Mishiraachechinaꞌo 8 - Kafa Linguistics Project

¹ Arooba Sawuli “Asheenaꞌo Isxifanoosin boonoshi wuxoo tatoone” itone. Ebi arooba Yerusaalem beeti Yesuusichi asheenaꞌo toommooch oogeti duꞌo waahe. Mishiraachechinaꞌoyee damba Yesuusichi asheenaꞌo bulli Yihudee showoonaa Shamaaree showoonooch shaceheete.

Yesuusichi Asheenaꞌo Yookkeꞌi Shaco

² Ikkikke Yeerich qeyiti asheenaꞌo Isxifanoosin duukkiyeete; ooge eefonoo eeppiyeete.

³ Tunebaani arooba Sawuli Yesuusichi asheenaꞌon kachaa kashoon tuushiiꞌi iritii beehe; boonoshi kexi kexooch giyiꞌi maacheenaꞌonaa anaaminaꞌonon shotti shottee kichiꞌi cuyee kexooch daammii cuchii beehe.

Shamaaree Showooch Mishiraachee Qaaro Getteyoo

⁴ Hini shaceti asheenaꞌo boonoshi hammito bulliich Yeerichi qaaroon gettiyeete.

⁵ Arooba Filipphoosi Shamaari katemooch hammiꞌi Kiristoosichon gettiye.

⁶ Asheenaꞌo Filipphoosi yibbaatoon waayeꞌi, bi tuniibeeti gaakkechi malletoonoo beeggiꞌi, bi gettii beeton ikkooch ibere mulloona elleheete.

⁷ Ebiyoo yinneenaꞌo oogeti qaaroona cookiibee meeti asheenaꞌo toommoochee boonoshi tiyitoyichiye; boonoshi ashittino qititi meeti asheenaꞌo, baata yesheenaꞌoo woditoyichiye.

⁸ Ebich Shamaara beeti asheenaꞌo oogichii emiriyeete.

⁹ Arooba are katemooch Simooni getteebeeti ikke uro beehe. Biyoo, bi kaayiibeeti kaayoona Shamaaree asheenaꞌon worganikkiibee echetone; aroo wotta “Ta oogoo taane” ii beehe.

¹⁰ Gishiishoochee tiijjiꞌi ogoogooch beddaahaa boonoshi bulli “Hini uro Oogeti Giidecho getteebeeti Yeerichi giidoone” iibee ikkooch tuneꞌi waayee beeheete.

¹¹ Meeti yemeenoon bi kaayaa beeggitinaꞌo worganeebee, bi getoon waayee beeheete.

¹² Tunebaani Filipphoosi Yeerichi taatittineechonaa Yesuus Kiristoosichi shigeechonon boonoshich mishiraachee qaaroon bi getaa waayeꞌi, boonoshi mulloon Yesuusi toommooch tooꞌiiti maacheenaꞌonaa anaaminaꞌona aacona afaalleeheete.

¹³ Simooniyoo wotta bi mulloon Yesuusi toommooch tooꞌiiꞌi aacona afaalleehe. Filipphoosi hammimmooch dabbiibee bi tuniibeeti malletoonaa gaakkechi mooyonon beeggiꞌi worganee beehe.

¹⁴ Arooba Yerusaalem beeti mishiraachechinaꞌo Shamaaree asheenaꞌo Yeerichi qaaroyich deꞌa geton waayeꞌi, Pheexiroosinaa Yowannisinon boonoshi waan daachiiheete.

¹⁵ Boonoshiyoo hammiꞌi, Yaafe Ayaano boonoshi toommooch bi kindemmoyich corootiyeete;

¹⁶ ebin boonoshi corootito, Shamaaree asheenaꞌo Doono Yesuusichi shigoona aacona afaalleeteetalli, Yaafe Ayaano boonoshi toommooch batt kindoo bi qajjitoyichiye.

¹⁷ Arooba Pheexiroosinaa Yowannisina are asheenaꞌochi toommooch kishoon boonoshi kotiitaa, Yaafe Ayaano boonoshi toommooch kindiye.

¹⁸ Mishiraachechinaꞌo ashi toommooch kishoon kotiitaa, Yaafe Ayaano kindoon Simoon beeggiꞌi gijjoon kichii,

¹⁹ “Ta kishoon bi toommooch ta kotiimmi asho bulli toommooch Yaafe Ayaano bi kindemmoyich, taach hinoommi giidoon imbote” iye.

²⁰ Arooba Pheexiroosi tiyiꞌi ishichiye: “ ‘Yeerichi wojjoon gijjoona danebona’ iyaꞌa ne gabitoyich ne gijjoo neenna tookkiree aallebe!

²¹ Ne mullo Yeeri aafooch kaamoo toonoone; ebich hini shuunee gogecho tunoon hakkaachine.

²² Illa hini xumme ne gaboochee Yeer waan wottebe. Yeerin ne qolletaa, diqqich ebi ne mullee gondoochee neen maaremmo tunemmone.

²³ Caammere qanaato ne mullooch ceenonaa axaaxee waanjee daggooch ne beemonon beeggaabeeto taane” iye.

²⁴ Aroochee Simooni wochiꞌi, “Hini ittoshi gettitoochee ikkolla ta toommooch bi shagaachemmoyich ittoshi taach Doono waan corootibote” iye.

²⁵ Pheexiroosinaa Yowannisina asheenaꞌoyich manjiiꞌi boonoshi miixetonaa Doonochi qaaroon boonoshi gettitonoyee gubb, Yerusaalem wotteebee Shamaaree showooch beeti meeti katemooch mishiraachee qaaroon gettiyeete.

Filipphoosi Topphiyee Iraashoyich Mishiraachee Qaaroon Geto

^26-28 Ikke areddoon ikke Topphiyee asho Yeerich goyinneya Yerusaalem hammiye. Hini uro guruushoone; Topphiyee taatee Hindeekichi araaqee iraashoone. Are uro bi hammitoochee bi showooch gaarina wotteebee, keemechi Isiyaasi kooriti macaafoon shemmee beehe. Arooba Doonochi maraakoo Filipphoosin “Tiyiree deshi-waan, Yerusaalemee Gaaza daammiibeeti gommooch hambe” iye. Are gommo barahee gommone. Biyoo tiyiꞌi hammiye.

²⁹ Arooba Filipphoosin Yaafe Ayaano “Gaari toommooch beeti uro waan giddebe” iye.

³⁰ Filipphoosiyoo woccii hammiꞌi, uro keemechi Isiyaasi kooriti macaafoon bi shemmee beetaa waayehe. Aroochee “Iberoon ne shemmaabeeto ne mullooch giyii beete?” iꞌi echehe.

³¹ Aroo wochiꞌi, “Taach kaachi gettemmi asho aalloon aabichiree ta mullooch giyehe?” iye. Gaariich keyiree biinna tookki bi kotemmoyich Filipphoosin qollehe.

³² Uro shemmeebeeti macaafee kuxo ebine: “Bago biin guuremmon bi dabboommon biin guuremminaꞌon dabbiye; bi eexon caggii beetinaꞌo aafooch cikkii qajjiibeeti bagoochoommon bi noonoon wochaanoone.

³³ Cooneehe; xuꞌee nalloon bi toommooch nalliyeete; ‘Bi kasho showee toommooch beeyaaye’ getaa bi bachetoyich, bi shiijjeroon konine haddoon hakkemmo?” ii beetoniye.

³⁴ Uroo Filipphoosin, “Keemecho koniniye bi gettiibeeto? Biiniyee barooniye bi gettiibeeto? Eke taach gete” iꞌi echehe.

³⁵ Filipphoosiyoo wochiꞌi are bi shemmeti macaafee kuxoochee tiijjiꞌi, Yesuusichon gettiibeeti mishiraachee qaaroon biich gettiye.

³⁶ Tookkii gommo hammiibee aaco beetooch shaggiyeete; uro tiyiꞌi, “Ebiyoche, hiniich aaco beete; aacona ta afaalleyaachemmoyich, taan bajjemmi mooyo amoone?” iꞌi echehe.

³⁷ [Filipphoosiyoo “Ceeni ne mulloon Yesuusi toommooch ne tooꞌiigaata, neen bajjemmi mooyo aalloone” iye. “Ta, Yesuus Kiristoosi Yeerichi Bushoo bi tunoon iberiihoye” iye.]

³⁸ Aroochee uro gaari neexemmoyich gettiye. Filipphoosinaa biinna gutteꞌi aacooch kindiyeete; Filipphoosiyoo biin aacona afaalliye.

³⁹ Aacoochee boonoshi kechimmona, Doonochi Ayaano Filipphoosin diqqoona tiijjiꞌi daammiye. Uroo guttinnoon biin beegaanoone; emiriibee bi gommon yechiye.

⁴⁰ Filipphoosi Azaxooni katemooch bi shago arichehe; aroochee Qesaariya bi shaggimmi wottoon katemoo bulliich mishiraachee qaaroon gettiibee beshee beehe.