Mishiraachechinaꞌo 4 - Kafa Linguistics Project

Ayihudee Nallechinaꞌo Aafooch Pheexiroosinaa Yowannisina Neexo

¹ Pheexiroosinaa Yowannisina asheenaꞌoyich boonoshi gettii beetaa, qeesheenaꞌo, yaafee kechi kellechinaꞌochi ukkiroonaa Saduuqeenaꞌona waaheete.

² Aroochee asheenaꞌoyich boonoshi dojjitoyich, wotta “Yesuusina qititinaꞌo tiyemminaꞌone” iꞌi boonoshi awaajjitoyich, kaareheete.

³ Ebichi naboona Pheexiroosinaa Yowannisinon yechiyeete; areegaata showoo xumetoyich, harimmi wottoon cuyee kexooch qeejjiyeete.

⁴ Tunebaani Yeerichi qaaroon waayetinaꞌo daggoochee meetinaꞌo boonoshi mulloon Yesuusi toommooch tooꞌiiheete. Yesuusi toommooch mulloon tooꞌiiti anaaminaꞌo aafichinaꞌona tookkii uuche hum bedoon tuneheete.

^5-6 Dechara Ayihudee ukkireenaꞌo, geeneenaꞌo, Muusichi Sheeree dojjechinaꞌo, qeeshee guudo Haanni, Qeyaafi, Yowannisi, Iskindiroosi, qeeshee guudoochi xiboo tunetinaꞌo bulliyoo ikkotteꞌi Yerusaalem kiceeheete.

⁷ Arooba Pheexiroosinaa Yowannisinon boonoshi daggooch neechiichii, “Ebin ittoshi tuniito, koni giidoona woyee koni shigoonane?” iꞌi echeheete.

⁸ Arooba Pheexiroosi Yaafe Ayaanoona ceenniꞌi ishichii wochiye: “Hini asheenaꞌochi ukkireenaꞌonaa showee geeneenaꞌonote!

⁹ No hanaach hini biiyechi uroyich no tuniiti deꞌe shuunoyich, aabichiꞌi bi wodito gaatoo, echeebeeto no tunegaata,

¹⁰ ittoshi yooddiiti, Yeeriyoo qitoochee bi tiijjiti, Naazireetechi Yesuus Kiristoosichi shigoona wodiꞌi ittoshi aafooch bi neexo ittoshi bullinaa Israꞌeeleenaꞌo bullinoyich aricheto tunebe. Biyoo,

¹¹ ‘Gimbenyoo ittoshi hoxee duppito, kexon deggii neechiti, giimbee guummon tuneti xaqqoone.’

¹² “Wodoo baroo koni waaneenona daneyaache; noon wodiyoon hakkemmo, asheenaꞌoyich Yeer waanee icheti shigo shimaayoyee desh baroo aalloone” iye.

¹³ Arooba kiceeti Ayihudee nallechinaꞌo Pheexiroosinaa Yowannisina aafoon kuppheꞌi boonoshi yibbaatoon beeggiꞌi, dojjechona tookkii boonoshi dicci qayonaa ogooge asheenaꞌo boonoshi tunee qayonon shalligiꞌi worganeheete; ebiyee aaf Yesuusina tookkii boonoshi beemon ariiheete.

¹⁴ Wotta hini are woditi uro Pheexiroosinaa Yowannisina tookkii neexee bi beetaa beeggiꞌi, boonoshi gettemmon mucceheete.

¹⁵ Ebich Ayihudee nallechinaꞌo Pheexiroosinaa Yowannisinon “Maaxooch keyote” iꞌi boonoshi kiceeti kexoochee maach boonoshi kichitoyee gubb, boonoshinaa boonoshina

¹⁶ “Hini asheenaꞌon aabichibona? Yerusaalem beetinaꞌo bulli ooge malletoon boonoshi tuniyoon ariitinaꞌone. Ebin nookkoon hakkaachone.

¹⁷ Tunetaa batt waayeyaani asheenaꞌo waayeyaachemmoyich, ebiyee damba konichona hini shigoon tiijjiree boonoshi yibbaateyaachemmoyich, miicheree bayone” iꞌi echeeheete.

¹⁸ Ebiyee gubb, Pheexiroosinaa Yowannisinon ceekkiiꞌi, “Guttinnoon Yesuusichi shigoon tiijjiree yibbaateyaahote; ashichoo dojjiyaahote” iꞌi miicheheete.

¹⁹ Tunetaa Pheexiroosinaa Yowannisina wochiꞌi, “Yeerich deꞌa getonaa woyee ittoshich deꞌa getona? Yeeri aafooch aabine tato? Eke ittoshi nallibote.

²⁰ No beeggetonaa no waayetonon yibbaateyaanoon cikkii qayon hakkaachone” iyeete.

²¹ Ayihudee nallechinaꞌo Pheexiroosinaa Yowannisinon manjii miicheechii biichiyeete. Miicheꞌi boonoshi biichito, tuneti mooyona asheenaꞌo bulli Yeerin boonoshi oogii beetoyich, boonoshi nallemmi gommon mucceꞌiniye.

²² Hini malletoona woditi uro aabbe natoyee beshoone.

Yesuusichi Asheenaꞌo Corootiti Corooto

²³ Pheexiroosinaa Yowannisina biicheꞌi boonoshi asheenaꞌo waan waaheete. Qeeshee ukkireenaꞌonaa showee geeneenaꞌona boonoshich gettito bullin gettiyeete.

²⁴ Boonoshiyoo waayeꞌi, ikke mulloona Yeer waan ishichiꞌi corootiyeete: “Shimaayoon, showoonaa baharoonon, eboshichi daggooch beeto bullin halliti Mawe Doono Yeero,

²⁵ Yaafe Ayaanoona, neech qeyiti no qaabbechi Daawiti noonoona ishichaꞌa getteto neene: ‘Aageteenaꞌo amoyich ippoona guuqqeeheete? Aagetee asheenaꞌo amoyich duube mooyon koceeheete?

²⁶ Doono Yeerinaa bi doonjiiti Kiristoosinon kocha showee taateenaꞌo tiyiyeete; ukkireenaꞌoo kiceeheete’ ito neene.

²⁷ “Iberoone, ne huutteti yaafe ne Bushoo Yesuusi toommooch gondoon koceya, Heroodisinaa Fantoosechi Phelaaxoosina Israꞌeeleenaꞌonaa Aageteenaꞌona tookkii hini katemooch kiceeheete.

²⁸ Boonoshi kiceeti naboo, ne shiichaꞌa ne giidoonaa ne shalligoona bi tunemmoyich ne maacceto ceennemmoyichiye.

²⁹ Andoo Doonocho, boonoshi miichoon ciine; aafoon kuppheree ne qaaroon no gettemmoyich, ne guuno noon kupphiibe.

³⁰ Ashoon wodiyoyichoo ne kishoon yaggiree, yaafe ne Bushoo Yesuusichi shigoona worganikkiti malletoonaa gaakkechi shuunoonon shuunebe” iꞌi corootiyeete.

³¹ Boonoshi corootitoyee gubb, boonoshi kiceeti xaaꞌoo shuuriye. Bulliyoo Yaafe Ayaanoona ceenniyeete; aroochee Yeerichi qaaroon aafoon kuppheꞌi gettiyeete.

Yesuusichi Asheenaꞌo Gijjee Gogo

³² Arooba Yesuusichi asheenaꞌo bulli ikke mullo, ikke kasho tuneheete; boonoshi daggoochee koniyoona “Hini gijjoo taachone” getaanoone; bullin gogeꞌi ikkooch qoodee beeheete.

³³ Mishiraachechinaꞌo “Doono Yesuus Kiristoosi qitoochee tiyitone” iꞌi ooge giidoona miixee beeheete; boonoshi bulli toommooch oogeti wojjoo beehe.

³⁴ Boonoshi daggooch ikkolla iriteeto aalloone; ebiyoo boonoshi daggoochee showecho bi showoon, kechecho bi kexon kemmiibee, boonoshi kemmiti gijjoon mishiraachechinaꞌoyich deebii

³⁵ boonoshi imaa, mishiraachechinaꞌo gijjaalleenaꞌoyich bechiꞌi boonoshi qoodii beetoyichiye.

³⁶ Arooba Qoophiroos shiijjeti, Yooseefi getteebeeti ikke Lewee asho beehe. Mishiraachechinaꞌo biinoo Barnabaasi iꞌi shigiiheete; ebiyoo Goggiyee Bushoo getone.

³⁷ Aroo bi showoon kemmiꞌi gijjoon deebii mishiraachechinaꞌoyich immiye.