Naahoomi 3 - Kafa Linguistics Project

¹ Damoon ukkoonaa kootona ceenneti, bogona aricheti, kecceti wodde qiicoona ceenneti, katemeyich woowo!

² Arengee xuupphi qaaro, gaari gengeenaꞌochi qaaro, hareshee galabee qaaroonaa, quttiibeeti gaarichi qaaroona waayeehe.

³ Hareshecho guubbiye; goraado tiikkii, ginoo wacciye; dofee asho qitiye; dubeno guteehe; asheenaꞌo ebi dubenoona tepheeheete.

⁴ Nanawi katemee yahechi ureyoommi bi tunetoyich, Doono Yeeri biin naxee beetone; macecikkitonaa ashoon wuxiibeetona tuneti qaaxoona ceennetine; bi qaaxoona aageteenaꞌon bi waan giddiyaꞌa, bi guunon tuniihan.

⁵ Beshe Mawe Doono Yeeri ishichiye: “Ittoshi toommooch tiyeto taane; ittoshi marixxoon kaama shootiree, aageteenaꞌo ittoshi achoon beeggemmoyich tuniyoona, ittoshin yeelliyemmo taane.

⁶ Guudoon ne toommooch duppemmo taane; neen hoxemmo taane; neenoo cooniyemmo taane.

⁷ Neen ciinnii beetinaꞌo ne waanee kishebee, ‘Nanawi tiishetine; biich eeppemmo konine?’ gettemminaꞌone. Biin goggiyemmon amoochee danehote?” iye.

⁸ Nanawi katemeene, ne, Abbaayi aachi gaꞌooch beeti, bi guudoona aaco beeti, baharo bi deebo, aacoo bi xaqqee uxeroo tuneti, Tebeesi katemeyee beshenne?

⁹ Topphiyoonaa Gibitsee showoona ciiraalli bi giideenaꞌone; Fuuxee showoonaa Liibiyee showoona bi yeshechinaꞌone.

¹⁰ Tunebaani Tebeesee asheenaꞌo kecaa hammiyeete; boonoshi showoochee kechiyeete; gommi addibaaboochaa, boonoshi gaggereenaꞌo ceqqetaa qitiyeete; aricheti boonoshi asheenaꞌo qoqqaannoona cucheheete; woraafa getteeti boonoshi asheenaꞌon ixoona qoodeeheete.

¹¹ Ittoshiyoo ebiyoommon, masheree shaaweyemmo ittoshine; ittoshi etteenaꞌo waanee aashe ittoshi wodemmi xaaꞌoon qaawemmo ittoshine.

¹² Ittoshi mishigeenaꞌo bulli, shuurikkigaata, ashi kookkooch holliibeeti, shiichii aafeti balaasee michi aafoomminaꞌone.

¹³ Ittoshi ginee naayinaꞌo maacheyoomminaꞌone; ittoshi showooch giyeebeeti kelleenaꞌo, ittoshi etteenaꞌoyich gamichaa qecheetinaꞌone. Boonoshi tuggeenaꞌon qaaqqoo michii aalliitone.

¹⁴ Ittoshi etteenaꞌo ittoshi katemoon giichii yechiyoobich, ittoshi uchemmi aacon kitote; ittoshi mishigoon manjiibote; nuuqqoo beetooch hamiree, dengoon kotebote; xuuboon shuunebote.

¹⁵ Qaaqqoo ittoshin maayemmone; goraadoo ittoshin ciichemmone; gechoo maayoon aalliyoommon ittoshin aalliyemmone. Ittoshiyoo gechoo meetoommon meettito ittoshine.

¹⁶ Shimaayooch beeti xojjeneenaꞌoyee beshoon, giixechinaꞌon ittoshi daggooch meechito ittoshine; tunebaani gechoo gaaxii aalliichii qoshoon yaggiꞌi biittii bi hamoommon hammitinaꞌone.

¹⁷ Ittoshin quyechinaꞌo gechoommi meetinaꞌo, ittoshi taatoochi naayinaꞌo, showoo aqqehooba xaqqee uxerooch koteebeeti dofee gechoomminaꞌone; aabo kechimmona biittii hammiyeete; amooch boonoshi hammito gaata, koniyoona ariyaache.

¹⁸ Asooree taatoocho, ne iraasheenaꞌo qititinaꞌone. Ne woraaferasheenaꞌo yacheetinaꞌone. Ne asheenaꞌo guudi toommooch shacetinaꞌone; boonoshin kicemmo koniyoona aalloone.

¹⁹ Ne mayo wodaachemmone; oogeti tiishoon tiisheto neene; ashi toommooch ne tuniiti kuxeyaani gonde mooyoochee, muriccito koniyoona aallo bi tunetoyich, ne aallee woroon waayemmo bulli, emiroona kishoon koppemmone.