Mishiraachechinaꞌo 14 - Kafa Linguistics Project

Iqooniyoon Mishiraachee Qaaro Getteyoo

¹ Iqooniyoon beeti Ayihudeenaꞌo kiceebeeti kexooch Phawuloosinaa Barnabaasina tookkii giyiyeete; Yeerichi qaaroon kaachiꞌi boonoshi gettitoyich, Ayihudeenaꞌonaa Aageteenaꞌonochi daggoochee meeti asheenaꞌo boonoshi mulloon Yesuusi toommooch tooꞌiiheete.

² Tunebaani ebin qajjiti Ayihudeenaꞌo Aageteenaꞌon kocciꞌi, boonoshi mulloon Yesuusi toommooch tooꞌiiti asheenaꞌon oogichi boonoshi shixxemmoyich tuniiheete.

³ Ebich Phawuloosinaa Barnabaasina Doono Yesuusichi mooyon aafoon kuppheꞌi gettiibee, arooch meeti agenoon koteheete. Doono Yesuusi boonoshi kishoona meeti worganikkiti malletoonaa gaakkechi shuunoonon bekkiibee, bi immemmi wojjeechon boonoshi gettiti wocho iberoo bi tunoon manjii beehe.

⁴ Katemeexi asheenaꞌo bulli gutta qoodeeꞌi, qatinaꞌo Ayihudeenaꞌona tookkii, qatinaꞌo mishiraachechinaꞌona tookkii tuneheete.

⁵ Arooba Aageteenaꞌonaa Ayihudeenaꞌona boonoshi ukkireenaꞌona tookkii tuneꞌi, Phawuloosinaa Barnabaasinon iritiyoonaa xaqqoona yexonoyich koceeheete.

⁶ Boonoshiyoo ebin ariiꞌi Lisxirinaa Deribina getteebeeti katemeenaꞌonaa boonoshi gaꞌooch beeti showoonooch hammiyeete; ebi are katemeenaꞌo beeto Liqoonee showee daggoochiye.

⁷ Aroochoo mishiraachee qaaroon gettiyeete.

Lisxira Mishiraachee Qaaro Getteyoo

⁸ Arooba Lisxiri katemooch baatoo qometi ikke uro beehe. Biyoo bi shiijjetooch baatoona shaꞌee ariyaani uroone.

⁹ Hini uro Phawuloosi yibbaatoon koteꞌi ellee beehe. Phawuloosi biin manjii ciinnii, wodoyich mulloon Yeeri toommooch tooꞌiito bi tunoon beeggiꞌi,

¹⁰ bi qaaroon oogichiꞌi uroon “Tiyi kaameree neexebe” iye. Uroo kotoochee capphiꞌi tiyii neexehe; okk hach wottee shaꞌehe.

¹¹ Arooba kiceeti dofee asheenaꞌo Phawuloosi tuniiton beeggiꞌi, boonoshi qaaroon oogichiꞌi Liqoonee noonoona “Nuggisheenaꞌo ashoon shaahiꞌi no waan kinditeete” iyeete.

¹² Ebich Barnabaasin “Diyi” iyeete; Phawuloosin yibbaatoona beshoo bi tunetoyich, “Herimeni” iyeete.

¹³ Arooba katemee maach Diyichi yaafee kexo beetone; arooch shuuneebeeti, qeeshoo gattee wurinaꞌonaa gengaa cucheti mocee bungoonon katemee kellooch deebii, kiceeti dofee asheenaꞌona tookkii tuneꞌi boonoshich deejjiya qaawiye.

¹⁴ Tunebaani mishiraachechi Barnabaasinaa Phawuloosina ishin waayeꞌi, boonoshi tahoon keexxiꞌi, asheenaꞌo daggooch wocciyeete; cookiibeenoo ishichiyeete:

¹⁵ “Hini asheenaꞌote! Ebin amoyich shuunee beetote? No ittoshiyoommi asho noone. Hiniich no waato, hini duube mooyinaꞌoyich goyinnoochee shimaayoonaa showoonon, baharoonoo, boonoshi daggooch beetinaꞌo bullinoo halliti, beeyecho tuneti Yeer waan ittoshi wottemmoyich, mishiraachee qaaroon ittoshich gettaniye.

¹⁶ Besheti yemeenooba aageteenaꞌo bulli boonoshi shunniti gommona boonoshi hammemmoyich Yeeri boonoshin qajjiye.

¹⁷ Tunebaani shimaayoochee amiyon dichiibee, maayo aafemmi yarimmoon immiibee, no maayoon abbetiibee, oogichii noon emirikkiibeenoo, Nuggishoo bi tunoon manjiibeeti deꞌe shuunee shuunoon kuxaanoone” iyeete.

¹⁸ Ishichiꞌi gettiibee, asheenaꞌo deejjoon boonoshich deejjaachemmoyich wodde iritoona bajjiyeete.

¹⁹ Arooba ikkikke Ayihudeenaꞌo Fesidee showooch beeti Antsooki katemoonaa Iqooniyooni katemoonoochee tiyiꞌi, Lisxiri katemooch waaheete; asheenaꞌon kocciꞌi Phawuloosin xaqqoona yexxiyeete. Boonoshich qitito bi shaahaa, katemoyee maach geechii kichii duppiyeete.

²⁰ Tunebaani Yesuusichi dabbeenaꞌo waa biin giichiꞌi neexemmona, tiyiꞌi katemooch giyiye. Dechara Barnabaasina tookkii Deribi katemooch hammiye.

Sooriyee Showooch Beeti Antsooka Phawuloosinaa Barnabaasina Wotto

^21-22 Phawuloosinaa Barnabaasina Deribi katemooch mishiraachee qaaroon gettiꞌi, meeti asheenaꞌon Yesuusichi dabbeenaꞌo tuniiheete. Ebiyee gubb Yesuusichi dabbeenaꞌo mulloon kupphiibee, boonoshi mulloon bi toommooch boonoshi tooꞌiiti Yesuusina manjiree boonoshi beeyemmoyich ciicciibee, “Yeerichi taatittineech gimoyich wodde iritoon beego nooch qaawiihe” iibee Lisxirinaa Iqooniyooninooch, Fesidee showooch beeti Antsooki katemoochoo wotteheete.

²³ Are katemeenaꞌooch beeti kittinnee guuphinaꞌo bulli toommooch geeneenaꞌon kaacciꞌi boonoshi ukkiriitoyee gubb, coomii corootiꞌi, boonoshi mulloon bi toommooch boonoshi tooꞌiiti Doono Yesuusich beshii immiyeete.

²⁴ Ebiyee gubb, Fesidee showoona besheꞌi, Fenfulee showooch hammiyeete.

²⁵ Are showooch beeti Ferigi katemooch mishiraachee qaaroon boonoshi gettitoyee gubb, baharee gashooch beeti Axaali katemooch hammiyeete.

²⁶ Aroochee wocheeton ciichiichii, shiichiꞌi Yesuusichi asheenaꞌo Yeeri bi wojjoona boonoshin bi quyemmoyich, biich boonoshi adereti, Sooriyee showooch beeti Antsooka markaboona hammiyeete.

²⁷ Boonoshi shaggitoyee gubb, kittinnee guuphi asheenaꞌon kiciꞌi, Yeeri boonoshina tookkii tuneꞌi bi tuniito bullin, Aageteenaꞌo Yesuusi toommooch mulloon tooꞌiyemmoyich kellee bi qechoonoo boonoshich gettiyeete.

²⁸ Arooch Yesuusichi dabbeenaꞌona tookkii meeti aaboon koteheete.