Mishiraachechinaꞌo 10 - Kafa Linguistics Project

Pheexiroos Waan Wochoon Qorineloosi Daachiyoo

¹ Arooba Qesaariyi katemooch Qorineloosi getteebeeti ikke uro beehe. Biyoo Xaaliyaanee ginee naayinaꞌochi guuphi daggooch balle ginee iraashoone.

² Qorineloosi bi kechi asheenaꞌo bullina tookkii Yeerich qeyii beetone; biichoo hajjee beetone; iriteetinaꞌon oogichii gaacheebeeto, kuxaanoonoo Yeer waan corootii beeti uroone.

³ Ikke areddoon yiixiye saati bedooch Yeerichi maraakoo “Qorinelooso!” iibee bi waan bi giyii beetaa, yaaꞌoon xallayii beeggiye.

⁴ Biyoo keqqoona manjiiꞌi ciinniibee, “Ta doonocho, amoone?” iye. Are maraakoo ishichiye: “Ne corootoonaa girechinaꞌon ne degona shalligichoo tuneꞌi Yeeri aafooch shaggitone.

⁵ Andoo Yooppha ashoon wocheree, Pheexiroosi getteebeeti Simoonin ne waan ceege.

⁶ Biyoo baharee gashooch beeti, gooqqee quccechi Simooni kexooch iibbittinoona koteꞌi beetone” iye.

⁷ Maraakoo ishin gettiꞌi bi hammiti hillooch, Qorineloosi bi wochee bushiisheenaꞌo daggoochee gutteenaꞌon, bi hajjee ginee naayinaꞌo daggoochee Yeerich qeyiibeeti ikkoon ceeggiꞌi,

⁸ bulli mooyon bi gettitoyee gubb, Yooppha wochee daachiihe.

Yaaꞌoon Pheexiroosi Beego

⁹ Bi yaachich are wocheeti asheenaꞌo hammiibee, are Yooppha boonoshi shagg beddimmona, Pheexiroosi corootiya shiritte saati bedooch kechi toommeexi kexooch kechiye.

¹⁰ Aroochaa biin shaaciitaa, maayoon maaya qaawiye. Biich maayo qannii beetaa, diqq yaaꞌoon beeggiye.

¹¹ Are yaaꞌoona shimaayoo qecheetaa, oogeti naxaloon shaahiibeeti mooyona awudde caappoona yecheeti qiico showooch kindiye.

¹² Are qiicee daggooch awudde baatechi kechi gijjoo, kubbi cooxo, yuummereenaꞌonaa shimaajji kafeenaꞌona beetinaꞌone.

¹³ Areegaata “Pheexirooso, tiyi eboshin guuriree mame” ii beeti qaaroon waayehe.

¹⁴ Pheexiroosi wochiꞌi, “Ta Doonocho, tuneyaache! Yaafoo tuneyaanoonaa ashoon eeꞌii beetonon cir maa ariyaano taane” iye.

¹⁵ Wotta guttinnoon “Yeeri yaafiton ‘Yaafoo tuneyaanoone’ gettaaye” ii beeti qaaroon waayehe.

¹⁶ Pheexiroosi ishin keejjaa bi waayetoyee gubb, bekkech are qiico geecheeꞌi shimaayooch wottee kechiye.

¹⁷ Pheexiroosi bi beeggiti yaaꞌoon “Ebi amoone?” iibee bi mulloona kichii kindii bi beetaa, bekkech Qorineloosi wocheti asheenaꞌo gooqqee quccechi Simooni kexon echeebee daneꞌi kellooch shaggiyeete;

¹⁸ kexooch ceeggiꞌi, “Pheexiroosi getteebeeti Simooni qeyiibeeto, hiniichiye?” iꞌi echeheete.

¹⁹ Areegaata Pheexiroosi koteꞌi bi beeggiti yaaꞌoon gabii bi beetaa, Yaafe Ayaano “Ebiyoche, keejje asheenaꞌo neen qaawii beeteete.

²⁰ Tiyiree kindibe; boonoshin wocheto ta tunetoyich, ne mulloon guttiyaanoon boonoshina tookki hambe” iye.

²¹ Aroochee Pheexiroosi tiyii asheenaꞌo waan kindiꞌi, “Ittoshi qaawiibeeti uro taane. Ittoshi waato, amoyichiye?” iye.

²² Boonoshiyoo “Noon wocheto cadiqoonaa Yeerich hajjee beetona, Ayihudee aagetoo bulli oogiibeeti balle ginee iraashoo Qorineloosine. Biyoo noon bi wocheto, ‘Pheexiroosin ne kexooch ceekkiiree, bi gettimmon waayebe’ iꞌi yaafe maraakoo biich bi gettitoyichiye” iyeete.

²³ Pheexiroosiyoo boonoshin kexooch ataallii giijjiꞌi qeejjiye. Bi yaachich Pheexiroosi tiyiꞌi boonoshina tookkii hammiye; wotta Yooppha beeti maneenaꞌo daggoochee ikkikkeenaꞌo biinna tookkii hammiyeete.

Qorineloosi Kexooch Pheexiroosi Hamo

²⁴ Bi yaachich Qesaariya shaggiyeete. Arooch Qorineloosi bi xibeenaꞌonaa katine bi shunachinaꞌonon ceeggii ikkooch kiciꞌi, Pheexiroosinaa wocheeti asheenaꞌonochi womon quyee beehe.

²⁵ Pheexiroosi shaggiꞌi kexooch bi giyimmona, Qorineloosi biinna daneꞌi tiyii bi baatooch dihiꞌi goyinnehe.

²⁶ Tunebaani Pheexiroosi Qorineloosin tibe ii yechii tiijjiꞌi, “Tawoo neenoommi asho taane” iye.

²⁷ Tookkii yibbaateebee kechi maac giyiꞌi, meeti asheenaꞌo kiceeꞌi beetinaꞌon danehe.

²⁸ Biyoo boonoshich ishichiye: “Ayihudeenaꞌo Aageteenaꞌona tookkii ikkotto woyee boonoshi kexooch gimo Muusichi Sheeree shaaddoo tunoon ariibeeto ittoshine. Tunebaani asho koninolla ‘Yaafoo tuneyaanoone; eeꞌoone’ ta getaachemmoyich Yeeri taach shiichiꞌi bekkiitone.

²⁹ Ebich ittoshi wochoyich ta mulloon guttiyaanoon, ittoshi waan waato taane. Andoo amoyich taan ittoshi ceeggiito gaata ittoshin echehoye” iye.

³⁰ Aree hillooch Qorineloosi ishichiye: “Hanaachi keemooba yiixiye saati bedooch ebi gaata ta kexoochaa corootaa ta beetaa, wacciibeeti tahoon taheti uro ta aafooch neexeꞌi,

³¹ ‘Qorinelooso, Yeeri ne corootoon waayetone; girechinaꞌon ne dego shalligichoo tuneꞌi bi aafooch shaggitone.

³² Ebich Yooppha ashoon wocheree, Pheexiroosi getteebeeti Simoonin ne waan ceege. Bi beeto, baharee gashooch beeti, gooqqee quccechi Simooni kexooch iibbittino koteꞌiniye’ iye.

³³ Ebich bekkech ashoon ne waan wochehoye; andoo ne womo gaawetone. Illa Doono neech gettito bullin ne waanee waayoyich no bulli ebiyoche, Yeeri aafooch kiceeto noone” iye.

Qorineloosi Kexoochaa Mishiraachee Qaaroon Pheexiroosi Geto

³⁴ Aree hillooch Pheexiroosi yibbaateya tiyiꞌi, “Iberoone; Yeeri ashoon beshaa shappiiꞌi heppee bi qayon ta mulloona ariito taane;

³⁵ aagetoo bulliichee koniyoona bi tunetaa, biich hajjee beetonaa tatoon shuuneebeeto bullinon hoxeyaachemmone.

³⁶ Yeeri ‘Yesuus Kiristoosinane ittoshina tookki ta shunemmo’ iꞌi Israꞌeeleenaꞌoyich mishiraachee qaaroon deejjitone; hini Yesuus Kiristoosi bullichi Doonone.

³⁷ Yowannisi ‘Aacona afaalleebote’ iibee aacona bi afaallitoyee gubb, Galiilee showoochee tiijjiꞌi, Yihudee showoo bulliich tuneti mooyon ariibeeto ittoshine.

³⁸ Yeeri Naazireetechi Yesuusin Yaafe Ayaanoona huuttiꞌi giidoon biich immiye; biinna tookkii Yeeri tunetoyich, Yesuusi deꞌoon shuuneebee daabiloosi hajjitinaꞌo bullin wodiibee guuddiye.

³⁹ “Ayihudee showoonaa Yerusaaleminooch bi shuuneto bullin aafoona no beeggeton and miixaabeeto noone. Boonoshiyoo Yesuusin mixooch yooddiꞌi wuxiyeete;

⁴⁰ tunetaa biin Yeeri keejje qemooba qitoochee tiijjiꞌi bekkiihe.

⁴¹ Bi bekkiito, boonoshi beeggiton boonoshi miixemmoyich shiichiꞌi bi kaaccitinaꞌoyichalli, asheenaꞌo bullich toonoone. Ebi shiichiꞌi bi kaacciti miixoo tuneti no, Yesuusi qitoochee bi tiyitoyee gubb, biinna tookkaa maa ucheto noone.

⁴² ‘Kashechinaꞌonaa qiteenaꞌonochi toommooch nallibe’ iꞌi Yeeri biin ukkiriyoon no gettemmonaa no miixemmonoyich nooch gettitone.

⁴³ Wotta keemechinaꞌo bulli ‘Boonoshi mulloon bi toommooch tooꞌii beetinaꞌo bulli bi shigoona Yeer waanee axaaxee maaroon danemminaꞌone’ iꞌi miixetinaꞌone” iye.

Aageteenaꞌo Toommooch Yaafe Ayaano Kindoo

⁴⁴ Pheexiroosi yibbaatee toommooch bi beetaa, bi yibbaatoon elleebeeti asheenaꞌo bulli toommooch Yaafe Ayaano kindiye.

⁴⁵ Pheexiroosina tookkii waati, boonoshi mulloon Yesuusi toommooch tooꞌiiti Ayihudeenaꞌo, Yeerichi wojjoo tuneti Yaafe Ayaano Aageteenaꞌo toommooch bi kindoon beeggiꞌi worganeheete.

⁴⁶ Ebiyoo andire noonoona yibbaateebee Yeerin boonoshi oogii beetaa, boonoshi waayetoyichiye. Arooba Pheexiroosi tiyiꞌi hini are Ayihudeenaꞌoyich,

⁴⁷ “Hini asheenaꞌo toommooch wotta noochoommon Yaafe Ayaano kinditone; illa aacona boonoshi afaalleyaachemmoyich, konine boonoshin bayon hakkemmo?” iye.

⁴⁸ Ebich Pheexiroosi Aageteenaꞌoyich “Tiyiree Yesuus Kiristoosichi shigoona aacona afaalleebote” iye. Ebiyee gubb, hini are asheenaꞌo Pheexiroosin “No waan giisheche aaboon kotebe” iꞌi qolleheete.