Mishiraachechinaꞌo 7 - Kafa Linguistics Project

Isxifanoosi Yibbaateti Yibbaatoo

¹ Qeeshee guudo “Hini mooyo iberoone?” iꞌi Isxifanoosin echehe.

² Isxifanoosi wochiꞌi ishichiye: “Ta maneenaꞌonaa ta niheenaꞌonote, waayebote. Oogee yiirechi Nuggishoo, no nihoo Abrahami Karaan hammii koteyaan bi beetaa, Mesopotaamee showoochaa biich bekkeꞌi,

³ ‘Ne showoonaa ne xibeenaꞌona waanee keyiree ta bekkiyemmi showooch hambe’ iye.

⁴ “Ebich arooba Kalideenaꞌochi showoochee kechiꞌi, Karaan hammii kotehe. Aroochee bi nihoo qititoyee gubb, Yeeri biin kichiꞌi hanaach ittoshi beeti hini showooch deebii kotiihe.

⁵ Hiniichoo ikke ciix bede iristoonolla biich imaanoone. Tunebaani Abrahamich bushoo shiijjeyaan beetaa, ‘Hini showoon neennaa ne hillooch shiijjemmi ne yaroonoyich immemmo taane’ iꞌi gibenikkiye.

⁶ Wotta Yeeri ‘Ne yaroo ashi showooch shiqqoo tuneree beeyemmone. Are showee asheenaꞌo awudde balle naton guuno tuniiree neexi hajjemminaꞌone.

⁷ Tunebaani guuno tuniiree hajjemmi are showee asheenaꞌochi toommooch nallemmo taane; ebiyee gubb, ne yaroo keyiree hini xaaꞌoochaa taach goyinnemmone’ iꞌi gettiye.

⁸ Ebiyee gubb, Yeeri Abrahamina tookkii wogoon giyiye. Abrahamiyoo hini are wogoona dokireehe. Ebich Abrahami Yisaaqin shiyiꞌi shimitte qemooba dokiriye. Ebiyoommon Yisaaqi bi bushoo Yaaqobin dokiriye; Yaaqobiyoo no qaabbechinaꞌo tuneti aaraa gutte bi bushiisheenaꞌon dokiriye.

⁹ “Hini no qaabbechinaꞌo boonoshi manoo Yooseefina qanaateꞌi Gibits hammiibeeti giixechinaꞌoyich biin kemmiyeete. Tunebaani Yeeri biinna tookkii tunehe;

¹⁰ bi xuuxo bulliichee biin shiwee wodiihe. Gibitsee taatoo Farooni aafooch gidoonaa shalligoonon immiye. Hini are taatoo Yooseefin Gibitsee showoonaa bi kexo bullinooch iraashiihe.

¹¹ “Aroyee gubb Gibitsee showoonaa Kanaanee showoo bullinooch beeti asheenaꞌon duꞌiiti shaacoo giyaa, no qaabbechinaꞌo maayemmon mucceheete.

¹² Arooba Yaaqobi Gibits maayee beemon waayeꞌi, shiichii no qaabbechinaꞌo tuneti bi bushiisheenaꞌon are Gibits daachiihe.

¹³ Bi guttinnooba Yooseefi bi maneenaꞌoyich Yooseefi bi tunoon arichiihe; arooba bi yoodo Faroonich arichehe.

¹⁴ Ebichi hillooch Yooseefi bi nihoo Yaaqobin ‘Ne kechi asheenaꞌo bullin yeshiree Gibits wobe’ iꞌi wochiihe. Arooba Yaaqobichi kechi asheenaꞌo shabaa uuche asheenaꞌone.

¹⁵ Yaaqobi eboshina tookkii tiyii, Gibits hammiye; biinnaa no qaabbechinaꞌona aroochaa qitiyeete.

¹⁶ Boonoshi dubenoon Shekeem daammiꞌi Abrahami Hamoorichi bushiisheenaꞌo waanee bi gijjoona bi kemeti maashooch duukkiyeete.

^17-18 “Aroyee gubb Yeeri Abrahamich bi gibenikkiti yemeeno katinnimmona, Yooseefin ariyaani bare taatoo Gibits bi taatemmi wottoon, Gibits beeti no macceenaꞌo shiijjee meettiyeete.

¹⁹ Hini are taatoo no yareenaꞌoyich maroo halliꞌi no qaabbechinaꞌochi toommooch maacoo manjiye; boonoshi waanee shiijjemmi gaggereenaꞌon kashoona boonoshi beetaachemmoyich, ‘Maaxooch kichiree dufote’ iꞌi xuuxiihe.

²⁰ “Arooba Muusi shiijjehe; aroo Yeeri biinna emiriti bushoone. Biyoo bi nihoo kexooch keejje agenoon dicciye;

²¹ aree hillooch bi duppeeti xaaꞌoochee Faroonichi bushee danaꞌa tiijjaa daammaa, bi bushoon tuniiꞌa dichiyan.

²² Ebich Gibitseenaꞌo Muusich boonoshi ariyoo bullin dojjiyeete; aroo bi yibbaatoonaa bi shuunoo bullina giidechi asho tunehe.

²³ “Ebiyoommon Muusi bi shiijjeti aabbe natooba, bi maneenaꞌo tuneti Israꞌeeleenaꞌon beegga gabiꞌi, boonoshi waan hammiye.

²⁴ Boonoshi daggooch bi beetaa, ikke Gibitsee asho Israꞌeelee ashoon bi xuqqii beetaa beeggiꞌi gaachehe; Gibitsee ashoon wuxiꞌi xuqqeeti uroyich nichoon kichiye.

²⁵ Muusiyoo ‘Ta maneenaꞌo Yeeri boonoshin ta kishoona wodiyemmo tunoon shalligii beetinaꞌone’ iꞌi gabiye; tunetaa shalligaaneenaꞌone.

²⁶ Wotta dechara Israꞌeeleenaꞌochi daggoochee gutteenaꞌo boonoshinaa boonoshina kaaree beetaa beeggiꞌi, yeshi shuniiya iꞌi, ‘Hini asheenaꞌote, manaamanoo ittoshi amoyichiye ittoshi xuꞌee beeto?’ iye.

²⁷ “Are xuqqiibeeti uro, Muus waan wottee kishoona xuqqiꞌi, ‘No toommooch ukkiroonaa nallechona ne tunemmoyich, konine neen ukkiriito?

²⁸ Woyee yiich Gibitsee ashoon ne wuxitoommon, taan wuxiya qaawaa beetine?’ iye.

²⁹ Muusi ebin waayeꞌi Miidiyamee showooch maxxee hammii, shiqqoon tuneꞌi kotehe; aroochaa gutte bushoon shiyihe.

³⁰ “Muusi arooch aabbe naton bi kotetoyee gubb, Siini guudi gaꞌooch beeti baraheexi tusho qaaqqoo tuneꞌi aaxxeebeeti qaaqqee aaxxee daggoochaa maraakoon beeggiye.

^31-32 Muusiyoo bi beeggiti mooyoyich worganehe; manjii beegga giddeꞌi, ‘Ne qaabbechinaꞌo Abrahamichi Nuggishoo, Yisaaqichi Nuggishoo, Yaaqobichi Nuggishoo taane’ ii beeti Doonochi qaaroon waayehe. Muusiyoo shattii qewehe; manjii ciinnemmon mawiihe.

³³ “Aree hillooch Doonoo ‘Ne neexeti xaaꞌoo yaafeeti showoo bi tunetoyich, ne baateexi caammoon kichibe.

³⁴ Gibits beeti ta macceenaꞌochi xuuxoon manjii beeggaꞌa, kachaa kashoon mucceꞌi boonoshi gaashiron waayaꞌa, boonoshin wodiiya kindito taane. Andoo tibe! Gibits neen wochemmo taane’ iye.

³⁵ “Hini Muusi ‘Ukkiroonaa nallechona ne tunemmoyich konine neen ukkiriito?’ iꞌi boonoshi hoxeti uroone. Aroonoo tushee daggoochaa bi beeggiti maraakoo kishoona Yeeri ukkiroonaa wodiyechonon tuniiꞌi deejjiye.

³⁶ Biyoo boonoshin yaabiꞌi Gibitsee kichiye; Gibitsaa, Ceelle baharoonaa Siinee barahoonoochaa aabbe naton worganikkiti mooyonaa malletoonon bekkiihe.

³⁷ “Israꞌeeleenaꞌon ‘Yeeri, taanoommi keemechon ittoshi maneenaꞌochi daggoochee ittoshich kaaciree neechemmone’ iꞌi gettito hini are Muusine.

³⁸ Aroo no qaabbechinaꞌona tookkii barahooch kiceeti asheenaꞌo daggooch, wotta Siini guudoochaa biich gettiti maraakoona tookkii beetone. Kasho beeti qaaroonoo nooch imma Yeer waanee deqqito aroone.

³⁹ “Tunebaani no qaabbechinaꞌo hini are Muusin xuqqiyeete; ‘No toommooch ukkireyaache’ iꞌi boonoshi mulloona Gibits wotteheete.

⁴⁰ Wotta Haroonin ‘Hini Gibitsee noon kichiti Muusi amooch bi giyito gaata ariyaano noone; ebich no aafooch shiichemmi nuggisheenaꞌon nooch shuunebe’ iyeete.

⁴¹ Arooba maamon shaahiiꞌi shahalloon shuuneheete; biichoo deejjoon deejjiyeete; kishoona boonoshi shuuneti shuunoyich tiikkeshoo tiikkesheheete.

⁴² Ebich Yeeri boonoshin qajjiye; shimaajji xojjeneenaꞌoyich boonoshi goyinnemmoyich beshiiꞌi boonoshin immiye. Keemechinaꞌochi macaafooch bi kooreetoommon, ‘Yeeri “Hini Israꞌeeleenaꞌote! Aabbe naton barahooch ittoshi beehooba, deejjoonaa buuroonon ittoshi giddiito taachiye?

⁴³ Boonoshich goyinneya ittoshi shuuneti, Molooki duukkaanoonaa Refaani getteebeeti ittoshi nuggishoo tuneti xojjenee shaahiyoonon tiijjiꞌi shaaggiyote. Ebich Baabloonee showoyee bekk ittoshin yoohi daachiyemmo taane” iye.’

⁴⁴ “No qaabbechinaꞌo barahooch beehooba, Yeerichi miixee duukkaanoo boonoshina tookkii beetone. Are duukkaanoo Yeeri Muusich bekkiiꞌi gettitoommon shaahiitaa shuuneetone.

⁴⁵ No qaabbechinaꞌo wotta Yaasi boonoshin yaabee, Yeeri boonoshi aafoochee yookkii kichiti aageteenaꞌo showoon boonoshi yechiyooba, hini are boonoshi deqqiti duukkaanoon yechiꞌi giyiyeete; Daawiti yemeenooch beddaahaa arooch kotehe.

⁴⁶ Daawitiyoo Yeerichi aafooch gidoon daneꞌi, Yaaqobichi Nuggishoyich kexon hagga qollehe.

⁴⁷ Tunebaani Yeerich kexon haggito Solomoonine.

⁴⁸ “Tunetaa Beshoo Yeeri asho haggiti kexooch beetaache; keemecho gettitoommon,

⁴⁹ ‘Doono Yeeri “Shimaayoo ta taatee qeenone; showoo ta baatoo neexxemmi xaaꞌoone; taach am shaahe kexoniye ittoshi haggemmo? Ta kashemmi xaaꞌochi, amoommone?

⁵⁰ Eboshi bullin shuuneto ta kishoo toone?” itone.’

⁵¹ “Illa hini ittoshi mullo muumeti, ittoshi waamoo ulleti babbereenaꞌote! Ittoshi qaabbechinaꞌochoommon ittoshiyoo wotta bulli aaboon Yaafe Ayaanoyich deꞌa getaano ittoshine.

⁵² Keemechinaꞌo daggoochee ittoshi qaabbechinaꞌo duꞌiyaano koniniye? ‘Cadiqo woyemmone’ iꞌi shiichii gettitinaꞌon wuxiyeete. Bi waatenoo, ittoshi and biin beshiiꞌi immiyote, wuxiihote.

⁵³ Yeeri bi maraakeenaꞌo kishoona bi immiti sheeroon deqqiyote; tunetaa quyeyaachote” iye.

Xaqqoona Yexaa Isxifanoosi Qitoo

⁵⁴ Ayihudee nallechinaꞌo ishin waayee, oogichii ippeꞌi boonoshi gashoon shaacciyeete.

⁵⁵ Tunebaani Isxifanoosi Yaafe Ayaanoona ceenniꞌi shimaayooch manjii ciinniꞌi, Yeerichi oogee yiiroonaa Yesuusi Yeerichi qanne badd neexeꞌi bi beemonon beeggiye.

⁵⁶ Aroochee “Ebiyoche, shimaayoo qecheeꞌi Ashi Bushoo Yeerichi qanne badd neexeebeeto taach bekkeebeete” iye.

⁵⁷ Areegaata Ayihudee nallechinaꞌo boonoshi qaaroon oogichiꞌi cookiibee boonoshi waamon uppiyeete; ikkooch tiyiꞌi bi waan woceheete.

⁵⁸ Biin geechii katemoyee maach kichiyeete. Miixeenaꞌo boonoshi tahoon kichiꞌi, Sawuli getteebeeti ikke gurimaashoo aafooch geddiichii, Isxifanoosin xaqqoona yexooch giyiheete.

⁵⁹ Arooba Isxifanoosi xaqqoona yexxeebee, “Ta Doono Yesuuso, ta kasheen deꞌe” iꞌi qollehe.

⁶⁰ Guteneꞌi, “Ta Doonocho, hini axaaxoon boonoshi toommooch haddiyaahine” iꞌi oogichii cookiye. Ishichiichii qitiye.