Mishiraachechinaꞌo 3 - Kafa Linguistics Project

Baata Yeshe Uroochi Wodoo

¹ Ikke areddoon asheenaꞌo corootiya kiceebeeti saatooch, ebiyoo yiixiye saatooch, Pheexiroosinaa Yowannisina yaafee kexooch hammii beeheete.

² Arooba bi indee maacoochee baata yesho tunee shiijjeti ikke uro Gaawe Kelloo getteebeeti yaafee kechi kellooch koteꞌi beehe. Yaafee kexooch giyiibeeti asheenaꞌo waanee gijjoon bi qollemmoyich, asheenaꞌo shaaggii deebiꞌi qemi qemona arooch kotii beeheete.

³ Are uro Pheexiroosinaa Yowannisina yaafee kexooch giya boonoshi hammii beetaa ciinniꞌi, gijjoon qollehe.

⁴ Pheexiroosi Yowannisina tookkii manjii uroon ciinniꞌi, “Kaama noon ciine” iye.

⁵ Hini are uro “Gijjoon taach immaniye” iꞌi boonoshin ciinniye.

⁶ Arooba Pheexiroosi “Ta kishooch amolla aalloone; tunetaa taach beeton immemmo taane. Naazireetechi Yesuus Kiristoosichi shigoona tiyiree shaꞌebe” iye.

⁷ Aree hillooch bi qanne kishoona yechiꞌi tiijjiye. Bekkech bi baatoo manjiiꞌi neexxiye;

⁸ kotoocheenoo capphiꞌi tiyii neexehe; okk hach wotteenoo shaꞌehe. Aroyee gubb shaꞌeebee, capphiibee, Yeerin galleteebeenoo, Pheexiroosinaa Yowannisina tookkii yaafee kexooch giyiye.

⁹ Asheenaꞌo bulli hini are uro Yeerin galleteebee bi shaꞌoon beeggiyeete.

¹⁰ Gaawe Kelloo getteebeeti yaafee kechi kellooch gijjoon qolleya koteꞌi beeti uro bi tunoonoo ariiheete. Biich tuneti mooyon beeggiꞌi worganeheete.

Yaafee Kexoochaa Pheexiroosi Yibbaateti Yibbaatoo

¹¹ Hini are woditi uro “Ittoshi hilloochee kuxeyaache” iꞌi Pheexiroosinaa Yowannisinon yechii bi beetaa, asheenaꞌo bulli oogichii worganeebee, Solomoonichi Genje Gaaddaafoo getteebeeti xaaꞌooch wocona waaheete.

¹² Pheexiroosiyoo ebin ciinniꞌi asheenaꞌoyich ishichiye: “Hini Israꞌeeleenaꞌote, amoyichiye ebi mooyona ittoshi worganeebeeto? Aakkiyane hini uroon woyee noon ooge mooyo tuniiꞌi ittoshi manjii ciinniibeeto? Hini uro no hajjee giidoona woyee no deꞌe shuunoona shaꞌeto ittoshich shaahii beete?

¹³ Abrahami, Yisaaqinaa Yaaqobinochi Nuggishoo, biyoo no qaabbechinaꞌochi Nuggishoo, bi Bushoo Yesuusin oogiihe. Tunebaani ittoshi bi qitemmoyich beshiiꞌi immiyote. Phelaaxoosi biicha bi gabaa, bi aafoochaa nookkehote.

¹⁴ Tunetaa yaafoon, cadiqoonoo nookkeechii, ashoon wuxiton ‘Nooch biishe’ iꞌi Phelaaxoosin qollehote.

¹⁵ Kashee Shimboon wuxiihote. Tunetaa biin Yeeri qitoochee tiijjiye. Hini mooyoyich no miixoo noone.

¹⁶ Hini ittoshi ciinnii beeti, ittoshi ariibeeti uro wodiꞌi bi kuppheto Yesuusichi shigoona daneti mullee tooꞌiyoonane. Ittoshi bulli beeggii beetoommon, Yesuusichi shigoona daneti mullee tooꞌiyoo hini uroyich ceeni wodoon immitone.

¹⁷ “Andoo ta maneenaꞌote! Ebin ittoshi tuniito ittoshi ukkireenaꞌochoommon tuushoona bi tunoon ariibeeto taane.

¹⁸ Tunetaa Yeeri Kiristoosi xuuxoon beeggemmoyich, shiichiꞌi keemechinaꞌo bulli noonoona bi gettiton hini gommona ceechitone.

¹⁹ Illa Yeeri ittoshi axaaxoon hidiree bi wokkiyemmoyich, ittoshi axaaxee gommoochee Yeer waan wottebote.

²⁰ Arooba Doono waanee goggiyee yemeeno ittoshich woyemmone; Yeeri shiichiꞌi ittoshich bi kaacciti Kiristoosi tuneti Yesuusin deejjemmone.

²¹ Yeeri wonnee yemeenoochee tiijjiꞌi yaafeeti keemechinaꞌochi noonoona bi gettitoommon, bulli mooyon bi andiriyemmi yemeeno waammi wottoon Yesuusin shimaayooch kotiyemmone.

²² Muusi no qaabbechinaꞌoyich ishichitone: ‘Doono Yeeri taan bi tiijjoommon, ittoshi maneenaꞌo daggoochee keemechon tiijjemmone; bi gettimmo bullin waayebote.

²³ Are keemecho getaa waayeyaani asho bullin Yeeri bi asheenaꞌo daggoochee bariiree aalliyemmone’ itone.

²⁴ “Aree hillooch Saameeliichee tiijjiꞌi Yeerichi wochoon gettiti keemechinaꞌo bulli ebiyoommon hini yemeeneechon shiichiꞌi gettitinaꞌone.

²⁵ Ittoshiyoo Yeerichi keemechinaꞌochi noonoona bi gibenikkiti gibenoonaa no qaabbechinaꞌona tookkii bi giyiti wogoonon qoodeyecho ittoshine; are wogo Yeeri Abrahamin, ‘Ne yaroona showee toommooch beeti shiijjeroo bullin diiremmo taane’ iꞌi bi wogeti wogoone.

²⁶ Yeeri bi Bushoon kaacciꞌi, ittoshi ikkikkoon gonde ittoshi shuunoochee bi wochoona bi diiremmoyich, shiichiꞌi ittoshich deejjitone” iye.