Mishiraachechinaꞌo 12 - Kafa Linguistics Project

Kittinneenaꞌo Toommooch Mooyo Daakkii Timo

¹ Aroobee yemeenooch taatoo Heroodisi iritoon bekkiiya Yesuusichi asheenaꞌo daggoochee ikkikkeenaꞌon yechiihe.

² Yowannisi manoo Yaaqobin goraadoona wuxiihe.

³ Ebina Ayihudeenaꞌo emiroon beeggiꞌi, daakkii Pheexiroosin wotta yechiihe. Ebi tuneto, Shittoo Giyaani Kochi Baaroobane.

⁴ Taatoo Heroodisi Pheexiroosin yechiꞌi, cuyee kexooch cuchiye. Awudde awudde asho beeti awudde guuphi ginee naayinaꞌoyich quyebote iꞌi beshii immiye. Beshee Baaroyee gubb asheenaꞌo aafooch kichiya gabiye. Kichiya bi gabiti naboo, Pheexiroosi toommooch boonoshi nallemmoyichiye.

⁵ Ebichi naboona Pheexiroosi cuyee kexooch quyee beehe. Tunebaani arooba kittinnee guuphi asheenaꞌo kiceeꞌi biich Yeerin manjii qollee beeheete.

Cuyee Kexoochee Pheexiroosi Keyo

⁶ Taatoo Heroodisi “Pheexiroosin yaach asheenaꞌo aafooch kichibona” iꞌi bi gabiti xumich, Pheexiroosi cuyee kexooch bi yoochinaa bi qanninooch gutte ginee naayinaꞌona tookkii sansalatoona qoqqaaneeꞌi beebee, tokketoo biin yeshaa tokketehe. Wotta kellechinaꞌo kellooch cuyee kexon quyee beeheete.

⁷ Bekkech Doonochi maraakoo bekkehe; cuyee kexoochoo bekko bekkehe. Hini are maraakoo Pheexiroosin shuurikkii tiijjiꞌi, “Kaate tibe” iye. Bekkech Pheexiroosi cucheti sansalato bi kishoochee holliye.

⁸ Aroochee maraakoo “Edderee ne caammoon gede” iye. Pheexiroosiyoo biich getteton tuniihe. “Ne tahoon taheree taan dabbibe” iye.

⁹ Pheexiroosi kechii maraakoon dabbiye. Areegaata yaaꞌoon beeggii beetonalli biich bi shaahiibeeto, maraakoo shuuneti mooyo biich iberoon shaahaanoone.

¹⁰ Kellechinaꞌo quyeebeeti gutte xaaꞌoon besheꞌi, maach kichiibeeti xuuree shaaqqooch shaggiyeete. Aroo bi aalla qecheetaa, kechiꞌi ikke gommona besheheete. Tookkii hammii boonoshi beetaa, maraakoo biyee bariꞌi hammiye.

¹¹ Aroochee Pheexiroosi bi mullo yeshaa ishichiye: “Doono bi maraakoon deejjiꞌi, taatoo Heroodisichi kishoochee, wotta Ayihudeenaꞌo ta toommooch gabiti mooyo bulliicheenoo taan bi wodiyoon and xiishaa ariito taane” iye.

¹² Pheexiroosi bi mullo yeshaa, meeti asheenaꞌo kiceeꞌi, Yeerin boonoshi qolleebeeti, Maariyami kexooch hammiye; hini are Maariyamiyoo Maariqoosi getteebeeti Yowannisi indeene.

¹³ Pheexiroosi are kexooch shaggiꞌi uxeree kelloon bi qoppimmona, Roodi getteebeeti ikke shaajjetee waayaꞌa kellooch giddaa ellahan;

¹⁴ Pheexiroosichi qaaro bi tunoon ariihan. Emiraꞌa kelloon qechemmon qajjaachaa, kexooch woccaa hammaa asheenaꞌoyich “Pheexiroosi waaꞌi kellooch neexee beetone” iyaꞌa gettahan.

¹⁵ Asheenaꞌo “Hini busheene, geyetine” iyeete. Areyoo “Iberooniye ta gettaabeeto” iibee manjii gettahan. “Ishigaata, Pheexiroosichi maraakoone” iyeete.

¹⁶ Tunebaani Pheexiroosi uxeree kelloon daakkii daakkii qoppiye. Ebich asheenaꞌo tiyii qechii beeggiꞌi, boonoshi gettemmon mucceheete.

¹⁷ Tunetaa Pheexiroosi kishee malletoona yibbaateyaahote iꞌi tiyii, Doono cuyee kexoochee aabichiꞌi biin bi kichito gaata boonoshich gettiye. “Ebin Yaaqobinaa bare kittinnee maneenaꞌonoyich getote” iꞌi boonoshich gettiichii, aroochee kechii bare xaaꞌooch hammiye.

¹⁸ Dechara ginee naayinaꞌo “Pheexiroosi amooch aallehe?” iꞌi oogichii caageheete.

¹⁹ Arooba Heroodisi Pheexiroosin qaawii mucceꞌi, kellechinaꞌon gaawichii bi echiitoyee gubb, wuxiihe. Aroochee taatoo Heroodisi Yihudee showoochee tiyiꞌi, Qesaariya hammii kotehe.

Taatoo Heroodisichi Qitoo

²⁰ Ebiyee aaf Xiroosi asheenaꞌonaa Sidooni asheenaꞌonon oogichii kaaretone. Ebich and ikke mullo tuneꞌi tiyii, shiichii taatoochi gabberechi Filatuus waan waaꞌi, “Noon geenebe” iꞌi boonoshi qolletaa, boonoshich deꞌa iye. Ebina taatoo waan hammiꞌi, shunebone ii qolleheete. Shunoyich boonoshi qaawiti naboo, taatoo Heroodisi beeti showoo maayoon kemeꞌi boonoshi daammiibeeti showoo bi tunetoyichiye.

²¹ Ebi taajjeeti taajjooba, taatoo Heroodisi bi taatee tahoon tahee, bi taatee qeenooch kechii koteꞌi kiceeti dofee asheenaꞌoyich yibbaatehe.

²² Hini are asheenaꞌo waayeꞌi, “Hini nuggishoochi qaaroani ashi qaaro toonoone” iibee cookeeheete.

²³ Taatoo Heroodisi “Oogoo Yeerine” iꞌi Yeerich oogoon imo bi qajjitoyich, bekkech Doonochi maraakoo kindiꞌi, biiyoona biin yexxiye; aroo hippereꞌi qitiye.

²⁴ Aroochee Yeerichi qaaro gaminnii gaminnii hammiye.

²⁵ Barnabaasinaa Sawulina boonoshi wocheeton bechiꞌi, Yerusaalemee Antsooka Maariqoosi getteebeeti Yowannisin yechiꞌi wotteheete.