Mishiraachechinaꞌo 19 - Kafa Linguistics Project

Efesoon Mishiraachee Qaaroon Phawuloosi Geto

¹ Aphiloosi Qorontoos bi beetaa, Phawuloosi dambee showoona besheꞌi Efesoon shaggiye. Arooch ikkikke Yesuusichi dabbeenaꞌon danehe.

² Boonoshinoo “Mulloon Yesuusi toommooch ittoshi tooꞌiihooba, Yaafe Ayaano ittoshi toommooch kindite?” iꞌi echehe. Boonoshi wochiꞌi, “No toommooch kindaanoone; Yaafe Ayaanee beemonolla waayeyaano noone” iyeete.

³ “Ishigaata, am shaahe afaalleyooniye ittoshi afaalleeto?” iꞌi echehe. Boonoshiyoo wochiꞌi, “Yowannisichi afaalleyooniye” iyeete.

⁴ Phawuloosiyoo “Yowannisi biyee gubb woyemmi Yesuusi toommooch mulloon boonoshi tooꞌiyemmoyich are asheenaꞌoyich gettiibee, axaaxee gommoochee Yeer waan boonoshi wottoon bekkiibeeti afaallooniye aacona bi afaallito” iye.

⁵ Ishin waayeꞌi, Doono Yesuusichi shigoona aacona afaalleeheete.

⁶ Phawuloosiyoo bi kishoon boonoshi toommooch bi kotiitaa, Yaafe Ayaano boonoshi toommooch kindiye. Aroochee boonoshi ariyaani noonoona yibbaateheete; keemoonoo keemmiyeete.

⁷ Ebi asheenaꞌo bulla aaraa gutta bedeenaꞌone.

⁸ Ebiyee gubb, Phawuloosi Ayihudeenaꞌo kiceebeeti kexooch giyiꞌi, aafoon kupphee gajjiteebee, keejje agen bedoon Yeerichi taatittineechon gettiye.

⁹ Tunebaani ikkikkeenaꞌo “Phawuloosi yibbaatoyich deꞌa getaachone” iꞌi dofee ashi aafooch Doono Yesuusichi gommon naageheete. Ebich Phawuloosi boonoshi waanee wokkiꞌi, kittinneenaꞌon ikke badd kichiꞌi, Xiraanoosi goddemmoochaa, qemi qemona yibbaatee beehe.

¹⁰ Phawuloosi Isiyee showooch beeti Ayihudeenaꞌonaa Giriikee asheenaꞌo bullina Yeerichi qaaroon boonoshi waayemmi wottoon, gutte natt bedoon eechii beehe.

Isqeewichi Bushiisheenaꞌo Mooyo

¹¹ Yeeri oogeton worganikkiti gaakkechi mooyon Phawuloosi kishoona bekkii beehe.

¹² Phawuloosi taheti tahoonona daammii biiyechinaꞌochi achooch boonoshi shakkiitaa, biiyechinaꞌo wodii beeheete; asheenaꞌo toommooch beeti yinnoo boonoshin gawukkiꞌi hammii beehe.

¹³ Wotta yinneenaꞌon asheenaꞌo toommoochee yookkiibee, guuddiibeeti Ayihudeenaꞌo daggoochee ikkikkeenaꞌo “Phawuloosi gettiibeeti Yesuusina ittoshin callehone” iibee Doono Yesuusichi shigoon ceeggiꞌi, yinneenaꞌon asheenaꞌo toommoochee yoohoyich qiiccee beeheete.

¹⁴ Arooba Ayihudee qeeshee ukkiroo tuneti Isqeewich shabaatte bushiisheenaꞌo eechii beeheete.

¹⁵ Tunebaani yinno boonoshich wochiꞌi, “[Iberoon] Yesuusin ariibeeto taane; Phawuloosinoo tuushaano taane; ittoshiyochi koni ittoshine?” iye.

¹⁶ Are yinno yechiti uro boonoshin biittii yechiꞌi yebbehe; boonoshi tahoonoo keexxii, boonoshi achoon damiiꞌi, are kexoochee kechii shokkaachoon boonoshi wocemmi wottoon xoobbiye; boonoshinoo yittiihe.

¹⁷ Hini mooyon Efesoon beeti Ayihudeenaꞌonaa Giriikeenaꞌo bullina waayeheete; oogichiinoo shattiyeete; Doono Yesuusichi shigoonoo oogiiheete.

¹⁸ Boonoshi mulloon Yesuusi toommooch tooꞌiiti meeti asheenaꞌo waaꞌi, gonde boonoshi shuunoon aanniyeete.

¹⁹ Meeti kaayechinaꞌo boonoshi kaayee macaafoon ikkooch kiciꞌi, asho bulli aafooch michiyeete. Are macaafeenaꞌochi gatiyoo hiddaa, aache hume xure birewoo tunehe.

²⁰ Ebiyoommi gommona Doonochi qaaro gaminnii, wudoonoo danee hammiye.

Efesoon Tiyiti Kaaree Dulloo

²¹ Ebi bulli tunetoyee gubb, Phawuloosi Makidoonee showoonaa Akaayee showoonon besheꞌi Yerusaalem hamoyich gabiye. “Arooch ta shaggetoyee gubb, Room wotta hamo taach qaawiihe” iye.

²² Ebich biin deggiibeeti gutte asheenaꞌo Ximootiyoosinaa Erasxoosinon Makidoonee showooch daachiichii, aroo Isiyee showooch daakkiꞌi kotehe.

²³ Arooba ebi Doonochi gommi naboona Efesoon magge dulloo tiyiye.

²⁴ Ikke Demexiroosi getteebeeti gooshukkoo Arixeemisi yaafee kechi misiloon birewoona ukkiibee biinna tookkii shuuneebeeti gooshukkeenaꞌoyich wodde gijjoon danii beehe.

²⁵ Ebich are uro hini gooshukkeenaꞌonaa boonoshichoommon shuuneebeeti bareenaꞌonon kiciꞌi ishichiye: “Hini asheenaꞌote, gijjoon no danaabeeto hini malletoon shuunoona tunoon ariibeeto ittoshine.

²⁶ Tunebaani hini Phawuloosi ‘Ashi kishoona shuuneeti malleteenaꞌo nuggisheenaꞌo tooneenaꞌone’ ii beetone; Efesooni katemooch baach tuneyaanoon giisheche katemoyee besh, Isiyee showoo bulliich beeti meeti asheenaꞌo bi yibbaatoon iberoo tuniiꞌi boonoshi muricon beeggiibeeto, waayeenoo beeto ittoshine.

²⁷ Illa asheenaꞌo no shuunoon hoxo qayaacheete; ebiyeenoo Isiyee showoonaa alemo bullinooch beetinaꞌo maddeebeeti ooge nuggishee Arixeemisichi yaafee kexo duppeti guudoochoommon hoxeyemmone; biyoo bi oogittinoochee kindemmine” iye.

²⁸ Kiceeti asheenaꞌo ebin waayee oogichii ippeꞌi, “Efesoonechi Arixeemisi qaabbeene” iibee cookeeheete.

²⁹ Katemoo bulli dulleehe; boonoshiyoo Makidoonee showoochee waati Gaayoosinaa Arsixirokoosina getteebeeti, Phawuloosina tookkii gommon shaꞌeebeeti asheenaꞌon manjii yechiꞌi, ikke mulloona iitee xaaꞌooch yongeheete.

³⁰ Phawuloosiyoo “Asheenaꞌo aafooch hami neexeree yibbaatemmo taane” iꞌi hamma bi tiyaa, kittinneenaꞌo hamaachine iꞌi bajjiyeete.

³¹ Wotta Isiyee ukkireenaꞌo daggoochee Phawuloosi shunecho tunetinaꞌo bi waan ashoon wocheꞌi, “Iitee xaaꞌooch hammaahine” iꞌi qolleheete.

³² Kiceeti dofee asheenaꞌo daggoochoo dulloo tunetoyich, beshe asheenaꞌo amoyich boonoshi kiceeto gaatoona ariyaaneenaꞌone; ebich ikkoo ikke mooyon, baroo bare mooyon gettiibee cookee beeheete.

³³ Arooch beeti Ayihudeenaꞌo Iskindiroosin xuqqiꞌi aaf kichiyeete; asheenaꞌo daggoochee ikkikkeenaꞌo “Ebinaa ebinon gete” iꞌi bi toommooch cookeeheete. Biyoo kechiꞌi asheenaꞌo ellemmoyich kishoona malleteꞌi taggooch qaawiye.

³⁴ Tunetaa asheenaꞌo Ayihudo bi tunoon ariiꞌi, bulli ikke qaaroona “Efesoonechi Arixeemisi qaabbeene” iibee gutte saati bedoon cookeeheete.

³⁵ Ebiyee gubb, are katemee ukkiroo asheenaꞌon ellebote iꞌi tiyii ishichiye: “Hini Efesooni asheenaꞌote, Efesooni katemoo ooge Arixeemisichi yaafee kexonaa shimaayoochee kinditi bi malletoonon quyecho bi tunoon ariyaani asho, konine?

³⁶ Illa ebin nookkemmo aalloone; ebich nibbeꞌi elloonaa tuneyaani mooyon afaafineꞌi shuunee qayona ittoshich qaawiihe.

³⁷ Yaafee kechi qiicoon gaayaaneenaꞌo, no nuggisheen naagaani hini asheenaꞌon hiniich deebito ittoshine.

³⁸ Illa Demexiroosinaa biinna tookkii beeti gooshukkeenaꞌona boonoshi taggemmi asho bi beegaata, nallechinaꞌo nalliibeeti aabo beetone; arooba waaree taggebeete.

³⁹ Bare mooyo ittoshi qaawiibeeto gaata, neexeti iitooba tatoona nalleyemmone.

⁴⁰ Ebiyee ‘Hanaach hukkoon tiijjitinaꞌo boonoshine’ getaa no taggeyaachemmoyich shatteto taane. ‘Hini cangecho amoona tiyiye?’ getaa no echee gaata, no wochemmi noonoo nooch aalloone” iye.

⁴¹ Ishichiꞌi kiceeti iitoon gaakkii shacciye.