Mishiraachechinaꞌo 11 - Kafa Linguistics Project

Yeeri Tuniiti Mooyon Pheexiroosi Geto

¹ Arooba mishiraachechinaꞌonaa Yihudee showooch beeti maneenaꞌona Aageteenaꞌo Yeerichi qaaroyich boonoshi deꞌa geton waayeheete.

² Pheexiroosi Yerusaalem hammimmona, boonoshi mulloon Yesuusi toommooch tooꞌiiti Ayihudeenaꞌo

³ Pheexiroosin “Aageteenaꞌo kexooch aabichaꞌa giyenne? Maayoon boonoshina tookkaa aabichaꞌa maanne?” iyeete.

⁴ Pheexiroosi Yeeri tuniiti mooyon xepphoochee tiijjiꞌi yaaroona ishichiꞌi gettiye:

⁵ “Ta, Yoopphaa corootaabee yaaꞌoon beeggehoye. Are yaaꞌoona oogeti naxaloommi qiico awudde caappoona yecheꞌi, shimaayoochee kindii ta waan waahe.

⁶ Aroon manjii ciinnaꞌa, awudde baatechi kechi gijjoo, kubbi cooxo, yuummereenaꞌonaa shimaajji kafeenaꞌonon beeggeho.

⁷ Aroochee ‘Pheexirooso, tiyi eboshin guuriree mame’ ii beeti qaaroon waayeho.

⁸ “Tawoo ‘Ta Doonocho, tuneyaache! Yaafoo tuneyaanoonaa ashoon eeꞌii beetonon cir maa ariyaano taane’ iyo.

⁹ “Guttinnoon ‘Yeeri yaafiton “Yaafoo tuneyaanoone” gettaaye’ ii beeti qaaro shimaayoochee wochiye.

¹⁰ Ebiyoo keejje wottoon tunehe. Ebiyee gubb, bulli geecheeꞌi shimaayooch wottee kechiye.

¹¹ “Areegaata bekkech keejje asheenaꞌo Qesaariyee ta waan wocheeꞌi, waa ta beeti kechi kellooch neexeheete.

¹² Yaafe Ayaano taach ‘Ne mulloon guttiyaanoon boonoshina tookki hambe’ iꞌi gettiye. Hini shiritte maneenaꞌo wotta Yoopphee taanna tookkii waaheete; shaggaꞌa uroochi kexooch giyehone.

¹³ Biyoo ‘Maraakoo ta kexooch giyii neexetaa beeggoye; are maraakoo “Yooppha ashoon wocheree Pheexiroosi getteebeeti Simoonin ne waan ceege.

¹⁴ Biyoo neennaa ne kechi asheenaꞌona wodemmi gommon gettemmone” iꞌi bi getaa waayehoye’ iꞌi nooch gettiye.

¹⁵ “Aree hillooch batt yibbaatooch ta giyemmona, Yaafe Ayaano shiichiꞌi no toommooch bi kindoommon boonoshi toommooch kindiye.

¹⁶ Arooba Doono Yesuusi gettiti qaaro ta mullooch tipphimiye; aroo ‘Yowannisi aacona asheenaꞌon afaallitone; tunebaani ittoshi Yaafe Ayaanoona afaalleyemmo ittoshine’ iꞌi bi gettitone.

¹⁷ Illa Doono Yeeri no mulloon Yesuus Kiristoosi toommooch tooꞌiiti nooch bi immitoommon are wojjoon boonoshich wotta bi imigaata, Yeerin ‘Aakkiya boonoshich immenne?’ getoyich ta koni taane?” iye.

¹⁸ Ebi Ayihudeenaꞌo ishin waayeꞌi ittibatoon qajjiyeete. Ebiyee “Illa Yeeri Aageteenaꞌo wotta kashoon boonoshi danemmoyich, axaaxee gommoochee Yeer waan wottemmi mulloon boonoshich immitone” iibee Yeerin oogiiheete.

Antsooka Beeti Kittinnee Guupho

¹⁹ Isxifanoosi qitiyooba, tiyiti duꞌoona shaceti Yesuusichi asheenaꞌo Finqa, Qoophiroosinaa Antsookinooch beddaahaa hammiyeete; boonoshiyoo Yeerichi qaaroon Ayihudeenaꞌo ikkeetinaꞌoyichani bare asho konichona getaaneenaꞌone.

²⁰ Tunetaa boonoshi daggoochee Qoophiroosee showoonaa Qereni katemoonoochee waati ikkikkeenaꞌo Antsooka hammiꞌi, Doono Yesuusichi mishiraachee qaaroon Aageteenaꞌoyich wotta gettiyeete.

²¹ Doono boonoshina tookkii tuneꞌi bi giidoona boonoshin gaachehe; arooba meeti asheenaꞌo boonoshi mulloon Yesuusi toommooch tooꞌiiꞌi Doono waan wotteheete.

²² Ebiyee gubb, Yerusaalem beeti kittinnee guupho hini woroon waayeꞌi, Barnabaasin Antsooka daachiihe.

²³ Biyoo hammii Yeeri bi wojjoon hini asheenaꞌoyich bi imon beeggiꞌi emiriye; boonoshi bullin, ceeni mulloona manjiree, Doono Yesuusichoo gibeneeree boonoshi beeyemmoyich ciicciye.

²⁴ Yaafe Ayaanoona ceennitonaa gaabbaanoon mulloon Yeeri toommooch tooꞌiibeeti deꞌe uroonane. Arooba meeti asheenaꞌo Doono waan wotteheete.

²⁵ Ebiyee gubb, Barnabaasi Sawulin qaawiya, Xerisees hammiye;

²⁶ qaawii daneꞌi Antsooka deebiye. Gutteenaꞌoo ikke naton arooch beeti kittinnee guuphi asheenaꞌona tookkii kiceebee, meeti asheenaꞌoyich Yeerichi qaaroon dojjiyeete. Arooba batti batt Yesuusichi dabbeenaꞌo Antsookaa kittinneenaꞌo getaa ceekkeheete.

²⁷ Aroobee yemeenooch keemechinaꞌo Yerusaalemee Antsooka hammiyeete.

²⁸ Areenaꞌo daggoochee ikke Agaaboosi getteebeeti uro tiyiꞌi, “Alemo bulliich giidechi shaacoo giya ii beetone” iꞌi Yaafe Ayaano biich shalligichaa gettiye. Ebi keemo Qelawudoosi yemeenooba ceenniye.

²⁹ Arooba Yesuusichi dabbeenaꞌo boonoshi qelli qelloona boonoshi hakkee wottoon gijjoon kichiꞌi, Yihudee showooch beeti maneenaꞌoyich daachiya echeeheete.

³⁰ Gijjoon kiciꞌi, “Barnabaasinaa Sawulina kishoona kittinnee guuphi geeneenaꞌoyich shage” iꞌi daachiiheete.