Mishiraachechinaꞌo 17 - Kafa Linguistics Project

Tasaloonqa Mishiraachee Qaaroo Getteyoo

¹ Phawuloosinaa Sillaasina Amfipoolisi katemoonaa Apilooni katemoonon besheꞌi, Tasaloonqa hammiyeete; aroochoo Ayihudeenaꞌo kiceebeeti kexo beehe.

² Phawuloosi bare Ayihudeenaꞌo kiceebeeti kexooch bi gimoommon, andoo hini Ayihudeenaꞌo kiceeti kexooch giyiye. Keejje shabaatta bedoon shambetoon boonoshina tookkii Yaafe Macaafoochee malleteebee asheenaꞌoyich gettiye.

³ Macaafooch kooreeton kichii gettiibee, “Kiristoosi xuuxee beegonaa qitoochee timona biich qaawiihe” iibee boonoshich manjiihe. “Ta ittoshich gettaabeeti Yesuusi aroo Kiristoosine” ii beehe.

⁴ Ebich boonoshi daggoochee ikkikkeenaꞌo bi gettiti qaaroon iberiiꞌi Phawuloosinaa Sillaasina tookkii ikkotteheete; wotta Yeerich qeyiibeeti, meeti Giriikeenaꞌonaa are katemoochee aricheti genneenaꞌona boonoshina tookkii ikkotteheete.

⁵ Tunetaa Ayihudeenaꞌo qanaatoona tiyiꞌi, shuuna biisheenaꞌon gabiyoochee daneꞌi, meeti asheenaꞌon boonoshi hillooch kiciꞌi, katemoon shuurikkiyeete. Phawuloosinaa Sillaasinon asheenaꞌo waan kichoyich qaawiꞌi, Yaasoonichi shaaqqoon tiichii giyiyeete.

⁶ Tunetaa qaawii mucceꞌi tiyii, Yaasooninaa bare kittinnee maneenaꞌona daggoochee ikkikkeenaꞌon katemee ukkireenaꞌo waan geechii deebiyeete. Cookeebee, “Showoo bullin shuurikkii beetinaꞌo eboshi hini katemooch wotta waatinaꞌone;

⁷ Yaasooniyoo boonoshin bi kexooch giijjitone; eboshi bulli ‘Yesuusi getteebeeti bare taatoo beetone’ iibee Qesaarichi sheeroon tiichii beetinaꞌone” iꞌi gettiyeete.

⁸ Ebich hini are asheenaꞌonaa katemee ukkireenaꞌona hini mooyon waayeꞌi keqqiyeete.

⁹ Boonoshiyoo Yaasooninaa bare kittinnee maneenaꞌona waanee gijjoon yechiichii gawukkiyeete.

Beeriya Mishiraachee Qaaro Getteyoo

¹⁰ Xum bekkech kittinnee maneenaꞌo Phawuloosinaa Sillaasinon Beeriya daachiiheete. Boonoshiyoo arooch shaggiꞌi, Ayihudeenaꞌo kiceebeeti kexooch giyiyeete.

¹¹ Areenaꞌo Tasaloonqi katemooch beetinaꞌoyee gamini mullechinaꞌone; ebich “Bi gettiibeeti mooyo iberoo tunehe?” iibee qemi qemona Yaafe Macaafoon galliibee, Phawuloosi yibbaatoon ibere mulloona waayoyich dakii beeheete.

¹² Ebich boonoshi waanee meetinaꞌo boonoshi mulloon Yesuusi toommooch tooꞌiiheete; wotta Giriikeenaꞌo daggoochee aricheti meeti genneenaꞌonaa anaaminaꞌona boonoshi mulloon Yesuusi toommooch tooꞌiiheete.

¹³ Tunetaa Tasaloonqa beeti Ayihudeenaꞌo Phawuloosi Beeriya hammiꞌi Yeerichi qaaree geton ariiꞌi, are katemooch wotta hammiꞌi dofee asheenaꞌon shuurikkiyeete.

¹⁴ Ebich arooba bekkech kittinnee maneenaꞌo Phawuloosin baharee gashooch beddaahaa daachiiheete; tunetaa Sillaasinaa Ximootiyoosina Beeriya echeheete.

¹⁵ Phawuloosin deennitinaꞌo Ateeni katemooch beddaahaa shakkiiheete. Boonoshi shakkiitoyee gubb, “Sillaasinaa Ximootiyoosina kaateree ta waan wobeete” iꞌi Phawuloosi boonoshina wochehe.

Ateena Mishiraachee Qaaro Getteyoo

¹⁶ Phawuloosi are Ateeni katemooch koteꞌi Sillaasinaa Ximootiyoosinon quyeebee, are katemooch asho goyinneebeeti shahalloo meeton beeggiꞌi, oogichii ayinii yiijjiye.

¹⁷ Ebich Ayihudeenaꞌo kiceebeeti kexoochaa Ayihudeenaꞌonaa Yeerich qeyiibeeti bare asheenaꞌona tookkii, wotta bulli aaboon gabiyoochaa bi danemmi asheenaꞌona tookkii yibbaatee beehe.

¹⁸ Arooba Efikiroosinaa Istiikina getteebeeti dojjechinaꞌo dojjiti mooyon dabbii beetinaꞌo daggoochee ikkikkeenaꞌo biinna daneheete. Boonoshi daggoochee ikkikkeenaꞌo “Hini kasheyaani noonecho amoon gettane bi ii beeto?” iyeete. Bareenaꞌo, Phawuloosi Yesuusichon, wotta qititinaꞌochi timichon boonoshich bi gettitoyich, wochiꞌi, “Dallaawe nuggisheenaꞌochi wochoon bechecho shaahiye” iyeete.

¹⁹ Arooba Arifaagoosi getteebeeti xaaꞌooch kiceeti asheenaꞌo waan biin ataalliꞌi daammiyeete. Arooch boonoshi shaggitoyee gubb, “Hini ne gettaabeeti andire doyoo amo gaata waayoyich qaawaabeeto noone.

²⁰ Ne gettaabeeti mooyo nooch andiro bi tunetoyich, kaachiree ne gettemmoyich qaawaabeeto noone” iꞌi echeheete.

²¹ Ebin boonoshi echeti naboo Ateeni katemeexi asheenaꞌo bullinaa iibbittinoona waaꞌi arooch beeti bare asheenaꞌona andire mooyon yibbaateebee, waayeebeenoo boonoshi heechii beetoyichiye.

²² Arooba Phawuloosi Arifaagoos kiceeti asheenaꞌo daggooch tiyii neexeꞌi ishichiye: “Ateeni asheenaꞌote, ittoshi meeti nuggisheenaꞌoyich oogichiꞌi ittoshi maddoon beeggeto taane.

²³ Ishichaa ta gettaabeeto, ittoshi goyinneebeeti xaaꞌeenaꞌon guuddaa beeggaꞌa, ‘Aricheyaani nuggishoo’ getaa kooreeti deejjee xaaꞌoon ta danetoyichiye. Illa and ittoshich ta gettaabeeto, ‘Aricheyaani nuggishoone’ iꞌi ittoshi goyinneebeeto, koni bi tunooniye.

²⁴ “Aroo alemoonaa bi daggooch beeto bullinon halliti Nuggishoone; showoonaa shimaayoonochi Doonone; ashi kishoo shuuneti yaafee kexooch beetaache.

²⁵ Wotta aroo kashoon, hiinnoonaa bulli mooyonon asheenaꞌo bullich immiibeeto bi tunetoyich, biich shappito aalloone; ashi dego biich qaawiyaache.

²⁶ Showee toommo bulliich boonoshi beeyemmoyich, aagetee asheenaꞌo bullin ikke ashoochee halliye. Wotta boonoshin hallaan beebee, boonoshi kashee yemeenoonaa boonoshi beeyemmi xaaꞌoonon shiichiꞌi daarehe.

²⁷ Ebin bi tuniito, asheenaꞌo shafebee Yeerin qaawiree boonoshi danemmoyichiye. Tunetaa Yeeri no bulli waanee woho toonoone.

²⁸ ‘Biinna kashecho tunaꞌa shuuraabeeto noone; beemonoo beeto noone’ getteetone. Wotta ittoshi daggooch beeti tochee ariyechinaꞌo daggoochee ikkikkeenaꞌo ‘No wotta bi bushiishoo noone’ iꞌi boonoshi gettiti mooyo iberoone.

²⁹ “Ebich Yeerichi bushiishoo no gaata, ‘Yeeri ashi ariyoonaa shalligoona shuuneeti aachee woyee birewee woyee xaqqee malletoon shaahoone’ getiree gabaayone.

³⁰ Illa Yeeri besheti tuushee yemeenoon haddaanoon qajjitone; tunetaa and boonoshi kexi kexooch beeti asheenaꞌo bullin ‘Ittoshi gonde gommoochee ta waan wottebote’ iꞌi gettitone.

³¹ Ishichii Yeeri ito, bi kaacciti ashoona alemo bullin tachiree bi nallemmi aaboon bi taajjetoyichiye. Ebi bullin bi xiishito, aroon qitoochee bi tiijjoonane” iye.

³² Phawuloosi “Qititinaꞌo tiyemminaꞌone” iꞌi bi getaa, waayetinaꞌo daggoochee qatinaꞌo cooneheete; wotta qatinaꞌo “Hini mooyon wochiree ne getaa waayebone” iyeete.

³³ Ebiyee gubb, Phawuloosi boonoshi daggoochee kechiꞌi hammiye.

³⁴ Tunetaa ikkikke asheenaꞌo Phawuloosina tookkii ikkotteꞌi, boonoshi mulloon Yesuusi toommooch tooꞌiiheete. Eboshi daggooch Arifaagoos kiceeti Giriikee nallechinaꞌoochee ikkoo tuneti Diyonasiyoosi getteebeeti uro, wotta Demaariisi getteebeeti ikke ureenaa bareenaꞌona beetinaꞌone.