; bare showooch kecaa boonoshi hammemmoyich, boonoshi bokkeyemmoyichoo tuniibe.

⁵ Shuunechinaꞌo aafoochaa neen ippiitinaꞌone. Ebich boonoshi gondoon qeriyaahine; boonoshi axaaxoonoo ne aafoochee hidi aalliyaahine” iyo.

⁶ Uxeroonoo uxerehon. Asheenaꞌo mulloochee tiijjiꞌi boonoshi shuunetoyich, uxeree neexo qatooch beddiye.

⁷ Sanbalaxi, Xobbiyi, Arabeenaꞌo, Amooneenaꞌonaa Ashidoodi asheenaꞌona Yerusaalemi uxeroo uxeree bi hamon, uxeree aahoo dooggii dooggii hammiibeeto bi tunoon boonoshi waayehooba, oogichii kaareheete.

⁸ Yerusaalem waaree boonoshi kochemmonaa shiribbiree boonoshi shaccemmonoyich, ikkittinoona koceeheete.

⁹ Ebich no Nuggishoo waan corootiyon; boonoshi waanee noon boonoshi quyemmoyich, quyechinaꞌon xumoonaa areddoonon neechiyon.

¹⁰ Arooba Yihudee asheenaꞌo “Magge shaagoon shaaggii beetinaꞌochi giidoo qajjitone; happeeti uxeree burico woddetone. Ebich uxeroon uxeroo hakkaachemmo noone” iyeete.

¹¹ Wotta no etteenaꞌo “Boonoshi beegaan beetaa, boonoshi ariyaan beeteenoo, boonoshi daggooch giyiree boonoshin wuxemmo noone; shuunoo neexemmoyichoo tuniyemmo noone” ii beeheete.

¹² Boonoshi gaꞌooch beeti Ayihudeenaꞌo waaꞌi, no etteenaꞌo bulli xaaꞌoona waaree noon kocha ii beetinaꞌo boonoshi tunoon wochii wochii nooch gettiyeete.

¹³ Ebich uxeree gubb waan, deshi qachi aahe xaaꞌooch boonoshi goraadoon, boonoshi ginoonaa boonoshi maꞌoonon yechiyaꞌa, asheenaꞌon boonoshi yaroona boonoshi yeshi yesh boonoshi neexemmoyich tuniiho.

¹⁴ Aroochee mooyon ta ciinnetoyee gubb, ogoogeenaꞌonaa ukkireenaꞌonoyich, echeti asheenaꞌoyichoo ishichiyo: “Boonoshin shattaahote; oogoonaa shattiitona tuneti Doono Yeerin gabibote. Ittoshi maneenaꞌoyich, ittoshi anaami bushiishoonaa maache bushiishoonoyich, ittoshi mecheenaꞌonaa ittoshi kexonoyicha getiree koyebote” iyaꞌa boonoshich getteho.

¹⁵ No etteenaꞌo ebi boonoshi mooyo no waan shagon, wotta Yeeri boonoshi gaboon duubo bi tuniyoon waayeheete. No bulliyona uxeroon uxerooch, no ikkikkoona no shuuni shuunooch wottehon.

^16-17 Aroobee aaboochee tiijjiꞌi, ta asheenaꞌoochee qatinaꞌo shuunoon shuunee beeheete; qatinaꞌo wotta getee ginee tahoon tahee, ginoon, gaachoonaa maꞌoonon yechiꞌi neexeheete. Uxeroon uxereebeeti Yihudee asheenaꞌo bullichi hillooch ukkireenaꞌo neexee beeheete. Magge shaagoon shaaggii beetinaꞌo ikke kishoona shuuneebee, wotta ikke kishoona boonoshi ginee qiicoon yechii beeheete.

¹⁸ Gimbeynoo bulliyoo bi ikkikkoona bi goraadoon bi naabooch kareꞌi shuunee beehe. Tunebaani tiroon (waaringoon) huggecho bi beeto, ta gaꞌoochiye.

¹⁹ Aroochee ogoogeenaꞌonaa ukkireenaꞌonoyich, wotta echeti asheenaꞌoyich ishichiyo: “Shuunoo oogetonaa gaminoonane. Nowoo uxeree shuunooch shacaꞌa, noonnaa noonna woheeto noone.

²⁰ Tiree qaaroon ittoshi waayegaata, no waan kiceebote; no Nuggishoo no qoodoyich koyemmone” iyaꞌa boonoshich getteho.

²¹ Ebich qatinaꞌo ginoon yechiꞌi quyee beetaa, haree gaargaaroochee tiijjiꞌi xojjeno xuupphimmi wottoon, shuunoon shuunehon.

²² Wotta arooba, asheenaꞌoyich “Ittoshi naayinaꞌona tookki Yerusaalem qebote; xumoon noon quyebote; areddoonoo shuunoon shuunebote” iyaꞌa getteho.

²³ Tawoo tunebon, ta maneenaꞌo, ta shuunechinaꞌo tunebeeta, taan dabbiibeeti, taan quyechi ginee naayinaꞌo, koniyoona tahoon shootaanoone; asho bi ikkikkoona bi ginee qiicoon bi kishooch yechii beehe.