Mishiraachechinaꞌo 27 - Kafa Linguistics Project

Phawuloosin Yechiꞌi Room Hamma Ginechinaꞌo Timo

¹ Xaaliyaanee showooch markaboona no hammemmoyich bi maaccetoyee gubb, Phawuloosinaa bare qoppeenaꞌonon Roomi taatoochi ginee naayinaꞌo daggooch beeti, Yuuliyoosi getteebeeti balle ginee iraashoo kishooch guudiiheete.

² Isiyee showee baharee gashooch beeti meeti katemooch hammiibeeti, Adramixisee markabooch giyaꞌa hamma tiyehon. Tasaloonqi katemoochee waati, Makidoonee showeexi asho Arsixirokoosi noonna tookkii hammiye.

³ Dechara Sidoon shaggehon. Aroochee Yuuliyoosi Phawuloosich ariqqeꞌi, Phawuloosi bi shunechinaꞌo waan hamiree shohoon bi danemmoyich daaggiye.

⁴ Aroochee tiyaꞌa yongo no toommooch bi yongetoyich, Qoophiroosina degeebee no gommon yechehon.

⁵ Kiliqinaa Fenfulee showee gaꞌoonooch beeti baharoon no kimmetoyee gubb, Liqiyee showooch beeti Muuri katemooch shaggehon.

⁶ Balle ginee iraashoo aroochee Xaaliyaanee showooch hammiibeeti, Iskindiriyee markaboon daneꞌi, arooch no giyemmoyich tuniihe.

⁷ Meeti areddoon nibbaabee hammehon; wodde iritoona Qiidoosi katemee ciinooch shaggehon; no beeti markabo aroona bi hamaachemmoyich yongo bajjiye. Ebich Qerixeesee showoona degeebee, Salimooni gaꞌoona beshaꞌa hammehon.

⁸ Wodde iritoona gashi gashoona xepphaabee, Laasi katemooch katino tuneti, “Deꞌe Xaaꞌoo” getteebeeti, markabo kasheebeeti xaaꞌooch shaggehon.

⁹ Gommona oogichaa no yagitoyich, coomee aabo beshehe. Aroobee agenoon markaboona shaꞌo shattiito bi tunetoyich, Phawuloosi asheenaꞌon ishichiꞌi ciicciye:

¹⁰ “Hini asheenaꞌote, and no hammemmi eche gommooch wodde iritoo beeyemmo tunoon beeggaabeete; markaboonaa qiicee ciiroona baach tuneyaanoon, kashee aalloo beetone” iye.

¹¹ Tunebaani balle ginee iraashoo Phawuloosichi yibbaatoyee, markaboon gashee beetonaa markabee doononochi yibbaatoon gibenehe.

¹² Hini are xaaꞌoo yooyon beshiyoyich mashaamaani xaaꞌoo bi tunetoyich, beshe asheenaꞌo “Nooch bi hakkeegaata, aabi-giyaa dambi-waani qatonaa deshi-waani qatonochi ciinooch beeti Qerixeesee showooch beeti Foonki katemooch hamiree, aroochaa yooyon kichibone” iꞌi echeeheete.

Baharee Toommoochaa Giidechi Yongo Timo

¹³ Kette yongo deshi-waanee yongetaa beeggiꞌi, shiichii boonoshi qaawito boonoshich kaameto bi shaahaa, ebina tiyii markaboon yeshi bi neechemmoyich, aacooch boonoshi duppiti xuuroon tiijjiꞌi boonoshi gommon yechiyeete. Qerixeesee showee gashi gashoona beshee hammiyeete.

¹⁴ Tunetaa woddii boonoshi hamaan beetaa, aabi-kechaa dambi-waani qatoochee tiyiti giidechi yongo boonoshi toommooch kindiye.

¹⁵ Yongo markaboon yulliitaa, yongoon hakkii besheꞌi hamon bi mawiitoyich, yongo daammitooch cikkii hammehon.

¹⁶ Kawudi getteebeeti buure showoona degaa hammaabee, giishi markabeen kichaꞌa wodde iritoona ooge markabee toommooch minjoon hakkiyon.

¹⁷ Damba kichiꞌi boonoshi cuchitoyee gubb, boonoshi beeti markabo kupphemmoyich woderoona manjiiꞌi wuttiyeete. Suritiisi getteebeeti qacee gutoona boonoshi qiciyaachemmoyich shattiꞌi, markabo yongoona xukkeree bi hammemmoyich tuniibeeti cariqqoon kindiiꞌi, markabo baach cikki bi hammemmoyich gawukkiyeete.

¹⁸ Yongo daappiibee kuppheꞌi noon bi iritiitaa, dechara markabee toommooch minjeeti qiicoochee kichiꞌi aacooch duppiyeete.

¹⁹ Keejje qemooba markabee qiicoon boonoshi kishoona kichii kichii duppiyeete.

²⁰ Meeti areddoon aabeenaa xojjenoonon beegaanoon, yongo daakkii daakkii bi hammitoyich, “Ebiyee damba wodemmo noone” immi gibeno no mulloochee wokkiye.

²¹ Asheenaꞌo maayoon maataanoon meeti aaboon boonoshi kotetoyee gubb, Phawuloosi boonoshi daggooch tiyii neexeꞌi ishichiye: “Hini asheenaꞌote, ta geton waayeꞌi Qerixeesee showooch ittoshi yagito gaata, hinoommi gijjee aalloonaa iritoonon beegaachesho ittoshine.

²² Andoo ‘Kupphebote’ iyoye; markaboani tiishemmo, ittoshi daggoochee ikkolla qitaachemmone.

²³ Ishichii ta beeto, biicho ta tuneti, biichoo ta maddaabeeti Yeeri deejjiti maraakoo yiichi xum ta gaꞌooch neexeꞌi,

²⁴ ‘Phawulooso, shattaahine; Qesaari aafooch neexo neech qaawiihe; wotta neenna tookkii hammii beetinaꞌo bullin Yeeri neecha getiree qitoochee wodiyemmone’ iꞌi taach bi gettitoyichiye.

²⁵ Ebich kupphebote; bi noonoochee kechito bullin ceechemmo bi tunoon Yeerin gibenehoye.

²⁶ Tunebaani andoo yongo markaboon xuꞌiree baharee daggeexi ikke buure showoona qiciyemmone” iye.

²⁷ Aaraa awudde qemoobee xum Adiriyee baharee daggooch yongo okk hach wochii noon bi yullii beetaa, markabechinaꞌo xumee gutte qellimooch showoo beetooch katinnito boonoshich shaahiye.

²⁸ Baharee ceenon boonoshi qellayiibeeti woderoon baharooch duppii kichii boonoshi hiretaa, shinne hiroo tunehe; giishechoon yagiꞌi guttinnoo duppiꞌi kichii boonoshi hiretaa shiche hiroo tunehe.

²⁹ No markabo baharee gaagemooch beeti xaqqoona bi qiciyaachemmoyich shattiꞌi, markabee gubbaa neexeꞌi, markaboon neechemmi awudde xuureenaꞌon baharee daggooch duppiyeete. Aroochee xumo haremmoyich corootiyeete.

³⁰ Markabechinaꞌo markabee daggoochee kindiree aalleya qaawiꞌi, aafaa yechii neechiibeeti xuureenaꞌon aacooch duppiibeeto shaahiibee, giishi markabeen oogoochi toommoochee baharooch boonoshi kindii beetaa

³¹ Phawuloosi beeggiꞌi, balle ginee iraashoonaa ginee naayinaꞌonoyich ishichiye: “Hini asheenaꞌo markabee daggoochee boonoshi kindii hamigaata, ittoshi wodoon hakkaachemmo ittoshine” iye.

³² Arooba ginee naayinaꞌo giishi markabee woderoon kuxxiꞌi gawukkiyeete.

³³ Showoo hara bedaa, Phawuloosi tiyii asheenaꞌo bullin “Maayoon mamote” iꞌi qollehe. Ishichiinoo iye: “Maayoon maataanoon gaxxaani kookkoona hanaach aaraa awudd qeyito ittoshine.

³⁴ Ittoshi qellee eexoochee ikkewolla aalleyaachemmine; ebich ittoshin qollehoye: Maayoon mamote; ittoshi kasho aroona degeebe” iye.

³⁵ Ebin bi gettitoyee gubb, koshon tiijjiꞌi boonoshi bulli aafooch Yeerin galleteꞌi tiichii maahe.

³⁶ Bulliyoo kuppheꞌi boonoshi qelloona wotta tiyii koshon tiijjii maaheete.

³⁷ Markaboona beeti no bulli gutte ballaa shabaa shiritte asho noone.

³⁸ Maaꞌi boonoshi michitoyee gubb, markabee toommooch beeti teepphoon kindii aachi toommooch duppiꞌi maggoon kettiiheete.

Markabo Tiisho

³⁹ Showoo haraa, showooch boonoshi katinon ariyaaneenaꞌone; tunebaani qacechi baharee gaagemooch beeti gamini aacon beeggiyeete; bi hakkeegaata, aroo waan markaboon gashoyich boonoshi gaboon kuxxiyeete.

⁴⁰ Markaboon yechii neechiibeeti xuureenaꞌon kuxxii duppiyeete. Markaboo gasheebeeti qellimoochaa dechiich beeti mixinaꞌo cucheeti woderoon biichiyeete. Markabo hammemmoyich tuniibeeti aaf beeti cariqqoon yongo xuqqemmoyich kichii kaqqiꞌi baharee gaagemooch keyoyich hammiyeete.

⁴¹ Tunebaani markabo gutte bahareenaꞌo daneebeeti xaaꞌooch beeti qacee gutoona qiceeꞌi aafaa yechee shuuraache iye. Wotta giidechi aayo xuqqimmona gubbaa tiishehe.

⁴² Arooba ginee naayinaꞌo qoppeenaꞌoochee ikkolla aacon waakkeree bi muricaachemmoyich, wuxiya echeeheete.

⁴³ Tunetaa balle ginee iraashoo Phawuloosin wodiiya bi qaawitoyich, boonoshi echeyoon gaakkiꞌi, “Waakkoon arii beetinaꞌote, shiichi baharooch capphi giyiree showoo beetooch keyote.

⁴⁴ Wotta echetinaꞌote, shaaqqeenaꞌonaa markabee tiisheenaꞌonon yebberee keyote” iꞌi gettiye. Ebiyoommi gommona bulli diggoona showoo beetooch shaggiyeete.