Mishiraachechinaꞌo 20 - Kafa Linguistics Project

Makidoonee Showoonaa Giriikee Showoonooch Phawuloosi Hamo

¹ Cangecho aqqetoyee gubb, Phawuloosi Efesooni kittinneenaꞌon ceeggiꞌi kupphiyee ciicoon ciicciye; boonoshin diggiiꞌi Makidoonee showooch hamma kechiye.

² Are showoona hammiibee, kittinneenaꞌon wodde qaaroona ciicciibee, besheꞌi Giriikee showooch shaggiye.

³ Arooch keejje agenoon kotehe; aroyee gubb Sooriyee showooch markaboona hamoyich shalligiye. Tunetaa Ayihudeenaꞌo bi toommooch gondoon boonoshi koceetoyich, Makidoonee showoona wotteꞌi hamoyich kuxxiye.

⁴ Hamma bi tiyaa, ikkikke asheenaꞌo biin deenniyeete; eboshiyoo Beeriyechi Firoosichi bushoo Sophaxiroosi, Tasaloonqechi Arsixirokoosinaa Sikenduusina, Deribechi Gaayoosi, Ximootiyoosi, Isiyee showoochee waati Tikiqoosinaa Xirofimoosina eboshine.

⁵ Eboshi shiichii hammiꞌi Xiroꞌadi katemooch noon quyeheete.

⁶ Wotta Shittoo Giyaani Kochi Baaroyee gubb, Filipphisiyoosee markaboona tiyaꞌa, uuche qemona boonoshi beeti Xiroꞌada shaggehon. Arooch boonoshina tookkaa shabaatte qemon kotehon.

Xiroꞌada Beeti Kittinneenaꞌon Phawuloosi Ciico

⁷ Shabaattee batti batti aabooba, koshon tiishi maaya ikkooch kiceeꞌa no beetaa, Phawuloosi bi yaachich hamma bi gabitoyich, kittinneenaꞌoyich ciiccii beehe; xum gutte qellimooch beddaahaa yibbaatoon genjiihe.

⁸ No kiceeti kechi toommeexi kexooch meeti ceechoo beehe.

⁹ Awuxekiisi getteebeeti ikke gurimaashoo mallee kellooch koteꞌi bi beetaa, Phawuloosichi yibbaatee genjoona tokketoo biin daammiye. Biyoo kechi toommeexi keejjinnee kexoochee showooch holliye. Asheenaꞌo tiijjiꞌi bi kasho kechiton daneheete.

¹⁰ Tunetaa Phawuloosi kindii, bushoon yittii tiqqeꞌi, “Bi kasho wottetone; keqqiyaahote” iye.

¹¹ Wottee toommeexi kexooch kechiꞌi, asheenaꞌona tookkii koshon tiichiꞌi maahe. Phawuloosi wochiꞌi, meeti saatoon showoo harimmi wottoon yibbaatehe; aroochee tiyii hammiye.

¹² Asheenaꞌo qitiꞌi woditi gurimaashoon bi kexooch daammiyeete; oogichiinoo goggeheete.

Milexiin Phawuloosi Hamo

¹³ Phawuloosi “Asoos beddaahaa baatoona hammemmo taane; ittoshi markaboona tayee shiichibote” iꞌi gettiye. Nowoo Asoosaa Phawuloosina daneꞌi tookkii hamoyich gabiyon. Ebich markaboona shiichaꞌa hammaa Asoos shaggehon.

¹⁴ Biyoo Asoosaa noonna bi danetaa, markabooch kichaꞌa biinna tookkaa Mixiliini katemooch hammehon.

¹⁵ Aroochee markaboona tiyaꞌa, dechara Kiyoosi ciinooch shaggehon. Bi yaachich Saamoos, aroochee bi dechara Miliix shaggehon.

¹⁶ Phawuloosi “Isiyee showooch meeti aaboon koteyaache” iꞌi Efesooni katemoon besheꞌi hamoyich kuxxiye. Ebiyoo bi hakkeegaata, Baaraachee aabooba Yerusaalem heeyon bi gabitoyich afaafineꞌiniye.

Efesoonee Waati Kittinnee Guuphi Geeneenaꞌoyich Phawuloosi Yibbaato

¹⁷ Phawuloosi Miliixee Efesoon ashoon wocheꞌi, kittinnee guuphi geeneenaꞌon bi waan ceekkiihe.

¹⁸ Boonoshiyoo bi waan waataa, boonoshich ishichiye: “Isiyee showoon ta baatoona ta neexxetoyee hach, ittoshina tookkaa ta beehooba bulli aaboon aabichaabee ta beeto gaata ittoshi ariibeeto ittoshine.

¹⁹ Ayihudeenaꞌo kiceeꞌi ta toommooch boonoshi deebiti iritoona, bulli mooyoyich ta qelloon yeephaanoon acimoona Doono Yesuusichi wochee bushoo tunaꞌa biich shuuneho;

²⁰ iitoonaa ittoshi kexi kexonooch ittoshich dojjaa ta beehooba, ittoshich deꞌo tunemmo bullin gettehoani ikkoonolla echiyaano taane.

²¹ Ayihudeenaꞌonaa Giriikee asheenaꞌonon ‘Axaaxee gommoochee Yeer waan wotteree ittoshi mulloon no Doono Yesuus Kiristoosi toommooch toꞌiibote’ iyaꞌa manjii getteto taane.

²² “Andoo ta, Yaafe Ayaanoona yechaꞌa, Yerusaalem hammaabeeto taane; aroochaa ta toommooch shaggemmo amo gaata ariyaano taane.

²³ Tunebaani katemi katemoo bullina Yaafe Ayaano taach ‘Cucheyoonaa xuuxee beegona neen quyee beetone’ iꞌi miixee beetone.

²⁴ Tunebaani ta wocon ciichoonaa Doono Yesuus Kiristoosi ‘Yeerichi wojjee mishiraachee qaareechon miixebe’ iꞌi taach bi immiti shuunoon ciichoonon ta qaawaa beetoyich, ta kashoon cir aaxxiyaache.

²⁵ “Ta ittoshi bulli daggooch guuddaabee, Yeerichi taatittineechon dojjito taane; ebiyee gubb illa ta aafoon beegaachemmo ittoshi tunoon ariibeeto taane.

²⁶ Ebich asho bullichi damoochee xalloo ta tunoon ta hanaach ittoshich miixehoye.

²⁷ Ebiyoo Yeerichi gaboochee amoonolla echiyaanoon bullin ittoshich ta gettetoyichiye.

²⁸ Yaafe Ayaano yaabii qeejjechi geeno tuniiꞌi ittoshin ukkiriitone; illa ittoshi qellich, wotta qiddoo bi bagoon bi quyoommon Yeerichi asheenaꞌon shiimeꞌi quyoyich, ittoshi qelloon ariibote! Bi hajjee damoona bi biisheti Yeerichi kittinnee guuphon quyebote.

²⁹ Hiniichee ta hammetoyee gubb, bageenaꞌoyich ariqqeyaachemmi gonde okereenaꞌo ittoshi daggooch boonoshi giyemmon ariibeeto taane.

³⁰ Ebiyee ikkikkeenaꞌo ittoshi daggoochee tiyiree, kittinneenaꞌon boonoshi waan wochiya xumme mooyon boonoshi ciiccemmon ariibeeto taane.

³¹ Ebich kasheyaanoon keejje naton xumoonaa areddoonon eeppaabee, ittoshin ta ciicon shalligibee, ittoshi qelloon quyebote.

³² “Andoo ittoshin kupphiyoonaa yaafeeti asheenaꞌo bullichi daggooch iristoon imonon hakkiibeeti Yeerinaa bi wojjeechon gettiibeeti qaaroonoyich adereto taane.

³³ Ta konichi birewoon woyee aachoon woyee tahoon qaataano taane;

³⁴ eboshin ta hajjee kishoona shuunaabee nooch qaawiimmon taannaa taanna tookkii beetinaꞌonon gaachaa ta beemon ittoshi ariibeeto ittoshine.

³⁵ ‘Deqqii beetoyee immiibeeto diireetone’ iꞌi Doono Yesuusi bi qelloona gettiton shalligaabee, caajjoona maraataa shuunaabee giidaalleenaꞌon dego tun bedo bi tunoon bulli mooyona ittoshich bekkiito taane” iye.

³⁶ Ebiyee gubb, Phawuloosi boonoshi bullina tookkii guteneꞌi corootiye.

³⁷ Bulli oogichii eefeebee Phawuloosin qettoona tiqqeꞌi shummiyeete;

³⁸ oogichii boonoshi ayinito, “Ebiyee gubb ta aafoon beegaachemmo ittoshine” bi itoyichiye. Aroochee markabooch bi kechimmi wottoon deenniyeete.