Milikiyaasi 2 - Kafa Linguistics Project

^1-2 Beshe Mawe Doono Yeeri ishichiye: “Qeesheenaꞌote, ebi geto ittoshichiye. Elloon ittoshi qayigaata, taan oogiyoyich ta qaaroon ittoshi mullooch kotiyoo ittoshi qayigaatoo, ittoshin uppemmo taane; ittoshi diiroon ufooch shaddemmo taane. Mulloochee tiijjiꞌi taan oogiyoo ittoshi qajjitoyich, ittoshin uppeto taane.

³ “Ittoshi shiijjereenaꞌon sheeremmo taane. Deejjoyich ittoshi giddiiti gijjeenaꞌochi xabeꞌoon ittoshi aafooch huuttemmo taane. Ebi are xabeꞌoona tookki hami duppeyemmo ittoshine.

⁴ Lewina tookkaa ta giyeti wogo manjiree bi beeyemmoyich, ebi getoon ittoshich ta deejjoon ariyemmo ittoshine, iye Beshe Mawe Doono Yeeri.

⁵ “Biinna tookkaa ta giyeti wogo kashoon immichonaa diggeechona tuneti wogoone. Tawoo, ta wogetoommon biich tuniihoye. Ebiyoo taach bi shattemmoyichiye; biyoo taach shattiye. Ta shigoonoo oogiihe.

⁶ Biyoo ibere mooyon asheenaꞌoyich dojjiye; koote mooyon yibbaatee ariyaanoone. Taanna tookkii diggoona, kaamittinoonoo beehe; meeti asheenaꞌonoo axaaxoochee wochiye.

⁷ “Qeesheenaꞌo Beshe Mawe Doono Yeeri ta wocheyechinaꞌo boonoshi tunetoyich, boonoshi noonooch ariyoon kotiyoo boonoshich qaawiihe. Asheenaꞌoo boonoshi noonoochee doyoon qaawoo boonoshich qaawiihe.

⁸ Tunebaani ittoshi ta gommoochee badd wotteto ittoshine; ittoshi dojjiibeeti doyoona meeti asheenaꞌoyich xugoon tuneto ittoshine. Lewina tookkaa ta giyeti wogoonoo happito ittoshine, iye Beshe Mawe Doono Yeeri.

⁹ Ta gommona hamo ittoshi qajjitoyich, ta asheenaꞌon heppaanoon tachiꞌi dojjoo ittoshi qajjitoyich, ta wotta asho bulli aafoochaa hoxeetonaa cooneetonon ittoshin tuniyemmo taane” iye.

Asheenaꞌo Doono Yeerich Gibeneyee Qayo

¹⁰ No bulliyona ikke Nihoochi bushiishoo toono noone? Noon hallito ikke Nuggishoo toone? Ishigaata, noonnaa noonna gibeneyee qayona, Yeeri no qaabbechinaꞌona tookkii giyiti wogoon no happaabeeto amoyichiye?

¹¹ Yihudee asheenaꞌo Yeerich gibeneyemmon qajjitinaꞌone; Israꞌeelee showoonaa Yerusaaleminoochaa eeꞌe mooyon shuunetinaꞌone. Shahalloyich goyinneebeeti maacheenaꞌon shaagona Doono Yeeri shunniibeeti, bi yaafee kexon eeꞌiitinaꞌone.

¹² Ebin tuniibeeti asho, Beshe Mawe Doono Yeerich deejjoon bi giddiiteenolla Doono Yeeri Yaaqobichi shiijjereenaꞌo daggoochee biin kichi yoohe.

¹³ Ittoshi tuniyemmi bare mooyo ebine: Doono Yeeri ittoshi deejjoon ciinaachemmo bi tunetoyich, ittoshi kishoocheenoo deꞌaachemmo bi tunetoyich, Doono Yeerichi deejjee gudoon acimoona, eefonaa ayinoona qeremmo ittoshine.

¹⁴ Ittoshiyoo “No deejjoon deqqemmon bi qajjito amoyichiye?” geti echemmo ittoshine; ebiyoo ne bushittinee mecheyich ne wogeti wogoon ne biishon bi ariitoyichiye. Ne mechee neech nuucheenaa ne wogee mecheena tunaa bi beetaa, Doono Yeeri aafoochaa ne wogeti wogoon biicheto neene.

¹⁵ Yeeri neennaa biinnon ikke meenonaa ikke ayaanoonon tuniyaanoone? Ebin bi tuniito amoyichiye? Ebin bi tuniito, biin shattiibeeti bushiishoon ittoshi shiyemmoyichiye. Ebich ittoshi qelloon quyebote. Koniyoona bi bushittinee mecheyich bi giyiti wogoon biichaaye.

¹⁶ Israꞌeelee Nuggishoo Doono Yeeri ishichiye: “Gawukkeyoon shixxehoye; bi mecheen gawukkoona biin xuqqiibeeti ashi shuunoon shixxehoye” iye Beshe Mawe Doono Yeeri. Gibeneyaano ittoshi tuneyaachemmoyich ittoshi qelloon ariibote!

Nallee Aabo Shago

¹⁷ Ittoshi yibbaatoona Doono Yeerin shewiito ittoshine. Ittoshiyoo “Aabichaꞌa biin shewiihone?” ito ittoshine. Biin ittoshi shewiito, “Gonde mooyon tuniibeeto bullin Doono Yeeri gaawe aafoona ciinnii beetone; biyoo boonoshina emirii beetone” ittoshi getonane. Biin ittoshi shewiito wotta, “Dayinnetechi Yeeri aaye?” iꞌi echoonane.