Mishiraachechinaꞌo 28 - Kafa Linguistics Project

Maalitee Showoochaa Tuneti Mooyo

¹ Showooch diggoona no shaggetoyee gubb no shaggeti buure showee shigo Maaliti bi getteyoon ariihon.

² Arooch beeti asheenaꞌo oogichii noon gaacheheete; arooba amiyo dihaa aqqoo noon yechitoyich, qaaqqoon shookkiꞌi no bullin iibbiiheete.

³ Phawuloosi kakkoon tuucciꞌi qaaqqooch bi duppimmona, qaaqqee gaamoona xekeree kechaꞌa bi kishooch wutireehan.

⁴ Arooch beeti asheenaꞌo hini bi kishooch wutireeti xekereen beeggiꞌi, boonoshinaa boonoshina “Hini uro iberoon ashoon wuxitone; baharoocheenolla diggoona bi kechitaa, nallechi nuggishoo bi kashoon maaraanoone” iyeete.

⁵ Tunetaa Phawuloosi xekereen bi kishoochee qaaqqooch tebbehe; bi toommooch shaggiti mooyo amolla aalloone.

⁶ Hini are asheenaꞌo “Nafemmone, woyee diqq dihi qitemmone” iꞌi ciinnii beeheete. Tunebaani ciinnii boonoshi beetaa, bi achooch amolla shaggi qayon beeggiꞌi boonoshi gaboon shaddii, “Hini uro nuggishoone” iyeete.

⁷ Aree gaꞌooch are buure showee iraashoo Foofiloosi gettee beetochi showoo beehe. Aroo noon iibbiiꞌi emiroona keejj qeejjiye.

⁸ Arooba Foofiloosi nihoo achee gaamee biiyoonaa maacee yexi biiyoona biiyeꞌi qeenooch qeyii beehe. Phawuloosi bi waan giyiꞌi corootiye; bi kishoon uroochi toommooch kotiiꞌi wodiihe.

⁹ Aroochee are buure showooch beeti bare biiyechinaꞌo waaꞌi wodiyeete.

¹⁰ Boonoshiyoo oogichii noon oogiiheete; aroochee tiya no qannimmona, gommoochaa nooch qaawiimmi mooyo bullin deebii nooch immiyeete.

Maalitee Showoochee Room Beddaahaa Phawuloosi Hamo

¹¹ Keejje agenoon Maalitee showooch no kotetoyee gubb, are buure showooch yooyo beshemmi wottoon neexeꞌi yagiti Iskindiriyee markaboona hammehon; bi toommoochoo Kastoorinaa Folookisi getteebeeti qaappe nuggisheenaꞌochi malletoo beetone.

¹² Surakuusi katemooch shaggaꞌa keejje qemon arooch kotehon.

¹³ Aroochee markaboona hammaꞌa Regiyooni katemooch shaggehon. Arooch ikke qemon qeyaꞌa tiyaa deshi-waanee yongo yongetoyich, guttinnee qemooba Fotiloosi katemooch shaggehon.

¹⁴ Aroochaa kittinneenaꞌona tookkaa danehon. Boonoshiyoo “Shabaatte qemi wottoon no waan kotebote” iꞌi noon qolleheete. Aroochee wotta Room hammehon.

¹⁵ Are Roomi kittinneenaꞌo no womon waayeꞌi Apiyoosi Gabiyoonaa Keejje Iibbee Kexo getteebeeti xaaꞌoonooch beddaahaa noonna daneya waaheete. Phawuloosi boonoshin ciinniꞌi tiyii Yeerin galletehe; bi mulloo kupphehe.

Ginechinaꞌona Quyeebee Mishiraachee Qaaroon Phawuloosi Geto

¹⁶ Room no giyetoyee gubb, Roomi ukkireenaꞌo Phawuloosi bi shunniti kexooch biin quyeebeeti ginee naayona tookki bi qell bi beeyemmoyich daaggiyeete.

¹⁷ Keejje qemoyee gubb, Phawuloosi Room beeti Ayihudee ogoogeenaꞌon bi waan ceekkiihe. Boonoshi waa kiceetaa, ishichiye: “Ta maneenaꞌote! Ta, Ayihudeenaꞌonaa no qaabbechinaꞌo sheeroonochi toommooch ta gondeti gondo aalloone; tunetaa Yerusaalemee cuchiꞌi Roomechinaꞌo kishooch beshiiꞌi taan immiyeete.

¹⁸ Boonoshiyoo taan echeꞌi qitooch taan bechimmi mooyon ta toommoochee boonoshi muccetoyich, taan biicha qaawiyeete;

¹⁹ tunebaani Ayihudeenaꞌo tuneyaache iꞌi taggemmona, ta mooyon Qesaari aafooch giddiyoon qaawiyoani, ta aagetee ashoon ta taggemmi mooyo taach beeꞌi toonoone.

²⁰ And ittoshin ta ceekkiito, ittoshin beegonaa ebin getonoyichiye; hini sansalatoona ta cucheto, Yeeri Israꞌeeleenaꞌoyich bi gibenikkiti gibenee naboonane” iye.

²¹ Boonoshiyoo “Yihudee showoochee ne naboyich kooreeti koorichoo nooch shagaanoone. Wotta hiniich waabeeti Ayihudeenaꞌo waanee ne gondoon boonoshi yibbaatetaa waayeyaano noone; gettitoo aalloone.

²² Tunebaani bulli xaaꞌooch beeti asheenaꞌo hini ne beeti guuphon boonoshi oonon ariibeeto noone. Ebich ne gaboo amo gaata ne getaa waayoyich qaawaabeeto noone” iyeete.

²³ Boonoshiyoo bare aaboon taajjeꞌi, are taajjee aabooba meetinaꞌo tuneꞌi Phawuloosi beeti kexooch waaheete. Biyoo maaddoochee tiijjiꞌi xum beddaahaa, Yeerichi taatittineechon miixoona bi gaboon bekkiihe; Muusichi Sheeroonaa keemechinaꞌochi macaafoonoochee galliibee, Yesuusichon gettiibee, boonoshi mullooch gedda qiiccehe.

²⁴ Qatinaꞌo bi gettiton iberiiheete; qatinaꞌoo iberiyaaneenaꞌone.

²⁵ Boonoshinaa boonoshinoo ikkotteyaanoon hamma tiyiyeete. Areegaata Phawuloosi ishichiye: “Yaafe Ayaano keemechi Isiyaasichi noonoona ittoshi qaabbechinaꞌoyich ishichiꞌi bi gettito iberetone:

²⁶ ‘Hini asheenaꞌo waan hamiree, “Waayoon waayeebeeto ittoshine; shalligaano ittoshine; ciinonoo ciinniibeeto ittoshine; beegaano ittoshine” gete.

²⁷ Boonoshi aafoona boonoshi ciinaachemmoyich, boonoshi waamona boonoshi waayeyaachemmoyich, boonoshi mulloona boonoshi shalligaachemmoyich, ta waan boonoshi wottetaa boonoshin ta wodiyaachemmoyich, hini asheenaꞌo mullo muumetone; boonoshi waamon uppitinaꞌone; boonoshi aafoonoo shininniitinaꞌone’ iꞌi gettiye.

²⁸ “Illa hini Yeeri bi wodiyee wochoon Aageteenaꞌoyich bi daachiyoon ariibote; boonoshiyoo waayee beetinaꞌone” iye.

²⁹ [Phawuloosi bi ishichimmona Ayihudeenaꞌo boonoshinaa boonoshina hayeebee kechii hammiyeete.]

³⁰ Phawuloosi bi kiraayiti kexooch gutte naton kotehe; bi waan waa beetinaꞌo bullin iibbii beehe.

³¹ Koniyoona biin bayaanoon Yeerichi taatittineechon gettiibee, aafoon kuppheꞌi Doono Yesuus Kiristoosichon dojjii beehe.