Mishiraachechinaꞌo 21 - Kafa Linguistics Project

Yerusaalem Phawuloosi Wotto

¹ Boonoshiyee baraꞌa Milexiinee tiyehon. Markaboona indoon Qoos hammehon; dechara Rood shaggehon; aroochee Phaaxira hammehon.

² Aroochee Finqee showooch kimmiibeeti markaboon danaa kechaꞌa hammehon.

³ Qoophiroosin ciinnaabee, aroon no yooche badd duppaachaa Sooriyee showooch hammehon; markabooch minjeeti qiico Xiroos kindemmo bi tunetoyich arooch hammehon.

⁴ Arooch kittinneenaꞌon qaawaa danaꞌa, boonoshina tookkaa shabaatte qemon kotehon; boonoshiyoo Yaafe Ayaanoona yaabeeꞌi Phawuloosin “Yerusaalem hammaaye” iyeete.

⁵ Tunebaani no hammemmi aabo bedaa hammehon; kittinneenaꞌo bulli boonoshi maachoonaa bushiishoona tookkii katemoyee maach beddaahaa noon deenniyeete. Baharee gashooch gutenaꞌa no corootitoyee gubb,

⁶ noonnaa noonna diggeeꞌa markabee toommooch kechehon; boonoshiyoo kexooch wotteheete.

⁷ Are Xiroosee tiyaꞌa baharee gommon hammaabee, Xolemaas shaggehon; arooch beeti kittinnee maneenaꞌon danaa diggiiꞌa boonoshi waan ikke qemon qeyehon.

⁸ Dechara tiyaꞌa, Qesaariya hammehon. Arooch Yerusaalemaa kaacheti shabaatte asheenaꞌo daggoochee ikkoo tuneti mishiraachee qaaree gettechi Filipphoosi kexooch giyaꞌa bi waan kotehon.

⁹ Biichoo keemoon keemmiibeeti awudde maache bushiisheenaꞌo beeheete; boonoshiyoo gidiideenaꞌone.

¹⁰ Arooch meeti areddoon no kotetoyee gubb, Agaaboosi getteebeeti ikke keemecho Yihudee showoochee waahe.

¹¹ Hini keemecho no waan giddeꞌi, Phawuloosi shachoon yechiꞌi bi hajjee kishoonaa baatoonon bi cuchitoyee gubb, “Yaafe Ayaano ‘Hinin cuyeebeeti uroon Ayihudeenaꞌo Yerusaalemaa cuchemminaꞌone; Aageteenaꞌo kishooch beshiiree immemminaꞌone’ ii beetone” iye.

¹² Arooch beetinaꞌonaa noonna ishin waayaꞌa, Phawuloosin “Yerusaalem hammaaye” iyaꞌa qollehon.

¹³ Aroo wochiꞌi, “Eefeebee ta mulloon amoyichiye ittoshi gaabbii beeto? Ta Doono Yesuusicha getiree Yerusaalemaa cucheyoo qayenona, qitoyich qannito taane” iye.

¹⁴ No ciicoon qajje bi itoyich, “Illa Doono Yeeri ito tunebe” iyaꞌa cikkii qajjehone.

¹⁵ Ebiyee gubb, Yerusaalem hamma qannaꞌa tiyaa hammehon.

¹⁶ Qesaariyee kittinneenaꞌo daggoochee ikkikkeenaꞌo noonna tookkii hammiyeete; boonoshiyoo arooch no kashemmoyich, Qoophiroosechi Minasooni kexooch noon daammiyeete; biyoo shiichiꞌi Yesuusichi dabboo tunetinaꞌo daggoochee ikkoone.

Yaaqobin Beegga Phawuloosi Hamo

¹⁷ Yerusaalem no shaggemmona, kittinnee maneenaꞌo emiroona noon iibbiiheete.

¹⁸ Dechara Phawuloosi noonna tookkii Yaaqob waan hammiye; kittinnee guuphi geeneenaꞌo bulliyoo arooch beetinaꞌone.

¹⁹ Phawuloosi boonoshin bi diggiitoyee gubb, bi shuuneti shuunoona Yeeri Aageteenaꞌo daggooch bi tuniiti mooyon yaaroona gettiye.

²⁰ Hini are geeneenaꞌo ebin waayeꞌi Yeerin galleteheete. Phawuloosichoo ishichiyeete: “Manoocho, Ayihudeenaꞌo daggoochee boonoshi mulloon Yesuusi toommooch tooꞌiitinaꞌo ambiche humeenaꞌo gaata beeggaabeeto neene; boonoshi bulli Muusichi Sheeroyich qanaatee beetinaꞌone.

²¹ Boonoshiyoo ‘Phawuloosi Aageteenaꞌo daggooch beeti Ayihudeenaꞌo bullich “Ittoshi bushiishoon dokiriyaahote; no niheenaꞌochi doyoona hammaahote” iꞌi Muusichi Sheeroon boonoshi qajjemmoyich dojjii beetone’ getaa waayetinaꞌone.

²² Illa aabichibona? Ne womon waayo qayaachemminaꞌone.

²³ Ebich hini no gettaa beeton tuniibe: No daggooch mookkechi awudde asheenaꞌo beetinaꞌone.

²⁴ Eboshin yeshiree boonoshina tookki xallebe; boonoshi xallemmi deejjee gijjoonoo boonoshich qoce. Arooba boonoshi qelloonoo cakkoon hakkemminaꞌone. Eboshi bullin ne tuniigaata, ne toommooch yibbaateebeeto kooto bi tunoon, ne qelloona Muusichi Sheeroon ne quyoon ariyemminaꞌone.

²⁵ Wotta Ayihudo tuneyaani kittinneenaꞌoyich ‘Shahalloyich deejjeetonaa damoonon, taaqqee qititonoo maayaahote; shunee mamoochee wohote’ iyaꞌa no maacceti mooyon koorichoona koorito noone” iyeete.

²⁶ Aroochee Phawuloosi are awudde asheenaꞌon yechiꞌi bi yaachichi boonoshina tookkii xallehe. Biyoo boonoshi xallemmo aati wottoon gaata, wotta boonoshi qelli qellee deejjoon boonoshi giddiyemmo aata gaata arichiyoyich Yeerichi yaafee kexooch giyiye.

Yaafee Kexoochaa Phawuloosi Yecheyoo

²⁷ Asheenaꞌo xallemmi shabaatte qemo ceenn beddaahaa, Isiyee showoochee waati Ayihudeenaꞌo Phawuloosi yaafee kexooch bi beemon beeggiꞌi, asheenaꞌo bullin haachishii Phawuloosi toommooch tiijjiꞌi biin yechiyeete.

²⁸ Aroochee ishichiyeete: “Israꞌeelee asheenaꞌote, noon gaachebote! Bulli xaaꞌooch beeti asheenaꞌo bulli no macceenaꞌonaa no sheeroonon, hini yaafee kexonoo boonoshi hoxemmoyich kocciibeeti uro hinine. Andoo daakkiꞌi Giriikee asheenaꞌon yaafee kexooch giijjiꞌi, hini yaafe xaaꞌoon eeꞌiitone” iꞌi cookeeheete.

²⁹ Ishichii boonoshi ito, ebiyee aaf Phawuloosi Efesoonechi Xirofimoosin yechiꞌi Yerusaalem bi beetaa beeggiꞌi, hini are uroon yechiꞌi yaafee kexooch giyito boonoshich bi shaahenane.

³⁰ Arooba katemoo bulli caagehe; asheenaꞌo bulli boonoshi beetoochee wocee waa kiceeheete; Phawuloosin yechii geechiibee yaafee kexoyee maach kichii, bekkech yaafee kechi kelloon hicciyeete.

³¹ Phawuloosin wuxiya boonoshi qiiccee beetaa, “Yerusaalem bulli shuurii beete” immi woroo hume ginee iraashoyich shaggiye.

³² Biyoo bekkech ginee naayinaꞌo bullin ginee iraasheenaꞌona tookkii yechiꞌi are asheenaꞌo waan wocciye. Asheenaꞌoo hume ginee iraashoonaa ginee naayinaꞌonon beeggiꞌi, Phawuloosin yexon qajjiyeete.

³³ Aroochee hume ginee iraashoo giddee Phawuloosin yechiꞌi, gutte sansalatoona bi cucheyemmoyich gettiye; aroochee are uro koni bi gaata, wotta amooni bi hallito gaatoo echehe.

³⁴ Dofee asheenaꞌo daggoochee qatinaꞌo ikke mooyon, wotta qatinaꞌo bare mooyon gettiibee cookeeheete. Asheenaꞌochi cookoona iberoon ariyoo bi mawiitoyich, ginechinaꞌon “Hini uroon ittoshi beeti ginee kaambooch daambote” iꞌi gettiye.

³⁵ Phawuloosin boonoshi beetooch kichiibeeti daqqooch boonoshi shakkii beetaa, dofee asheenaꞌo biin wuxiya oogichii boonoshi xuꞌeetoyich, ginee naayinaꞌo shaageꞌi daammiyeete.

³⁶ Boonoshi eechiti naboo, hini are asheenaꞌo bulli wuxibote iꞌi cookeebee boonoshi dabbitoyichiye.

Bi Qellich Phawuloosi Taggo

³⁷ Ginechinaꞌo boonoshi ginee kaambooch giijjiya boonoshi iyaa, Phawuloosi hume ginee iraashoon “Ikke mooyon getona, taach daaggibe” iye. Hume ginee iraashoo “Giriikee noonoon arii beetine?

³⁸ Ebiyee aaf hukkoon tiijjaꞌa, awudde hume bokkeenaꞌon yechaꞌa barahooch giyeti Gibitsee asho ne toone?” iye.

³⁹ Phawuloosi wochiꞌi, “Ta Ayihudee yaroo, wotta Kiliqee showooch beeti, aricheti Xeriseesi katemooch shiijjeti asho taane. Hini asheenaꞌoyich ta gettemmoyich taach daaggibe” iꞌi qollehe.

⁴⁰ Hume ginee iraashoo daaggaa, Phawuloosi boonoshi kaambooch kichiibeeti daqqooch kechii neexeechii, kishee malletoona asheenaꞌon ellebote iye. Asheenaꞌo shashewimiꞌi elleheete. Aroo Hibiree noonoona ishichiꞌi yibbaatehe: