Mishiraachechinaꞌo 1 - Kafa Linguistics Project

Yaafe Ayaanoon Bi Asheenaꞌoyich Imma Yeeri Gibenikkoo

^1-2 Teefilooso, Yesuusi kaacciꞌi bi wocheti mishiraachechinaꞌoyich Yaafe Ayaanee giidoona gettiichii, shimaajj bi kechimmi wottoon, bi shuuneti shuunoonaa bi dojjiti mooyo bullinon batti batti ta macaafooch koorito taane.

³ Yesuusi wodde xuuxoona bi qititoyee gubb, mishiraachechinaꞌoyich xalla bekkeebee kashecho bi tunoon wodde gommona manjiihe. Aabbe qemon bekkeꞌi, Yeerichi taatittineechon boonoshich dojjii beehe.

⁴ Wotta boonoshina tookkii beebee boonoshich ishichiye: “Yerusaalemee bara kechaahote. Tunebaani ta waanee ittoshi waayeti ta Nihoo gibenikkiti gibenoon quyebote.

⁵ Yowannisi asheenaꞌon aacona afaallitone; tunebaani and giisheche aaboyee gubb Yaafe Ayaanoona afaalleyemmo ittoshine” iꞌi gettiye.

Shimaajj Yesuusi Keyo

⁶ Yesuusi wocheti mishiraachechinaꞌo biinna tookkii ikkooch kiceeꞌi beebee, “No Doonocho, hini yemeenee maacooch taatittinoon Israꞌeeleenaꞌoyich wochiree immenne?” iꞌi echeheete.

⁷ Biyoo wochiꞌi, “Ta Nihoo bi hajjee shalligoona bi neechiti ageneenaꞌonaa yemeeneenaꞌonon ittoshi ariyemmoyich, ittoshich daaggaanoone.

⁸ Tunebaani Yaafe Ayaano ittoshi toommooch bi kindiyooba, giidoon danemmo ittoshine. Arooba Yerusaalem, Yihudee showoo bulliich, Shamaaree showooch, showee tuggo bulliichoo ta mooyon miixemmo ittoshine” iye.

⁹ Yesuusi ebin bi gettitoyee gubb, bi wocheti mishiraachechinaꞌo ciinnii beetaa, shimaajj kechiye; quboo boonoshi aafoochee biin qeriye.

¹⁰ Shimaajj bi keyon manjiiꞌi boonoshi ciinnii beetaa, nacce tahoon taheti gutte asheenaꞌo boonoshi gaꞌooch neexeechii,

¹¹ “Hini Galiilee asheenaꞌote, kaama shimaajj ciinniibee amoyich neexee beetote? Hini ittoshi waanee shimaajj kechiti Yesuusi, shimaajj bi keyaa ittoshi beeggitoommon, ebiyoommon wotteree woyemmone” iyeete.

Yihudi Keroyich Maatiyaasi Kaacceyoo

¹² Ebiyee gubb, mishiraachechinaꞌo Zayitee Michi guudoochee Yerusaalem wotteheete. Hini aroochee tiijjii Yerusaalem beddaahaa beeti gommo shambetee gomma bedoone.

¹³ Katemooch shaggiꞌi, boonoshi beeti, kechi toommeexi kexooch kechiyeete. Boonoshiyoo Pheexiroosi, Yowannisi, Yaaqobi, Indiriyaasi, Filipphoosi, Toomaasi, Baritelemoosi, Maatiyoosi, Ilfiyoosichi bushoo Yaaqobi, bi aagetoyich qanaatechi Simooni, Yaaqobichi bushoo Yihudi, eboshine.

¹⁴ Eboshi bulli genneenaꞌonaa Yesuusichi indee Maariyamina tookkii, wotta Yesuusichi maneenaꞌona tookkii bulli aaboon ikkottee kiceeꞌi corootii beeheete.

¹⁵ Ikke areddoon kiceeꞌi boonoshi beetaa, balli hiya bede Yesuusichi asheenaꞌo daggooch Pheexiroosi tiyii neexeꞌi ishichiye:

¹⁶ “Ta maneenaꞌote! Ebiyee aaf Daawitin Yaafe Ayaano shalligichaa, Yesuusin yechiti asheenaꞌon dabbiiꞌi deebiti Yihudichi mooyon keemmitone. Hini bi keemmiti macaafee qaaro ceenn bedo bi tunetoyich ceennitone.

¹⁷ Hini are Yihudi no daggooch bacceeꞌi no shuunee gogecho tunetone” iye.

¹⁸ Hini are uro bi daneti axaaxee gijjoona showoo kemeehe. Biyoo baroona guufeꞌi gutta gaahehe; bi maacee meenoo shekirehe.

¹⁹ Hini mooyo Yerusaalem beetinaꞌo bullich waayeehe. Ebich are showoo boonoshi noonoona Akalidami getaa shigehe. Ebi getoo Damee Showoo getone.

²⁰ Pheexiroosiyoo daakkiꞌi, “Ebich Shoddee Macaafoochaa, ‘Bi beeyi xaaꞌoo shokko echebe; arooch koniyoona gafaaye,’ wotta ‘Bi ukkirittinoon baroo ukkirebe’ getaa kooreetone.

^21-22 Ebich no daggooch bacceeree, Yesuusi qitoochee bi timon miixemmi ikke ashoon kaacone; biyoo Yowannisi aacona afaalloochee tiijjiꞌi, Doono Yesuusi shimaajj bi kechiti aabooch beddaahaa, no daggooch bi shaꞌeti areddoo bulliich noonna tookkii beeti asheenaꞌo daggoochee ikkoo tuno qaawiihe” iye.

²³ Ebich gutte asheenaꞌon Yusxoosi woyee Barisiyaani getteebeeti Yooseefinaa Maatiyaasinon neechiichii,

^24-25 ishichiꞌi corootiyeete: “Bullichi mulloon ariibeeti no Doonocho, Yihudi bi shuunoon deqqa hammiibee, duppii bi hammiti xaaꞌooch mishiraachechinaꞌona tookki bi shuunemmoyich ne kaacceton hini gutteenaꞌo daggoochee aabi gaata nooch bekkiibe” iyeete.

²⁶ Boonoshi ishichitoyee gubb, ixoon duppiyeete; ixoo Maatiyaasin yechiye; ebina Maatiyaasi aaraa ikke mishiraachechinaꞌo toommooch daakkeeꞌi haddeehe.