Mishiraachechinaꞌo 2 - Kafa Linguistics Project

Yesuusichi Asheenaꞌo Toommooch Yaafe Ayaano Kindoo

¹ Baaraachee aabo shagaa, Yesuusichi asheenaꞌo bulli ikkooch kiceeꞌi beeheete.

² Diqqoona giidechi yongee qaaroommi qaaro shimaayoochee waayeehe; koteꞌi boonoshi beeti kexoochoo ceenniye.

³ Qaaqqee aaxxee nalloommon qoodeeꞌi, boonoshi bulli toommooch kindoon beeggiyeete.

⁴ Boonoshi bulli Yaafe Ayaanoona ceenniyeete; bekkech Yaafe Ayaano boonoshich hakkoon imaa boonoshi ariyaani noonoona yibbaateheete.

⁵ Arooba showee toommo bulliich beeti asheenaꞌo daggoochee Yeerich qeyiibeeti Ayihudeenaꞌo Yerusaalem wotteꞌi beeheete.

⁶ Ebi areenaꞌo daggoochee hini qaaroon waayeꞌi dofee asheenaꞌo kiceeheete. Boonoshi showi showee noonoona Yesuusichi asheenaꞌo yibbaatetaa waayeꞌi gaabbiyeete.

⁷ Oogichii worganeebee ishichiyeete: “Hini yibbaateebeeti asheenaꞌo bulli Galiilee asheenaꞌo tooneenaꞌone?

⁸ Ishigaata, no shiijjee showi showee noonoon amoona ariiheete?

⁹ No Faaritee, Meedee, Elaamee, Mesopotaamee, Yihudee, Qephadooqee, Faantoosee, Isiyee,

^10-11 Firigee, Fenfulee, Gibitsee, Qereni gafee gaꞌooch beeti Liibiyee waati no, Roomee waati iibbe Ayihudo noonnaa Ayihudeenaꞌo waan wotteti noonna, Qerixeesee, Arabee showoocheenoo waati no, Yeeri shuuneti gaakkechi shuunoon no showi showee noonoona boonoshi yibbaatetaa waayaabeeto noone” iyeete.

¹² Arooch beetinaꞌo bulli worganeebee, boonoshi hallemmi mooyon tuushiꞌi “Ebi ama getone?” iyeete.

¹³ Tunebaani bareenaꞌo “Uchii masheꞌiniye” iibee cooqqirii cooneheete.

Pheexiroosi Yibbaateti Yibbaatoo

¹⁴ Arooba Pheexiroosi aaraa ikkeenaꞌona tookkii neexeechii bi qaaroon oogichiꞌi ishichiye: “Ayihudeenaꞌote, wotta Yerusaalem beeti asheenaꞌote, ittoshi bulli hini mooyon ta getaa, ibere mulloona elle waayebote.

¹⁵ Ittoshi gabitoommon hini asheenaꞌo mashetinaꞌo tooneenaꞌone. Batt haree keejje saatoone.

¹⁶ Tunebaani hini tuneebeeto, keemechi Yoꞌeeli gettiti mooyone:

¹⁷ ‘Yeeri ishichii beetone: “Yemeenee ciirooba ebiyoommon tunemmone: Meeno taheti asho bulli toommooch ta Ayaanoon woniyemmo taane. Ittoshi anaami bushiisheenaꞌonaa maache bushiisheenaꞌona keemoon keemmemminaꞌone; ittoshi daggeexi gurimaasheenaꞌo yaaꞌoon beeggemminaꞌone; geeneenaꞌoo gumon gummemminaꞌone.

¹⁸ Aroobee yemeenooch ta guuninaꞌonaa gonneenaꞌonochi toommooch ta Ayaanoon woniyemmo taane; keemoonoo keemmemminaꞌone.

¹⁹ Gaakkechi shuunoon damba shimaayooch, worganikkiti malletoonoo desh showooch, bekkiyemmo taane; damoo, qaaqqoo, cufee duulloo tunemmone.

²⁰ Arooba oogeti magge mooyo halleyemmi, Doonochi aabo womoyee shiichi, aabe manderemmine; ageneyoo damoo tunemmine.

²¹ Doonochi shigoon ceeggimmo bulli wodemmone” itone’ iye.

²² “Hini Israꞌeeleenaꞌote, andoo hini mooyon waayebote: Ittoshi qelloona ittoshi arii beetoommon, Naazireetechi Yesuusi koni bi tunoon, Yeeri biinna ittoshi daggooch bi shuuneti gaakkechi shuunoona, worganikkiti mooyonaa malletoona xiisheetone.

²³ Ebiyee Yeeri bi hajjee shalligoonaa bi ariyoona ittoshich beshiitaa bi ichemmoyich shiichiꞌi maaccitone; ittoshiyoo gonde asheenaꞌo kishoona yooddiiꞌi wuxiihote.

²⁴ Tunebaani Yeeri qitee maaxoon aalliiꞌi, qitoochee biin tiijjiye; ebiyoo qitoo biin yechii neechoon hakkoo bi qajjitoyichiye.

²⁵ Daawiti ebi aroochon ishichitone: ‘Bulli aaboon Doonon ta aaf ciinnehoye; bi ta qanne badd bi beetoyich ta mullo gaabbaache.

^26-27 Ebich ta mullo emiriye; ta heciyoo oogeti emiroona yibbaatehe. Siꞌooloochee taan kichemmo ne tunetoyich, ne yaafoo taan oꞌe getiree daaggaachemmo ne tunetoyich, hini qitemmi ta meeno wotta gibenoona beeyemmone.

²⁸ Kashee gommon taach bekkiito neene; neenna tookki ta tunehooba, oogichi taan emirikkemmo neene’ itone.

²⁹ “Ta maneenaꞌote! No qaabbechi Daawiti qitii duukkoon, bi duukketi masho hanaach beddaahaa hiniich beemonoo ittoshich xalla geton hakkiyoye.

³⁰ Tunetaa Daawiti kashoona beebee, keemecho bi tunetoyich, Yeeri ‘Ne yaroochee ikkoon ne taatee qeenooch kotiyemmo taane’ iꞌi bi wogeti wogoon bi ariitoyich,

³¹ Kiristoosi qitoochee timichon shiichii beeggiꞌi, ‘Biyoo Siꞌoolooch echeyaanoone; bi meenoo oꞌaanoone’ iꞌi gettiye.

³² Illa hini Yesuusin Yeeri qitoochee tiijjitone; no bulli ebi mooyoyich miixoo noone.

³³ Andoo Yeerichi qanne badd oogoona koteꞌi bi Nihoo Yeeri gibenikkiti Yaafe Ayaanoon bi waanee deqqiꞌi, hini and ittoshi beeggii beetonaa waayee beetonon ukkiye.

^34-35 Daawiti shimaajj keyaanoone; tunetaa aroo, ‘Doono Yeeri, ta Doonon, “Ne etteenaꞌon ne baatee dechiich ta tuniimmi wottoon, ta qannooch kotebe” itone’ iye.

³⁶ “Illa Yeeri hini ittoshi yooddiiti Yesuusin, Doononaa Kiristoosinon bi tuniyoon Israꞌeelee asho bulli manjiiree ariibe” iye.

³⁷ Asheenaꞌo ishin waayeꞌi, boonoshi mulloona xeejjii miijjiyeete. Pheexiroosinaa bare mishiraachechinaꞌonon “No maneenaꞌote, ebich and aabichibona?” iꞌi echeheete.

³⁸ Pheexiroosi wochiꞌi, “Axaaxee gommoochee Yeer waan wottebote. Yeeri ittoshi axaaxoon bi maaremmoyich, ittoshi ikkikkoona Yesuus Kiristoosichi shigoona aacona afaalleebote; Yaafe Ayaanee wojjoon deqqemmo ittoshine.

³⁹ Gibenikkeeti gibeno ittoshinaa ittoshi bushiishoonoyich, no Doono Yeeriyoo bi waan bi ceeggiibeeti, wohooch beetinaꞌonoyichiye” iye.

⁴⁰ Meeti bare qaaroona boonoshich miixeebee, “Hini xumme shiijjeree toommooch woyemmi naxoochee ittoshi qelloon wodiibote” iꞌi ciicciye.

⁴¹ Aroochee Pheexiroosi gettiti yibbaatoon waayeꞌi, iberiitinaꞌo aacona afaalleeheete. Ebina keejje hum bede asheenaꞌo Yesuusichi asheenaꞌo toommooch daakkeeheete.

Yesuusichi Asheenaꞌo Ikkittino

⁴² Are asheenaꞌo mishiraachechinaꞌochi doyoon waayeebee, ikkottinoona beebee, maayoon ikkooch maabee, manjii corootii beeheete.

⁴³ Arooba mishiraachechinaꞌo wodde gaakkechi shuunoonaa worganikkiti malletoonon boonoshi bekkiitoyich asheenaꞌo bulli oogichii worganeheete.

⁴⁴ Yesuusichi asheenaꞌo bulli ikkooch tuneꞌi, boonoshi hajjito bullin ikkooch gogeheete.

⁴⁵ Boonoshi showoonaa boonoshi hajjitonon kemmiꞌi, ashich qaawiitoommon qoodii beeheete.

⁴⁶ Bulli aaboon ikkooch yaafee kexooch kiceebee, boonoshi kexi kexooch ataalleebee, emiroonaa gaawe mulloona ikkooch maa beeheete.

⁴⁷ Yeerin galleteebee asheenaꞌo bullina naadee beeheete. Doonoo wodemminaꞌon qemi qemona boonoshi toommooch daakkii beehe.