Nehimi 13 - Kafa Linguistics Project

Dallaawe Asho Bullin Ayihudeenaꞌo Kichoo

¹ Arooba Muusichi macaafoon asheenaꞌoyich waayiiꞌi shemmeheete. “Amooneenaꞌonaa Moꞌabeenaꞌona Yeer asheenaꞌochi ikkittinee daggooch ciroona giyaayeete” ii beeto are macaafooch kooreeꞌi danehe.

² Ebiyoo Israꞌeeleenaꞌoyich koshonaa aaconon giddiyoo boonoshi qajjitoyich, wotta boonoshin bi uppemmoyich Balaamin gijjoona boonoshi kemetoyichiye; tunebaani no Nuggishoo ufon diiroona shaddiye.

³ Ebi are sheeroon boonoshi waayehooba, bacceeti dallaawe asho bullin Israꞌeeleenaꞌo daggoochee kichiyeete.

Yeerichi Kexooch Maddee Beetinaꞌoyich Tunemmi Qoodoo

⁴ Ebiyee aaf, no Nuggishoo qiicee kexooch ukkireti, qeeshee guudo Eliyashibi Xobbiyina tookkii xibetone.

⁵ Biyoo, ebiyee aaf Leweenaꞌoyich, shoddechinaꞌonaa kellechinaꞌonoyich, sheeroo gettii beetoommon, icheti maayee buuro, ixaano, yaafee kechi qiiceenaꞌo, asraato icheebeeti maayo, woyinoonaa zayitoona, wotta qeesheenaꞌoyich icheti wojjoo koteebeeti ooge gatoon qanniiꞌi, Xobbiyich immitone.

⁶ Tunebaani ta, Baabloonee taatoo Arta Yekisesi taateti shaashaa guttinnee natooba taatoo waan ta hammetoyich, arooba Yerusaalem aallo taane. Giisheche yemeenoyee gubb taatoo waanee daaggoon echaꞌa,

⁷ Yerusaalem wottaa waaho. Yeerichi kechi qiicee kexooch bi beeyemmi gatoon Xobbiyich imona Eliyashibi gonde shuunoon bi shuunoon ariiho.

⁸ Oogichaꞌa ippeho; Xobbiyi kechi qiicoon gatoochee kichaa maaxooch duppeho.

⁹ Gateenaꞌonoo boonoshi xalliyemmoyich getteho; yaafee kechi qiiceenaꞌon, maayi buuroonaa ixaanoonon wochaa kexooch giijjiyo.

¹⁰ Wotta Leweenaꞌoyich boonoshi qoodoo icheyoo bi qajjitoyich, maddeebeeti Leweenaꞌonaa shoddechinaꞌona boonoshi goyi goyooch boonoshi wottoon waayeho.

¹¹ Ebich “Yeerichi kechi shuunoo amoyich echehe?” iyaꞌa ukkireenaꞌon kaareho. Aroochee Leweenaꞌonaa shoddechinaꞌonon kicaꞌa, boonoshi shuuni shuunee xaaꞌooch neechiyo.

¹² Arooba Yihudee asheenaꞌo bulli, maayoochee, woyinoonaa zayitoonoochee asraatoon qiicee kexinaꞌooch deebiyeete.

¹³ Qiicee kexinaꞌoochoo qeeshoo Shelemaayin, Muusichi Sheeree dojjechi Sadooqinaa Leweenaꞌo daggoochee Fedayinon ukkiriiho; wotta boonoshin bi gaachemmoyich, Mataniyi bushoochi bushoo, Zakuuri bushoo Hanaanin ukkiriiho; boonoshin ta ukkiriito, gibeneetinaꞌo tuneꞌi boonoshi danetoyichiye. Boonoshi shuunoo, maayoon boonoshi maneenaꞌoyich qoodoone.

¹⁴ Ta Nuggishoocho, ebich taan gabibe. Ta Nuggishoo ne kexonaa arooch shuuneebeeti maddoonoyich ta shuuneti deꞌe shuunoon ne macaafoochee hidi aalliyaahine.

Shambetee Aaboon Yaafeeton Tuniiꞌi Quyo

¹⁵ Ebiyooba Yihudee showooch shambetee aaboon oppoochaa woyinoon hiiccii beetinaꞌonaa maayoon, woyinee uyoon, woyinee yuunjoon, balaasoonaa baribare qiicoonon kurooch xaaniꞌi, Yerusaalem deebii beetinaꞌonon beeggeho. Tawoo “Shambetee aaboon maayoon kemmaahote; ittoshi qelloon ariibote” iyo.

¹⁶ Wotta Yerusaalem koteti, Xiroosee asheenaꞌo haashoonaa baribare qiicoonon deebii, shambetee aaboon Yerusaalemaa Yihudee asheenaꞌoyich kemmii beeheete.

¹⁷ Ebich Yihudee ukkireenaꞌon kaaraꞌa, “Shambetee aaboon eeꞌiyoona, ebi ittoshi shuuneebeeti gonde shuunoo, amoone?

¹⁸ No Nuggishoo gonde mooyo bullin noonnaa hini katemoonochi toommooch bi deebito, no qaabbechinaꞌo ebiyoommi gonde shuunoon boonoshi shuunetaa toone? Ittoshi wotta shambetoon eeꞌiyoona Israꞌeeleenaꞌo toommooch naxo daakkiree bi kindemmoyich tuniiniye ittoshi beeto” iyo.

¹⁹ Ebiyee gubb, shambetoo giyaan beetaa, showee shimmishimmooch, Yerusaalemi kelleenaꞌo hichemmoyich, wotta shambetoo kechimmi wottoon, boonoshi qecheyaachemmoyich getteho. Shambetee aaboon qiico shaagaa giyeyaachemmoyich, ta shuunechinaꞌoochee ikkikkeenaꞌona kelloon quyiiho.

²⁰ Ebich baribare qiicoon giixeebeeti giixechinaꞌo ikke wottoon woyee gutte wottoon Yerusaalemi uxeree maach qeyiyeete.

²¹ Tunebaani ta, “Gayee ciinooch ittoshi qeyiibeeto, amoyichiye? Ebiyoommi mooyon guttinnoon ittoshi tuniigaata, ta kishoochee beeggemmo ittoshine” iyaꞌa boonoshich kupphiyaa getteho. Aroyee hach shambetee aaboon wochinnoon waataaneenaꞌone.

²² Leweenaꞌo shambetee aaboon yaafeeton tuniiree boonoshi quyiyemmoyich, boonoshi qelloon boonoshi xalliyemmonaa kelleenaꞌon waaree boonoshi quyemmonoyich getteho. Ta Nuggishoocho, ebich wotta taan gabibe; ne maaree woddoommon taach ariqqebe.

Dallaaweenaꞌona Tookkii Shaageyoo Bacho

²³ Wotta aroobee aabooch Ashidoodee showoochee, Amoonee showoonaa Moꞌabee showoonoochee mecheen shaaggiti Ayihudeenaꞌon beeggeho.

²⁴ Boonoshi bushiisheenaꞌoochee qatinaꞌo yibbaateebeeto, Ashidoodee noonoon woyee bare showee noonoonani, Ayihudee noonoon toonoone.

^25-27 Boonoshin kaareho; uppeho; ikkikkeenaꞌonoo yexxeho; boonoshi qelloonoo shetteho; ishichaanoo iyo: “Israꞌeelee taatoo Solomooni axaaxoon bi shuuneto, ebiyoommi dallaawe maacheenaꞌochi naboona toone? Biinoommi taatoo meeti aageteenaꞌo daggooch aabiichona aalloone; biyoo bi Nuggishoona shuchetone; Yeeri Israꞌeelee showoo bulliich biin taatiitone; tunebaani dallaawe maacheenaꞌo biin muriciiꞌi axaaxooch yaabiyeete. Ittoshiyoo dallaawe maacheenaꞌon shaagona, ebi shaahe gonde mooyon ittoshi tuniyoon, no Nuggishoyichoo gibeneyee ittoshi qayon waayi beddoone? Ittoshi maache bushiisheenaꞌon boonoshi anaami bushiisheenaꞌoyich immaahote; boonoshi maache bushiisheenaꞌon ittoshi anaami bushiisheenaꞌoyichoo shaakkiyaahote; ittoshiyoo shaaggaahote” iyaꞌa Yeeri aafooch boonoshin wogiiho.

²⁸ Qeeshee guudo Eliyashibi bushoo Yoyaadi yaroochee ikkoo, Horoonee asho Sanbalaxichi maache busheen shaaggitone. Tawoo ta waanee biin yookkeho.

²⁹ Ta Nuggishoocho, qeeshittinee maddoon boonoshi eeꞌitoyich, wotta ne qeesheenaꞌonaa Leweenaꞌonochi wogoon boonoshi happitoyich, boonoshi shuunoon batteyaahine.

³⁰ Ebina dallaawe mooyo bulliichee asheenaꞌon xalliiho. Aroochee qeesheenaꞌonaa Leweenaꞌonon boonoshi shuuni shuunee xaaꞌooch neechiyo;

³¹ taajji taajjee aabooba waabeeti shookkeyemmi michichonaa maayi cilloochonon qociiho. Ta Nuggishoocho, deꞌoon taach gabibe.