Nehimi 1 - Kafa Linguistics Project

Nehimi Corootiti Corooto

¹ Hakaliyi bushoo Nehimichi qaaro: Hiyinnee natooch, Kisilewi agenooba tuneti mooyo ebine: Inde katemoo Suusa ta beetaa,

² ta maneenaꞌoochee ikkoo tuneti Hanaani, giisheche asheenaꞌona tookkii Yihudee showoochee waahe. Tawoo kecceyoochee muriccii echeti Ayihudeenaꞌo mooyonaa Yerusaalemi mooyonon boonoshin echeho.

³ Boonoshiyoo “Are woraafooch beeti, kecceyoochee echeti asheenaꞌo ooge xuuxoonaa cooneyoonoochiye boonoshi beeto; Yerusaalemi xaqqee uxeroo happeetone; bi kelloo qaaqqoona miccitone” iꞌi taach gettiyeete.

⁴ Ebi mooyon ta waayehooba, kotaachaa eeppeho; meeti aaboon muusheneho; shimaajji Nuggishoo aafooch coomaa corootaa beeho.

⁵ Tawoo ishichiyo: “Shimaajji Nuggishoo Doono Yeero, neen shunnii beetinaꞌonaa ne getoon quyee beetinaꞌonoyich ne giyeti wogoon ceechaabeeti, kuxeyaani ne shunoonoo bekkiyaabeeti, oogoonaa shattiitona tuneti Nuggishoocho,

⁶ ne guuno ta xumoonaa areddoonon, ne guuno tuneti Israꞌeeleenaꞌochon ne aafooch ta corootaabeeti corootoon elle waayebe; taanoo ciine. Israꞌeelee asho no, axaaxoon shuunoona neen no xuqqeti xuꞌoon aannaabeeto taane. Taannaa ta qaabbechinaꞌochi kechi asheenaꞌona neen xuqqeto noone.

⁷ Ne toommooch oogeton shixxiiti gonde mooyon shuuneto noone; ne guuno Muusich ne getteti getoon, qociyoonaa doyoonon quyeyaano noone.

^8-9 “Ne guuno Muusich ‘Taach gibeneeto tuno ittoshi qayigaata, aageteenaꞌo daggooch ittoshin shaccemmo taane; tunebaani ta waan ittoshi wottegaata, ta getoon ittoshi quyegaata, ceechi gaatoo, ittoshi shiijjereenaꞌo showee tuggooch beddaahaa boonoshi shacetaanona, aroochee boonoshin kicemmo taane; ta shigo ceekkemmoyich ta kaacceti xaaꞌooch boonoshin deebemmo taane’ iyaꞌa ne getteti qaaroon ne gabemmoyich qollehoye.

¹⁰ “Boonoshiyoo ooge ne hakkoonaa kupphe ne mochoona ne biisheti ne guuninaꞌonaa ne asheenaꞌonane.

¹¹ Ta Doonocho, ne guuno ta corootoonaa neen oogiyoyich shunniibeeti ne guuninaꞌochi corootoonon elle waayebe; hanaachoo ne guuno taach kaachiree, hini uroo aafooch ne ariqqoon taach bekkiibe” iyo. Arooba tawoo taatoochi xoofecho taane.