Mishiraachechinaꞌo 9 - Kafa Linguistics Project

Yesuus Waan Sawuli Wotto

¹ Ebichi daggooch Sawuli “Boonoshin wuxi ciichemmo taane” iꞌi, Doono Yesuusichi dabbeenaꞌo toommooch daakkii miicheebee, qeeshee guudo waan hammiye.

² Hammiꞌi, “Damaasiqi katemooch beeti Ayihudeenaꞌo kiceebeeti kechi ukkireenaꞌoyich koorichoon kooriree taach imbe; arooch Yesuusichi gommon dabbii beetinaꞌon, anaaminaꞌo tunebeeta maacheenaꞌon yeshi cuyiree Yerusaalem deebona” iꞌi qollehe.

³ Aroochee hammiibee Damaasiqa bi katinnimmona, diqq shimaayoochee bekko bi guudoona waccii aaxxehe.

⁴ Sawuli bekkech showooch dihiichii, “Sawulo, Sawulo! Taan ne duꞌiibeeto amoyichiye?” iibeeti qaaroon waayehe.

⁵ Biyoo “Ta Doonocho, koni neene?” iꞌi echehe. Doono biich wochiꞌi, “Ne duꞌiibeeti Yesuusi taane.

⁶ And tiyiree katemooch gibe; ne tuniyemmo neech getteyemmone” iye.

⁷ Arooba Sawulina tookkii hammiibeeti asheenaꞌo qaaroon waayeebee koninolla beegaanoon, noonoo miimeꞌi neexeheete.

⁸ Sawuli bi dihitoochee tiyiye; bi aafoon bi gaxximmona, ciinnemmon qajjiye. Ebich asheenaꞌo bi kishoon yechiꞌi yaabiibee, Damaasiqa daammiyeete.

⁹ Biyoo maataanoon, uyaanoon, bi aafo ciinaanoonoo keejj qeyiye.

¹⁰ Are Damaasiqa Hanaani getteebeeti ikke Yesuusichi dabboo beehe; Doono yaaꞌoona Hanaano iꞌi ceeggiye. Biyoo “Ta Doonocho, amoone?” iye.

¹¹ Doono Yesuusi biich ishichiye: “Kaate tiyiree Kaamoo getteebeeti gommooch hambe. Arooch Yihudi kexooch beeti, Sawuli getteebeeti, ikke Xeriseesi katemee ashoon qaawibe. Biyoo corootee toommoochiye bi beeto.

¹² Wotta hini Sawuli wochinnoon ciinnemmoyich, Hanaani getteebeeti uro giyiꞌi, bi kishoon bi toommooch bi kotiitaa, [yaaꞌoona] beeggitone” iꞌi gettiye.

¹³ Tunetaa Hanaani wochiꞌi, “Ta Doonocho, hini uro Yerusaalem beeti yaafeeti ne asheenaꞌo toommooch ambiche gondoon bi shuuneto gaata meeti asheenaꞌo waanee waayeto taane;

¹⁴ wotta ne shigoon ceeggii beetinaꞌo bullin bi cuchemmoyich, qeeshee ukkireenaꞌo biin ukkiriiꞌi hiniich deejjitinaꞌone” iye.

¹⁵ Tunetaa Doono Yesuusi wochiꞌi, “Hini uro meeti Aageteenaꞌoyich, taateenaꞌoyich, Israꞌeeleenaꞌoyichoo ta shigoon bi arichiyemmoyich taach ta kaacceti qiicoone. Ebich bi waan hambe;

¹⁶ taachon miixeya ambiche xuuxoon bi beeggemmo gaata ta biich bekkiyemmo taane” iye.

¹⁷ Ebich Hanaani hammiꞌi are kexooch giyiye; Sawuli toommooch bi kishoon kotiiꞌi, “Ta manoo Sawulo! Wochinnoon ne aafo ciinnemmonaa Yaafe Ayaanoona ne ceennemmonoyich, ne waan Doono taan deejjitone. Biyoo hiniich ne waa beetaa, gommoochaa neech bekketi Yesuusine” iye.

¹⁸ Bekkech teepphee kongeroommo bi aafoochee holliye. Arooba bi aafo ciinniye; tiyiꞌi aacona afaalleehe;

¹⁹ maayoonoo maaꞌi kupphehe. Aroyee gubb Sawuli Damaasiqa beeti Yesuusichi dabbeenaꞌona tookkii giisheche aaboon kotehe.

Damaasiqaa Yesuusichi Wochoon Sawuli Geto

²⁰ Boonoshina tookkii beebee, Ayihudeenaꞌo kiceebeeti kexinaꞌoochaa Yesuusi Yeerichi Bushoo bi tunoon gettii beehe.

²¹ Waayetinaꞌo bulli worganeheete. “Hini uro Yerusaalem beeti hini shigoon ceeggii beetinaꞌon aalliito toone? Hiniich bi waato, boonoshin cuyiree qeeshee ukkireenaꞌo waan daamma toone?” iyeete.

²² Tunetaa Sawuli kupphee kupphee waahe; Damaasiqa beeti Ayihudeenaꞌoyich Yesuusi aroo Kiristoosi bi tunoon xiishii arichiibee, boonoshi gettemmon muccii beehe.

²³ Meeti areddoyee gubb Ayihudeenaꞌo Sawulin wuxiya echeeheete.

²⁴ Sawuli boonoshi echeyoon waayehe. Boonoshiyoo Sawulin wuxiya xumoonaa areddoonon katemee kelloon manjiiꞌi quyee beeheete.

²⁵ Tunebaani Yesuusichi dabbeenaꞌo xumoona Sawulin daammiꞌi, mokkooch geddii xaqqee uxeree gutte daggeexi aahoona beshiiꞌi woderoona kindiiheete.

Sawuli Yerusaalem Hamo

²⁶ Sawuli Yerusaalem hammiꞌi, arooch beeti Yesuusichi dabbeenaꞌo daggooch bacceya qaawiye; tunebaani boonoshi bulli Yesuusichi dabboo bi tunoon iberiyoo boonoshi qajjitoyich shattiyeete.

²⁷ Tunetaa Barnabaasi Sawulin daammiꞌi, mishiraachechinaꞌo waan shakkiihe. Aroochee Doono Yesuusin gommoochaa bi beegonaa Doono biich bi getonon, wotta Damaasiqi katemooch aafoon kuppheꞌi Yesuusichon bi getonoo gettiye.

²⁸ Ebiyee gubb, Sawuli Doono Yesuusichi shigoona aafoon kuppheꞌi gettiibee, boonoshina tookkii Yerusaalem kechii giyiibee beehe.

²⁹ Wotta Giriikee noonoon ariibeeti Ayihudeenaꞌoyich gettii boonoshina tookkii gajjitee beehe; tunetaa biin wuxiya qaawiyeete.

³⁰ Arooba maneenaꞌo ebin ariiꞌi Qesaariya daammiyeete; aroochee Xeriseesi daachiiheete.

³¹ Arooba Yihudee showoo, Galiilee showoonaa Shamaaree showoo bullinooch beeti kittinnee guuphinaꞌo shatoochee kasheheete, manjiyeete; Doonoyichoo hajjeebee Yaafe Ayaanoona goggeebee qeyii qeyii meettiyeete.

Kiristoosichi Giidoona Pheexiroosi Tuniiti Gaakkechi Gutte Mooyo

³² Arooba Pheexiroosi bulli xaaꞌooch guuddiibee, Liidi katemooch beeti yaafeenaꞌo waan hammiye.

³³ Are xaaꞌooch ashittinoon wuxiibeeti biiyoona shimitte naton beerooch qeyiꞌi beeti, Eeniyi getteebeeti ikke uroon danehe.

³⁴ Biinoo ishichiye: “Eeniyoo, Yesuus Kiristoosi neen wodiitone. Tibe, ne qeenon yaggibe” iye. Aroo bekkech tiyiye.

³⁵ Liidinaa Shaarooninooch beetinaꞌo bulli hini are woditi uroon beeggiꞌi, Doono Yesuus waan wotteheete.

³⁶ Arooba Yoopphi katemooch Xaabbiti getteebeeti, ikke Yesuusichi dabbee beehan. Bi shigo Giriikee noonoona Doriqi getteehe. Areyoo bulli aaboon deꞌe mooyon shuunaabee, iriteetinaꞌon gaachaabee beehan.

³⁷ Ebi ureyoo ikke areddoon biiyaꞌa qitiyan; bi dubenoon machiꞌi kechi toommeexi kexooch geddiyeete.

³⁸ Liidi Yoopphi katemoyich katino bi tunetoyich Yooppha beeti Yesuusichi asheenaꞌo Pheexiroosi Liida bi beemon waayeꞌi, gutte asheenaꞌon wochee daachiiꞌi kaate boonoshi waan bi woyemmoyich Pheexiroosin qolleheete.

³⁹ Bekkech Pheexiroosi tiyiꞌi, boonoshina tookkii waahe. Waa bi shaggimmona, asheenaꞌo kechi toommeexi kexooch biin daammiyeete. Xuume maacheenaꞌo bulli eefeebee, Doriqi kashoona beebee boonoshich bi shuuneti qamisoonaa bare tahoonon kichiꞌi yaachii Pheexiroosich bekkiibee bi guudoona neexeheete.

⁴⁰ Aroochee Pheexiroosi bullin maach kichiichii, guteneꞌi corootiye. Bi corootitoyee gubb, dubeno waan wotteꞌi, “Xaabbite, tibe” iye. Bekkech bi aafoon gaxxiyan; Pheexiroosin ciinnaꞌa tiyaa kotahan.

⁴¹ Biyoo bi kishoona yechiꞌi tiijjii neechiye; xuume maacheenaꞌon bare kittinneenaꞌona tookkii ceeggiꞌi, “Ebiyoche, kashechine” iꞌi boonoshich bekkiihe.

⁴² Ebiyee gubb, Yooppha beetinaꞌo bullich hini mooyo waayeehe. Ebina meeti asheenaꞌo boonoshi mulloon Doono Yesuusi toommooch tooꞌiiheete.

⁴³ Pheexiroosiyoo Yooppha Simooni getteebeeti, gooqqoon quccechi ikke uroona tookkii meeti aaboon kotehe.