Mishiraachechinaꞌo 5 - Kafa Linguistics Project

Hanaaninaa Sapphiirina Koottiti Kooto

¹ Hanaani getteebeeti ikke uro bi mechee Sapphiirina tookkii tuneꞌi bi showoon kemmiye.

² Hini are showoo kecheti gijjoochee bi mechee arii beetaa, bi qellich qoodii echiichii, eche gijjoon deebii mishiraachechinaꞌoyich immiye.

³ Tunetaa Pheexiroosi ishichiye: “Hanaano, Yaafe Ayaanoyich kootiree showoon ne kemmeti gijjoochee ne qellich ne echiyemmoyich Sheexaanoon ne mullooch aakka giijjinne?

⁴ Kemaani ne beehooba, showoo ne hajjoo toone? Ne kemmetoyee gubb, gijjoo ne bullo toone? Ebiyoommi mooyon amoyich ne mulloona gabinne? Yeerichalli, ashich kootaano neene” iye.

⁵ Hanaani ishin waayeꞌi bekkech dihiye; bi dihiti xaaꞌoochaa bi kasho kechiye. Ebin waayetinaꞌo bulli oogichii shattiyeete.

⁶ Aroochee gurimaasheenaꞌo tiyiꞌi, bi dubenoon kaappiꞌi kichii daammii duukkiyeete.

⁷ Aree hillooch keejje saato bedditoyee gubb, Hanaani mechee wotta hini bi keno toommooch shaggiti mooyon batt ariyaan beebee, are kexooch waahan.

⁸ Bi giyemmona Pheexiroosi tiyiꞌi, “Eke taach gete: Ittoshi showoon ittoshi kemmito, ebinane?” iꞌi echehe. Areyoo wochaꞌa, “Eeha ebinane no kemmeto” iyan.

⁹ Aroochee Pheexiroosi “Doono Yeerichi Ayaanoon dawushoyich aakkiya ikkottehote? Ebeege, ne kenoon duukkiti asheenaꞌo shaggitinaꞌone; neenoo wotta kichiree duukkemminaꞌone” iye.

¹⁰ Areyoo bekkech Pheexiroosi baatooch dihaꞌa qitiyan. Gurimaasheenaꞌo wottee kexooch giyiꞌi, qitaꞌa beetin daneheete; kichiꞌinoo bi kenoochi gaꞌooch duukkiyeete.

¹¹ Arooba Yesuusichi asheenaꞌonaa ishin waayeti bare asheenaꞌo bullinochi maacooch oogeti shato giyiye.

Mishiraachechinaꞌochi Kishoona Meeti Biiyechinaꞌo Wodoo

¹² Mishiraachechinaꞌochi kishoona meeti worganikkiti malletoonaa gaakkechi shuunoona asheenaꞌo daggooch tunee beehe. Bulli ikke mulloona tuneꞌi, Solomoonichi Genje Gaaddaafooch kicee beeheete.

¹³ Boonoshi waan wotteyaaneenaꞌo daggoochee koniyoona boonoshi daggooch gimoyich aafoon kuppheto aalloone. Tunetaa asheenaꞌo boonoshin oogii beeheete.

¹⁴ Boonoshi mulloon Doono Yesuusi toommooch tooꞌiiti meeti anaaminaꞌonaa maacheenaꞌona aafichoyee beshoon Yesuusichi asheenaꞌo daggooch daakkeeheete.

¹⁵ Asheenaꞌo biiyechinaꞌon gommooch kichiꞌi shaaꞌoonaa yeebboonooch qeejjii beeheete. Ebin boonoshi tuniito, Pheexiroosi aroona beshemmona bi yiirittolla ikkikkeenaꞌo toommooch bi yiiremmoyichiye.

¹⁶ Wotta Yerusaalemi guudoona beeti gishiishi katemoochee biiyechinaꞌonaa maachi biiyo yechii iritii xuuxiitinaꞌonon deebiti dofee asheenaꞌo kiceeheete; biiyechinaꞌo bulliyoo wodiyeete.

Mishiraachechinaꞌo Toommooch Moochi Timo

¹⁷ Arooba qeeshee guudoonaa biinna tookkii beeti Saduuqee guuphi asheenaꞌo bullina oogeti qanaatoona mishiraachechinaꞌo toommooch tiyiyeete.

¹⁸ Boonoshinoo yechiꞌi, cuyee kexooch cuchiiheete.

¹⁹ Boonoshi cuchiiti aroobee xum, Doonochi maraakoo cuyee kechi kelleenaꞌon qechii boonoshin maach kichiꞌi,

²⁰ “Hamiree yaafee kexooch neexeree, hini kashee qaaree bulli mooyon asheenaꞌoyich getote” iye.

²¹ Mishiraachechinaꞌo ishin waayeꞌi maaddoona yaafee kexooch giyiꞌi, Yeerichi qaaroon asheenaꞌoyich dojjiyeete. Tunebaani qeeshee guudoonaa biinna tookkii beetinaꞌona, kaacheti nallechinaꞌon, Israꞌeelee showee geeneenaꞌo bullinoo ceeggiꞌi, ikkooch kiciyeete. Mishiraachechinaꞌon boonoshi deebemmoyich asheenaꞌon cuyee kexooch wocheheete.

²² Tunetaa wocheeti asheenaꞌo cuyee kexooch hammiꞌi mishiraachechinaꞌon mucceheete. Wotteꞌi ishichiyeete:

²³ “Cuyee kexooch hammaa shaggaꞌa, cuyee kechi kelleenaꞌo gaawichii tuggeechaa, quyechinaꞌo kellooch neexeꞌi boonoshi beetaa danehone; qechaa giyaꞌa, bi maacooch boonoshi daggoochee koninolla muccehone” iꞌi gettiyeete.

²⁴ Yaafee kechi kellechinaꞌochi ukkiroonaa qeeshee ukkireenaꞌona hini mooyon waayeꞌi, “Hini mooyo gubb amo bi tunemmo gaata ariyaachone” iibee boonoshi gettemmi mooyon mucceheete.

²⁵ Areegaata ikke uro waaꞌi, “Ebiyoche, yiich ittoshi yechii cuchiiti asheenaꞌo yaafee kexooch neexeꞌi, asheenaꞌoyich dojjii boonoshi beetaa beeggaꞌa waahoye” iꞌi gettiye.

²⁶ Aroochee bekkech yaafee kechi kellechinaꞌochi ukkiroonaa ikkikke bi naayinaꞌona hammii, mishiraachechinaꞌon yechiꞌi deebiyeete; boonoshi deebito giidoona toonoone. Ebiyoo “Asheenaꞌo noon xaqqoona yexxemminaꞌone” iꞌi boonoshi shattitoyichiye.

²⁷ Mishiraachechinaꞌon deebiꞌi, Ayihudee nallechinaꞌo aafooch neechiyeete. Aree hillooch qeeshee guudo boonoshin,

²⁸ “ ‘Hini ittoshi ceeggiibeeti shigoona asheenaꞌoyich dojjiyaahote’ iyaꞌa manjaayaa ittoshich getaano noone? Ebiyoche, Yerusaalem beetinaꞌo bullich bechitote. Are uroochi damee naboona no echeyemmoyich tuniiya qaawiibeeto ittoshine” iye.

²⁹ Pheexiroosinaa bare mishiraachechinaꞌona wochiꞌi ishichiyeete: “Ashich deꞌa no getoyee Yeerich deꞌa no geto tunibede mooyone.

³⁰ Mixooch yooddiiꞌi ittoshi wuxiiti Yesuusin no qaabbechinaꞌochi Nuggishoo qitoochee tiijjitone.

³¹ Biinoo Yeeri axaaxee gommoochee bi waan wottoonaa maaroonon Israꞌeeleenaꞌoyich bi immemmoyich, bullichi Shimboonaa Wodiyechonon tuniiꞌi bi qanne badd kotiitone.

³² Ebi mooyinaꞌoyich no miixoo noone; wotta Yeerich deꞌa ii beetinaꞌoyich bi immiti Yaafe Ayaanoo miixoone” iyeete.

³³ Ayihudee nallechinaꞌo ishin boonoshi waayetoyich oogichii ippeꞌi, “Hini asheenaꞌon wuxibone” iyeete.

³⁴ Tunetaa asho bulli oogiibeeti Muusichi Sheeree dojjechi Gamaleeli getteebeeti ikke Farisoo boonoshi daggoochee tiyiꞌi, “Ikke wottoon hini asheenaꞌon maach kichibote” bi itoyee gubb,

³⁵ Ayihudee nallechinaꞌoyich ishichiye: “Hini Israꞌeeleenaꞌote, hini asheenaꞌo toommooch halloyich ittoshi gabiti mooyoochee ittoshi qelloon quyebote.

³⁶ Ebiyee aaf Tiyodaasi getteebeeti uro ‘Ta oogoo taane’ iꞌi bi tiyaa, awudde ball bede asheenaꞌo biinna tookkii ikkotteheete. Tunetaa hini are uro ashi kishoona qitiye; biinna tookkii ikkottetinaꞌo bulliyoo shacee aalleheete; mooyoo duubee echehe.

³⁷ Aree hillooch, asheenaꞌo haddeehooba, Galiilechi Yihudi tiyiꞌi meeti asheenaꞌon dabbiitone; aroo wotta ashi kishoona qitiye; biin dabbitinaꞌo bulliyoo shaceheete.

³⁸ Andoo ittoshich gettoye: Hini asheenaꞌochi achooch shaggaahote, qayote. Hini shalligoo woyee hini mooyo ashi waanee tuneto gaata aallemmone.

³⁹ Yeer waanee tuneto gaatoo, boonoshin aalliyoon hakkaachote; hini mooyo Yeerina tookkii kaareꞌi koyo ittoshich tunemmone” iye. Ayihudee nallechinaꞌo Gamaleelichi yibbaatoon waayeheete;

⁴⁰ aree hillooch mishiraachechinaꞌon boonoshi waan ceekkiiꞌi, arengoona xoobbiyeete. “Yesuusichi shigoona guttinnoon yibbaateyaahote” iꞌi gawukkiyeete.

⁴¹ Ebich mishiraachechinaꞌo Yesuusichi shigoyich hoxeyoyich bedditinaꞌo tuneꞌi boonoshi haddeetoyich emiriibee Ayihudee nallechinaꞌo aafoochee kechiyeete.

⁴² Ebiyee gubb, qemi qemona yaafee kexonaa kexi kexonooch guuddiꞌi, “Yesuusi aroo Kiristoosine” iibee mishiraachee qaaroon asheenaꞌoyich dojjoonaa yibbaatoonon kuxaanoon beeheete.