Mishiraachechinaꞌo 24 - Kafa Linguistics Project

Phawuloosin Ayihudeenaꞌo Taggo

¹ Uuche qemoyee gubb, qeeshee guudo Hanaani ikkikke geeneenaꞌonaa ikke Xerixeloosi getteebeeti moochi ariyechona tookkii Yerusaalemee Qesaariya hammiye; iraashoo Filikisi aafooch giddeꞌi, Phawuloosin taggeheete.

² Phawuloosi ceegaa bi giddetoyee gubb, Xerixeloosi ishichiꞌi taggoon yaaqqiye: “Iraashoo Filikiso, ne kishoona wodde iiwittino nooch danetone; ne ariyoona ne qeejjaabeeti asho bulli deꞌe mooyona diccitone.

³ Bulli aaboon bulli xaaꞌooch no beeggaa beetonaa no danaa beetona oogichaa emirito noone; ebich neen galletehone.

⁴ Tunetaa yibbaatoon meechaanoon qaminoona neech no gettemmon ne deꞌittinoona ne ellemmoyich neen qollehoye.

⁵ “Hini uro nooch oogeti biiyo bi tunoon, alemo bulliich beeti Ayihudeenaꞌo daggooch hukkee bi tiijjoon, xumme mooyon dabbiibeeti Naazireetechinaꞌochi ukkiroo bi tunoon beeggeto noone.

⁶ Yaafee kexon wotta eeꞌiyoyich bi qiiccee beetaa yechehone. [No sheeree doyoona nalloyich qaawiyone;

⁷ tunebaani hume ginee iraashoo Lusiyoosi waaꞌi, giidoona no kishoochee boggii daammiye.

⁸ Biin taggetinaꞌo ne waan giddemmoyich gettiye.] Andoo hini no taggeti mooyo bulli iberoo tunoon biin echaa waayo hakkihine” iye.

⁹ Ayihudeenaꞌo wotta “Hini mooyo iberoone” iꞌi ceechiyeete.

¹⁰ Iraashoo Filikisi kishee malletoona Phawuloosin yibbaatebe iꞌi bi bekkiitaa, Phawuloosi ishichiye: “Meeti yemeenoochee tiijjaꞌa hini showee ashoyich nallecho ne tunoon ta arii beetoyich, oogichaa emiraabee and ta qellich taggoye.

¹¹ Yeerich goyinneya Yerusaalem ta hammeto, hanaach aaraa gutte qemoyee beshee bi qayon xiishoo hakkihine.

¹² Hini asheenaꞌo yaafee kechi daggoochaa koninolla tookkaa gajjitee ta beetaa woyee Ayihudeenaꞌo kiceebeeti kexoochaa woyee katemee daggoochaa asheenaꞌon hukkoo shuuniiya kicaa ta beetaa daneyaaneenaꞌone.

¹³ And taan boonoshi taggeebeeti taggoon miixiyoon hakkaacheete.

¹⁴ Tunebaani ta gettaabeeti mooyo ebine: ‘Xumme gommone’ boonoshi ii beeti gommon dabboona no qaabbechinaꞌochi Nuggishoyich maddaabeeto taane; Muusichi Sheeroonaa keemechinaꞌochi macaafoonooch kooreeto bullin iberiibeeto taane.

¹⁵ Boonoshiyoo boonoshi qelloona gibenee beetoommon tawoo cadiqeenaꞌonoo, axaaxeenaꞌonoo qitoochee Yeeri tiijjemmo bi tunoon gibenaabeeto taane.

¹⁶ Ebich Yeerinaa asheenaꞌonochi aafooch bulli aaboon ittibateyaani mulloona beemoyich qiiccaabeeto taane.

¹⁷ “Yerusaalemee kechaꞌa meeti nato beshetoyee gubb, ta asheenaꞌoyich tunemmi degee gijjoon imonaa Yeerich ichemmi deejjoon giddiyoonoyich Yerusaalem wottaꞌa hammoye.

¹⁸ Xallaꞌa tiyaa yaafee kexooch giyaꞌa, ebin ta tuniyaa beetaa shaggiyeetani, asheenaꞌon kicaano taane; boonoshi dullemmoyich tuniyaano taane.

¹⁹ Tunebaani ta toommooch bare taggoo bi beegaata, ikkikke Ayihudeenaꞌo Isiyee showoochee waa ne aafooch neexeꞌi taanna tagg bedeenaꞌone.

²⁰ Woyee Ayihudee nallechinaꞌo aafooch ta neexehooba, ta aalliiti mooyon boonoshi daneto gaata hiniich beeti asheenaꞌo geteete.

²¹ Iberoon boonoshi aafooch neexaa ta qaaroon oogichaꞌa, ‘Hanaach ittoshi aafooch ta giddeto, “Qititinaꞌo tiyemminaꞌone” iyaꞌa ta gibenetoyichiye’ iyoye. Ebiyee damba bare mooyon getaano taane” iye.

²² Filikisi Doono Yesuusichi gommon gaawichii ariibeeti uroone; biyoo “Hume ginee iraashoo Lusiyoosi waahooba, ittoshi mooyon ciichemmo taane” iꞌi Ayihudeenaꞌon daachiihe.

²³ Ebiyee gubb, Filikisi balle ginee iraashoon “Phawuloosin quyebee ciinoon bi toommooch meechiyaahine. Bi xibeenaꞌo waanee waammi asho koniyoona shohoon bi giijjemmoyich daaggiballi, bajjaahine” iꞌi gettiye.

Gutte Naton Phawuloosi Cucheyoo

²⁴ Giisheche aaboyee gubb iraashoo Filikisi bi mechee Ayihudechee Durisilina tookkii waahe; Phawuloosin ceekkiiꞌi, Kiristoos Yesuusi toommooch mullee tooꞌiyoo geto ama geto gaata bi gettii beeton bi noonoochee waayehe.

²⁵ Biyoo cadiqeechonaa qellee ariyeechonon, wotta woyemmi nallaa galleechon bi getaa Filikisi waayeꞌi shattiye. Ishichiinoo iye: “And hambe; taach gaawehooba, neen ceekkiyemmo taane” iꞌi gettiye.

²⁶ Arooba Filikisi “Phawuloosi taach xuccoon immemmone” iꞌi gibenehe; ebich meeti areddoon Phawuloosin ceekkiibee, biinna tookkii yibbaatee beehe.

²⁷ Gutte nato ceennitoyee gubb, Phoriqiyoos Fisxoosi getteebeeto Filikisichi keroon iraashehe. Filikisi Ayihudeenaꞌon emirikkoyicha iꞌi, Phawuloosin bi beeti cuyee kexooch qajjiye.